قازاقستاننىڭ جاڭا تاريحىن بىلۋگە ارنالعان ونلاين-تەست تاۋەلسىزدىكتىڭ 30 جىلدىعىنا ارنالعان ءىس-شارالار ناۆيگاتورى سايتىندا تامىز ايىندا ىسكە قوسىلدى. وندا كسرو ىدىراعاننان كەيىنگى رەسپۋبليكانىڭ دامۋ كەزەڭىنەن باستاپ، قازىرگى كەزەڭگە دەيىنگى ماڭىزدى وقيعالار جيناقتالعان.
سوڭعى ەكى ايداعى ستاتيستيكاعا سايكەس، كۆيز قاتىسۋشىلارى 21 سۇراقتىڭ ىشىنەن 10 سۇراقتىڭ جاۋابىن دۇرىس تابا الىپ ءجۇر. قىركۇيەكتە تەست 47 مىڭ رەت نەمەسە شامامەن كۇنىنە 1500 رەت تاپسىرىلدى. تەستكە شىعىس قازاقستان، پاۆلودار جانە اقمولا وبلىستارىنىڭ تۇرعىندارى بەلسەندى قاتىستى. تەستتەن ءوتۋ قورىتىندىسى بويىنشا ءاربىر قاتىسۋشى ءوزىنىڭ دەربەس ونلاين-سەرتيفيكاتىن الدى.
«ونلاين-تەستتەن وتكەن ادامداردىڭ 70%-ى 25 جاسقا دەيىنگى جاستار ەكەندىگى كوڭىل قۋانتادى. تاريحي كۆيز – بۇل ءبىزدىڭ ەلىمىزدىڭ قالىپتاسۋى مەن دامۋىنىڭ 30 جىلدىق تاريحىن ينتەراكتيۆتى تۇردە ەسكە الۋعا بولاتىن جوبالاردىڭ ءبىرى»، - دەپ اتاپ ءوتتى ق ر تاۋەلسىزدىگىنىڭ 30 جىلدىعى مەرەكەلىك ءىس-شارالارىن ۇيلەستىرۋ جونىندەگى جوبالىق كەڭسەنىڭ باسشىسى باعلان ايداشوۆ.
بارلىق قاتىسۋشىلاردىڭ ناتيجەلەرى، دۇرىس جاۋاپتار سانى مەن جۇمسالعان ۋاقىت نەگىزىندە ازىرلەنەتىن جالپى رەيتينگكە ەنگىزىلەدى. 11 قازانداعى مالىمەتتەگە سايكەس، ازىرگە ەڭ ۇزدىك ناتيجەنى عاليا ىسقاقوۆا كورسەتتى. ول بارلىق سۇراققا 1 مينۋت 40 سەكۋندتا دۇرىس جاۋاپ بەردى.
«مەن بۇل كۆيز تۋرالى قازاقستان تاريحشىلارىنىڭ ورتاق چاتىنان ءبىلىپ، وعان قاتىسامىن دەپ شەشتىم. تەست سۇراقتارى قىزىقتى، ولار تەك مەكتەپ باعدارلاماسى نەگىزىندە عانا ەمەس، سونىمەن بىرگە ادامنىڭ جالپى تانىمىن بىلۋگە نەگىزدەلگەن. مەن ءۇشىن ەڭ قيىن سۇراقتار پايىزعا بايلانىستى سۇراقتار بولدى. ءوزىمدى كەستەدە ءبىرىنشى ورىندا تۇرعانىمدى كورگەندە، ارينە، قۋاندىم! ال سەرتيفيكاتىمدى ساقتاپ، ءتىپتى ارىپتەستەرىمە دە جىبەرىپ ۇلگەردىم. وسى سياقتى تانىمدىق ءىس-شارالاردىڭ قاي-قايسىسى بولسا دا وسكەلەڭ ۇرپاق ءۇشىن وتە پايدالى دەپ ويلايمىن»، - دەيدى عاليا ىسقاقوۆا. ۇستاز 13 جىلدان استام ۋاقىت بويى اقمولا وبلىسى ەگىندىكول اۋدانى قورجىنكول اۋىلىنىڭ شاعىن جيناقتى مەكتەبىندە ساباق بەرىپ كەلەدى.
ەستەرىڭىزگە سالا كەتەيىك، ونلاين-تەست ق ر تاۋەلسىزدىگىنىڭ 30 جىلدىعى اياسىندا وتكىزىلەتىن، بارلىق ءىس-شارالار تۋرالى انونستار مەن جاڭالىقتار جاريالاناتىن، 30jyl.kz ارنايى سايتىندا ىسكە قوسىلدى. 30jyl.kz سايتىندا ەل تۇرعىندارى تاۋەلسىز قازاقستاننىڭ تاريحىن قانشالىقتى بىلە الاتىندىقتارىن تەكسەرە الادى. ايتا كەتەرلىگى، كۆيز سۇراقتارىن تاريحشىلار ازىرلەدى.
جىل سوڭىندا ەڭ ۇزدىك قاتىسۋشىلارعا ەستەلىك سىيلىقتار تابىستالادى. يگى باستامانى ق ر اقپارات جانە قوعامدىق دامۋ مينيسترلىگى جانىنداعى جوبالىق كەڭسە جۇزەگە اسىرادى جانە ول قازاقستان تاۋەلسىزدىگىنىڭ 30 جىلدىعىنا وراي قولعا الىنعان.
تەستتى مىنا سىلتەمە بويىنشا وتۋگە بولادى: https://30jyl.kz/ru/test/
