قازاقستان مۇسىلماندارى ءدىني باسقارماسى (قمدب) تۇركىستان وبلىسى سارىاعاش اۋدانىنداعى مەشىتتە بولعان وقيعاعا بايلانىستى رەسمي مالىمدەمە جاسادى، دەپ حابارلايدى Dalanews.kz.
قمدب مالىمەتىنشە، قوعامدا پىكىرتالاس تۋدىرعان ارەكەتكە جول بەرگەنى ءۇشىن مەشىت يمامىنا ەسكەرتۋ جاسالعان.
“مەشىت – قۇلشىلىق ءۇيى، جاماعات جينالاتىن رۋحاني وردا، قاسيەتتى مەكەن، تاربيە ورنى. قۇلشىلىق ۇيىنە كەلگەن ادام مەشىت ادەبىن ساقتاۋى ءتيىس. بۇل – مۇسىلماننىڭ كوركەم مىنەزىنىڭ ءبىر.
تۇركىستان وبلىسى سارىاعاش اۋدانىنداعى مەشىتتە بولعان وقيعا الەۋمەتتىك جەلىلەردە تاراپ، قوعامنىڭ ءتۇرلى پىكىر قايشىلىعىن تۋدىردى. وسىعان وراي قازاقستان مۇسىلماندارى ءدىني باسقارماسى قاسيەتتى ورىندا قوعام نارازىلىعىن تۋدىرعان ارەكەتكە جول بەرگەنى ءۇشىن مەشىت يمامىنا ەسكەرتۋ جاسادى.
قازاقستان مۇسىلماندارى ءدىني باسقارماسى ەلىمىزدەگى بارشا مۇسىلمان جاماعاتىن قۇلشىلىق ۇيلەرىندە داۋىس كوتەرىپ سويلەمەۋگە، ادەپسىز ارەكەتتەرگە جول بەرمەۋگە، ۇرىس-كەرىس جاساماۋعا شاقىرادى. جاماعاتتى بارىنشا مەشىت ادەبىن ساقتاۋعا ۇندەيمىز”، – دەلىنگەن قمدب مالىمدەمەسىندە.
ايتا كەتەيىك، بۇعان دەيىن الەۋمەتتىك جەلىلەردە سارىاعاش مەدرەسەسىنىڭ باس ۇستازى ءابدۋجاپپار سمانوۆتىڭ ارەكەتى جۇرتشىلىقتىڭ نارازىلىعىن تۋدىرعان ەدى. جۋرناليست وراز الىمبەك Facebook پاراقشاسىندا باس ۇستازدىڭ وقۋشىلارعا اياعىن ۋقالاتىپ وتىرعان ۆيدەوسىن جاريالاپ، ونىڭ ورىنسىز قىلىعى جايلى جازعان.
قازىرگى ۋاقىتتا بۇل وقيعا قوعامدا قىزۋ تالقىلانىپ جاتىر.
