تۇركىستان وبلىسىنىڭ اكىمى نۇرالحان كوشەروۆ گەرمانيانىڭ «Medal Holding GmbH» كومپانياسىنىڭ ديرەكتورى ءارى قۇرىلتايشىسى ءانۋار ۇمبەتايەۆپەن كەزدەستى، - دەپ حابارلايدى Dalanews.kz
كەزدەسۋدە قوس تاراپ ارىپتەستىكتى نىعايتۋ، ينۆەستيسيالىق جوبالاردى جۇزەگە اسىرۋ جولدارىن قاراستىرۋ جونىندە كەلىسسوز جۇرگىزدى. ءوڭىر باسشىسى تۇركىستان وبلىسىندا ينۆەستورلارعا قولايلى جاعداي جاسالعانىن جەتكىزىپ، بىرلەسە جۇمىس ىستەۋگە شاقىردى.
"تۇركىستان ءوڭىرىنىڭ ينۆەستيسيالىق الەۋەتىنە قىزىعۋشىلىق تانىتىپ، ارنايى كەلگەنىڭىزگە العىسىمدى بىلدىرەمىن. وبلىسىمىز بيزنەس جاساۋعا وتە قولايلى ءارى جۇمىس كۇشىمەن، ادام كاپيتالىمەن قامتىلعان. ايماقتان "باتىس ەۋروپا – باتىس جۇڭگو" حالىقارالىق ماگيسترالى وتەدى. ول دا كاسىپكەرلىكتى دامىتۋعا قوسىمشا مۇمكىندىك بەرەدى. اۋىل شارۋاشىلىعى، تۋريزم جانە قايتا وڭدەۋ سالالارى بويىنشا ينۆەستيسيالىق جوبالارعا باسىمدىق بەرىلگەن. جوبالاردى تالقىلاپ، بىرلەسە جۇمىس ىستەۋگە دايىنبىز"، – دەدى نۇرالحان كوشەروۆ.
گەرمانيالىق كومپانيا وكىلدەرى 2023 جىلى قوس مەملەكەتتىڭ پرەزيدەنتتەرىنىڭ قاتىسۋىمەن وتكەن قازاقستان-گەرمانيا بيزنەس-فورۋمىندا جاسالعان مەموراندۋم ارىپتەستىكتى نىعايتۋعا سەرپىن بەرگەنىن اتاپ ءوتتى. كومپانيا ەلەكتر ستانسياسىن سالۋ، قاتتى تۇرمىستىق قالدىقتاردى وڭدەۋ، قۇرىلىس ماتەريالدارىن شىعارۋ، قۇم، تاس، فوسفوريت ءوندىرۋ، زاماناۋي زاۋىتتار سالۋمەن جانە وزگە دە جوبالارمەن اينالىساتىنىن جەتكىزدى. قوس تاراپ ارىپتەستىكتى نىعايتىپ، جوبالاردى زەردەلەۋگە ۋاعدالاستى.
