"بايتەرەك" ۇلتتىق باسقارۋشى حولدينگى قازاقستان رەسپۋبليكاسىنىڭ ۇلتتىق قورى الدىنداعى مىندەتتەمەلەرىن مەرزىمىنەن بۇرىن وتەپ، 23،5 ملرد تەڭگەنى قايتاردى. حولدينگ بۇل شەشىم ونىڭ قارجىلىق ساياساتىنىڭ تيىمدىلىگىن جانە مەملەكەتتىك قاراجاتتى باسقارۋداعى جاۋاپكەرشىلىگىن كورسەتەتىنىن اتاپ ءوتتى، دەپ حابارلايدى Dalanews.kz.
ۇلتتىق قوردان بولىنگەن قاراجات 2014 جىلى جيىرما جىل مەرزىمگە تارتىلعان بولاتىن. قاراجات 2015–2019 جىلدارعا ارنالعان قازاقستاننىڭ يندۋستريالىق-يننوۆاسيالىق دامۋ مەملەكەتتىك باعدارلاماسى اياسىنداعى جوبالاردى قارجىلاندىرۋعا باعىتتالدى. مەحانيزم بويىنشا: ۇلتتىق قوردان بولىنگەن ءار 1 تەڭگەگە جەكە جانە نارىقتىق ينۆەستورلاردان 2 تەڭگە تارتۋ قاراستىرىلعان.
قارجىلاندىرۋ «قازاقستاننىڭ دامۋ بانكى» اق ارقىلى جۇزەگە اسىرىلدى. جالپى سانى ون ءۇش جوبا قولداۋ تاپتى. ولار – وڭدەۋ ونەركاسىبى، كولىك جانە ەلەكتر ەنەرگەتيكاسى سالالارىنداعى ماڭىزدى نىساندار. اتاپ ايتقاندا، رەلس-بالكا زاۋىتىنىڭ قۇرىلىسى، تەمىر جول دوڭگەلەكتەرىن شىعاراتىن ءوندىرىستى ىسكە قوسۋ، مينەرالدى تىڭايتقىشتار شىعاراتىن كاسىپورىندى جاڭعىرتۋ سەكىلدى جوبالار بار.
حولدينگتىڭ ەنشىلەس ۇيىمدارىنىڭ دەرەكتەرىنە سايكەس، جوبالار ايتارلىقتاي الەۋمەتتىك-ەكونوميكالىق ناتيجە بەرگەن: ءونىم شىعارۋ كولەمى 2016 جىلعى 16،2 ملرد تەڭگەدەن 2024 جىلى 390،9 ملرد تەڭگەگە دەيىن ءوستى. ەكسپورت كولەمى 0،17 ملرد تەڭگەدەن 99،5 ملرد تەڭگەگە جەتكەن. سونىمەن قاتار، 2،5 مىڭنان استام جاڭا جۇمىس ورنى اشىلدى.
حولدينگ باسشىلىعى «بايتەرەك» دامۋ ينستيتۋتى رەتىندەگى ميسسياسىن ورىنداۋدى جالعاستىرىپ، ەل ەكونوميكاسىن جاڭعىرتۋعا باعىتتالعان جوبالاردى قولداي بەرەتىنىن اتاپ ءوتتى.
