جيىندا ۋنيۆەرسيتەتتىڭ باسقارما ءتوراعاسى – رەكتورى جانسەيىت تۇيمەبايەۆ قازاقستان تاۋەلسىزدىگىنىڭ 30 جىلدىعى قارساڭىندا جاريالانعان جولداۋدىڭ ەلىمىزدىڭ الداعى دامۋ ستراتەگياسىن ايقىنداۋداعى ماڭىزدىلىعىنا ءمان بەردى.
ءبىلىم ورداسىنىڭ باسشىسى ەل پرەزيدەنتىنىڭ «بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋعا ءتيىس» دەگەن ءسوزىن مىسالعا الىپ، ويىن بىلايشا ساباقتادى:
– بۇل تاپسىرمانى ايتپاي-اق ءتۇسىنىپ جاساۋ – ءبىزدىڭ مىندەتىمىز. قاسىم-جومارت كەمەل ۇلى العاشقى جولداۋىندا دا «قازاق ءتىلى ۇلتارالىق قاتىناس ءتىلى بولۋى قاجەت» دەپ باسا ايتقان بولاتىن. سەبەبى مەملەكەتتىڭ مەملەكەت بولۋىنىڭ باستى بەلگىسى، ول – ءتىل. ءبىزدىڭ ءتىلىمىز بۇگىنگە دەيىن قانداي فۋنكسيالاردى اتقاردى؟ نەگىزگى فۋنكسياسى ونسىز دا بەلگىلى. الايدا ءالى عىلىم تىلىنە اينالا العان جوق. قازاق ءتىلى عىلىم ءتىلى دەڭگەيىنە جەتۋ ءۇشىن بارلىعىمىز جۇدىرىقتاي جۇمىلىپ جۇمىس ىستەۋىمىز قاجەت، – دەپ اتاپ ءوتتى.
سونداي-اق ءبىلىم مەن عىلىم سالاسىنا قاتىستى باستى ماسەلەلەرگە توقتالا كەلە، جولداۋ جۇكتەگەن جاڭا جاۋاپكەرشىلىك پەن مىندەتتەردىڭ ورىندالۋىنا بەلسەنە اتسالىسۋعا شاقىردى.
جولداۋدا اتالعان وقۋ باعدارلامالارىن جاڭا جاعدايعا بەيىمدەۋ، ساپالى كادر دايارلاۋ، سيفرلاندىرۋ، عىلىمدى دامىتۋعا بايلانىستى مىندەتتەردى جۇزەگە اسىرۋمەن قاتار، قازۇۋ-دىڭ حالىقارالىق جانە رەسپۋبليكالىق رەيتينگتەگى ورنىن نىعايتۋ قاجەتتىگىن جەتكىزدى.
قازۇۋ-دىڭ باسقارما مۇشەسى – اكادەميالىق ماسەلەلەر جونىندەگى پرورەكتورى فاتيما جاقىپوۆا ءداستۇرلى وقۋ فورماتىنىڭ ەرەكشەلىكتەرىنە توقتالسا، اقپاراتتىق تەحنولوگيالار فاكۋلتەتىنىڭ دەكانى بايداۋلەت ۋرماشيەۆ اقپاراتتىق جۇيەنىڭ ساپاسىن دامىتۋ تۋرالى ويلارىن ورتاعا سالدى.
عىلىمي-يننوۆاسيالىق جۇمىس جونىندەگى پرورەكتور م.ا. تىلەكقابىل رامازانوۆ ىرگەلى عىلىمدى دامىتۋ ءۇشىن گرانت مەرزىمىن قازىرگىدەي ءۇش جىلمەن شەكتەمەي، بەس جىلعا دەيىن قاراستىرۋ ۇسىنىسىن قۋانىشپەن قابىل العان اسەرىمەن ءبولىسىپ، سالاعا قاتىستى ۇسىنىسىن ورتاعا سالدى.
سوڭىنان قازۇۋ رەكتورى ج.تۇيمەبايەۆ پرەزيدەنتتىڭ «ەلىمىزدىڭ ءبىلىم بەرۋ جانە عىلىم سالاسىنىڭ الدىندا كەزەك كۇتتىرمەس اۋقىمدى مىندەت تۇر. بۇل ۋاقىت تالابىنا ساي بولۋمەن قاتار، ءارقاشان ءبىر ادىم الدا ءجۇرىپ، تىڭ جاڭالىقتار ۇسىنا ءبىلۋ» دەگەن سوزىنە باسىمدىق بەرىپ، وسى مەجەدەن شىعۋ ءۇشىن بىرلەسە جۇمىس ىستەپ، ايقىن ناتيجەلەرگە قول جەتكىزۋ قاجەتتىگىن تاپسىردى.
ەستەرىڭىزگە سالا كەتسەك، ءال-فارابي اتىنداعى قازاق ۇلتتىق ۋنيۆەرسيتەتى مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىن ءۇش ءماجىلىس زالىنا ءبولىنىپ، ۇجىممەن بىرگە تىڭداعان بولاتىن. اكىمشىلىك عيمارات جانە ءال-فارابي كىتاپحاناسىندا ۇيىمداستىرىلعان تىكەلەي كورسەتىلىمدەرگە ۋنيۆەرسيتەت باسشىلىعى، وقىتۋشى-پروفەسسورلار قۇرامى مەن ءبىلىم الۋشىلار قاتىستى.
سونداي-اق قازىرگى ساتتە وقىتۋشى-پروفەسسورلار قۇرامى باعدارلامالىق قۇجاتتا كوتەرىلگەن ماسەلەلەر بويىنشا ءوز پىكىرلەرىن ءتۇرلى ب ا ق بەتتەرىندە جانە ۋنيۆەرسيتەت سايتىندا جاريالاپ، ەل پرەزيدەنتىن ءبىراۋىزدان قولدايتىنىن بەلسەندى جەتكىزۋدە.
