Tarihty bilýge qushtarlyq. Onlain-test 63 myń ret tapsyrylǵan
Qazaqstannyń jańa tarihyn bilýge arnalǵan onlain-test Táýelsizdiktiń 30 jyldyǵyna arnalǵan is-sharalar navigatory saitynda tamyz aiynda iske qosyldy. Onda KSRO ydyraǵannan keiingi respýblikanyń damý kezeńinen bastap, qazirgi kezeńge deiingi mańyzdy oqiǵalar jinaqtalǵan.
Sońǵy eki aidaǵy statistikaǵa sáikes, kviz qatysýshylary 21 suraqtyń ishinen 10 suraqtyń jaýabyn durys taba alyp júr. Qyrkúiekte test 47 myń ret nemese shamamen kúnine 1500 ret tapsyryldy. Testke Shyǵys Qazaqstan, Pavlodar jáne Aqmola oblystarynyń turǵyndary belsendi qatysty. Testten ótý qorytyndysy boiynsha árbir qatysýshy óziniń derbes onlain-sertifikatyn aldy.
«Onlain-testten ótken adamdardyń 70%-y 25 jasqa deiingi jastar ekendigi kóńil qýantady. Tarihi kviz – bul bizdiń elimizdiń qalyptasýy men damýynyń 30 jyldyq tarihyn interaktivti túrde eske alýǵa bolatyn jobalardyń biri», - dep atap ótti QR Táýelsizdiginiń 30 jyldyǵy merekelik is-sharalaryn úilestirý jónindegi jobalyq keńseniń basshysy Baǵlan Aidashov.
Barlyq qatysýshylardyń nátijeleri, durys jaýaptar sany men jumsalǵan ýaqyt negizinde ázirlenetin jalpy reitingke engiziledi. 11 qazandaǵy málimettege sáikes, ázirge eń úzdik nátijeni Ǵaliia Ysqaqova kórsetti. Ol barlyq suraqqa 1 minýt 40 sekýndta durys jaýap berdi.
«Men bul kviz týraly Qazaqstan tarihshylarynyń ortaq chatynan bilip, oǵan qatysamyn dep sheshtim. Test suraqtary qyzyqty, olar tek mektep baǵdarlamasy negizinde ǵana emes, sonymen birge adamnyń jalpy tanymyn bilýge negizdelgen. Men úshin eń qiyn suraqtar paiyzǵa bailanysty suraqtar boldy. Ózimdi kestede birinshi orynda turǵanymdy kórgende, árine, qýandym! Al sertifikatymdy saqtap, tipti áriptesterime de jiberip úlgerdim. Osy siiaqty tanymdyq is-sharalardyń qai-qaisysy bolsa da óskeleń urpaq úshin óte paidaly dep oilaimyn», - deidi Ǵaliia Ysqaqova. Ustaz 13 jyldan astam ýaqyt boiy Aqmola oblysy Egindikól aýdany Qorjynkól aýylynyń shaǵyn jinaqty mektebinde sabaq berip keledi.
Esterińizge sala keteiik, onlain-test QR Táýelsizdiginiń 30 jyldyǵy aiasynda ótkiziletin, barlyq is-sharalar týraly anonstar men jańalyqtar jariialanatyn, 30jyl.kz arnaiy saitynda iske qosyldy. 30jyl.kz saitynda el turǵyndary táýelsiz Qazaqstannyń tarihyn qanshalyqty bile alatyndyqtaryn teksere alady. Aita keterligi, kviz suraqtaryn tarihshylar ázirledi.
Jyl sońynda eń úzdik qatysýshylarǵa estelik syilyqtar tabystalady. Igi bastamany QR Aqparat jáne qoǵamdyq damý ministrligi janyndaǵy jobalyq keńse júzege asyrady jáne ol Qazaqstan Táýelsizdiginiń 30 jyldyǵyna orai qolǵa alynǵan.
Testti myna silteme boiynsha ótýge bolady: https://30jyl.kz/ru/test/
