Túrkistan oblysynyń ákimi Nuralhan Kósherov Germaniianyń «Medal Holding GmbH» kompaniiasynyń direktory ári quryltaishysy Ánýar Úmbetaevpen kezdesti, - dep habarlaidy Dalanews.kz
Kezdesýde qos tarap áriptestikti nyǵaitý, investitsiialyq jobalardy júzege asyrý joldaryn qarastyrý jóninde kelissóz júrgizdi. Óńir basshysy Túrkistan oblysynda investorlarǵa qolaily jaǵdai jasalǵanyn jetkizip, birlese jumys isteýge shaqyrdy.
"Túrkistan óńiriniń investitsiialyq áleýetine qyzyǵýshylyq tanytyp, arnaiy kelgenińizge alǵysymdy bildiremin. Oblysymyz biznes jasaýǵa óte qolaily ári jumys kúshimen, adam kapitalymen qamtylǵan. Aimaqtan "Batys Eýropa – Batys Qytai" halyqaralyq magistraly ótedi. Ol da kásipkerlikti damytýǵa qosymsha múmkindik beredi. Aýyl sharýashylyǵy, týrizm jáne qaita óńdeý salalary boiynsha investitsiialyq jobalarǵa basymdyq berilgen. Jobalardy talqylap, birlese jumys isteýge daiynbyz", – dedi Nuralhan Kósherov.
Germaniialyq kompaniia ókilderi 2023 jyly qos memlekettiń Prezidentteriniń qatysýymen ótken Qazaqstan-Germaniia biznes-forýmynda jasalǵan memorandým áriptestikti nyǵaitýǵa serpin bergenin atap ótti. Kompaniia elektr stantsiiasyn salý, qatty turmystyq qaldyqtardy óńdeý, qurylys materialdaryn shyǵarý, qum, tas, fosforit óndirý, zamanaýi zaýyttar salýmen jáne ózge de jobalarmen ainalysatynyn jetkizdi. Qos tarap áriptestikti nyǵaityp, jobalardy zerdeleýge ýaǵdalasty.
