قوستاناي وبلىسى بويىنشا ۇقك دەپارتامەنتى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ەربولات دوسپانوۆتى قىزمەتتىك وكىلەتتىگىن اسىرا پايدالاندى دەگەن كۇدىكپەن ۇستادى، دەپ حابارلايدى Dalanews.kz Kazinform-عا سىلتەمە جاساپ.
العاشقى اقپارات الەۋمەتتىك جەلىلەردە تاراعاننان كەيىن، جاعدايعا قاتىستى تۇسىنىكتەمە قوستاناي وبلىستىق پروكۋراتۋراسىنىڭ باسپا ءسوز قىزمەتىنەن بەرىلدى.
"قوستاناي وبلىسى بويىنشا كنب دەپارتامەنتى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ە. دوسپانوۆتىڭ ۇستالعانىن حابارلادى. ول قىزمەتتىك وكىلەتىن اسىرا پايدالانۋ فاكتىسى بويىنشا تىركەلگەن قىلمىستىق ءىس اياسىندا كۇدىكتى رەتىندە تانىلدى"، - دەلىنگەن رەسمي مالىمدەمەدە.
ۆەدومستۆو دەرەگىنشە، سوت دوسپانوۆقا قاتىستى بۇلتارتپاۋ شاراسىن، ياعني قاماۋعا الۋ تۇرىندە سانكسيالاعان.
قىلمىستىق ءىستىڭ وزگە ءمان-جايى جاريا ەتىلمەيدى. سەبەبى قىلمىستىق-پروسەسسۋالدىق كودەكستىڭ 201-بابىنا سايكەس، سوتقا دەيىنگى تەرگەۋ ماتەريالدارى جاريا ەتۋگە جاتپايدى.
ەسكە سالا كەتەيىك، بۇعان دەيىن قوستاناي وبلىسىنىڭ دەنساۋلىق ساقتاۋ باسقارماسىنىڭ بۇرىنعى باسشىسى دانيار جاندايەۆ تا سىبايلاس جەمقورلىققا بايلانىستى كۇدىكپەن ۇستالعان.
