2025 جىلى 7 ناۋرىزدا ۇلتتىق بانك بازالىق مٶلشەرلەمە دەڭگەيٸن 15,25 پايىزدان 16,50 پايىزعا دەيٸن بٸر-اق ٶسٸردٸ. مۇندايدى بٸر دە بٸر قارجىلىق ساراپتاما ورتالىعى ٶز بولجامدارىندا ايتپادى. ەرٸ كەتكەندە 100 بازيستٸك پۋنكت تۋرالى سٶز بولعان, ال كٶبٸسٸ, تٸپتٸ بازالىق مٶلشەرلەمەنٸ 50 بازيستٸك پۋنكتكە كٶتەرۋ ورىندى دەپ تاپقان. ۇلتتىق بانك مۇنداي ٶسٸمگە نە تٷرتكٸ ەكەنٸن جارييالاپ, سەبەپتەر تٸزٸمٸن دە اتاعان. الايدا كەيبٸر ساراپشىلاردىڭ وعان كٶڭٸلٸ تولماي وتىر, دەپ حابارلايدى Dalanews.kz.
Halyk Finance اعا ساراپشىسى مەدينا قابجالالوۆا بازالىق مٶلشەرلەمە بويىنشا ۇلتتىق بانكتٸڭ 125 بازيستٸك پۋنكتكە سەكٸرٸس جاسايتىنداي ناقتى, تولىققاندى فاكتورلاردى بايقاي الماي وتىرعاندارىن ايتادى. بۇل تۋرالى مامان 24kz پورتالىنىڭ "دنەۆنايا سمەنا" باعدارلاماسىنا بەرگەن سۇقباتىندا ايتتى.
"بازالىق مٶلشەرلەمە دەڭگەيٸن كٶتەرۋدە كٷتٸلەتٸن باستى نەرسە – تۇتىنۋشىلىق سۇرانىس كٶلەمٸن شەكتەۋ. ياعني, ادامداردىڭ از اقشا جۇمساۋىن ىنتالاندىرۋ ارقىلى باعا ٶسٸمٸن اۋىزدىقتاۋ كٶزدەلەدٸ. بٸز اقپان ايىنداعى ينفلياتسييا ٶسٸمٸنە سٷيەنە وتىرىپ, "ۇلتتىق بانك بازالىق مٶلشەرلەمەنٸ ەرٸ كەتكەندە 25-50 بازيستٸك پۋنكتكە كٶتەرەدٸ" دەپ بولجاعان بولاتىنبىز. بٸراق, ٶزدەرٸڭٸز كٶرٸپ وتىرعاندارىڭىزداي, ۇلتتىق بانك 125 بازيستٸك پۋنكتكە سەكٸرٸس جاسادى. ورتالىق بانك تاراتقان تٷسٸنٸكتەمەلەردٸ قاراي وتىرىپ, بٸز ودان وسىنشا دەڭگەيگە سەكٸرٸس جاسايتىنداي ناقتى, تولىققاندى فاكتوردى بايقاي المادىق. بٸرٸنشٸدەن, فيسكالدى ساياساتتىڭ قىسىمى كٷشەيگەنٸ العا تارتىلادى. بٸز مۇنىمەن كەلٸسەمٸز. بٸزدٸڭ ەلٸمٸز تسيكلدٸ كەزەڭدەردٸ قامتيتىن فيسكالدى ساياساتقا سٷيەنەدٸ. ياعني, مۇندايدا مەملەكەتتٸك شىعىندار باعا ٶسٸمٸنە, ينفلياتسيياعا قاتتى ەسەر ەتەدٸ. ەرينە, بۇل رەتتە شەكتەۋ شارالارى كەرەك, كونترتسيكلدٸ ساياسات جٷرگٸزۋ قاجەت. ۇلتتىق بانكتٸڭ بۇل مەسەلەنٸ قاۋزاپ وتىرۋى ورىندى, الايدا بۇل باعىتتا بٸز قانداي دا بٸر ٶزگەرٸستەردٸ بايقاپ وتىرعانىمىز جوق. مەملەكەتتٸك شىعىن جوعارى قارقىنمەن جىلدان جىلعا ٶسكەننٸڭ ٷستٸنە ٶسٸپ جاتىر. ەكٸنشٸدەن, جانار-جاعارماي باعالارى ٶسٸمٸ تۋرالى ايتىلدى. بۇل جارييا جٷرگٸزٸلٸپ وتىرعان شارانىڭ بٸرٸ. جىل بويىندا ايىنا 4-5 پايىزدان باعادا ٶسٸم بولاتىنى بەلگٸلٸ. ٷشٸنشٸدەن, كوممۋنالدىق تٶلەمدەر. راسىندا, تاريفتەر توقتاۋسىز ٶسٸپ جاتىر, بٸراق بازالىق مٶلشەرلەمەگە ونىڭ ەش قاتىسى جوق. تٶرتٸنشٸدەن, رەسەيدەگٸ قىمباتشىلىق تۋرالى ايتىلىپتى. ونىڭ بٸزگە نە قاتىسى بار دەيمٸن? اراداعى شەكتەۋلٸ تاۋار اينالىمى باعالارعا ەسەلەپ ەسەر ەتەدٸ دەگەنگە نەگٸز جوق قوي... بەسٸنشٸدەن, تۇتىنۋشىلىق نەسيە. بۇل دا كەرەمەت جاڭالىق ەمەس. ول جىلدان جىلعا ٶسە بەرەدٸ. ينفلياتسييا الدى كٷتۋلەر تۋرالى دا سٶز بولدى... بٸر سٶزبەن ايتقاندا, بۇل ارادا بازالىق مٶلشەرلەمەنٸ 125 بازيستٸك پۋنكتكە كٶتەرەتٸندەي بٸز ناقتى ەرٸ تولىققاندى فاكتوردى كٶرٸپ وتىرعانىمىز جوق", - دەدٸ ول ٶز سۇقباتىندا.
بۇل ساۋالعا قر ۇلتتىق بانكتٸڭ اقشا-نەسيە ساياساتى جٶنٸندەگٸ كوميتەتتٸڭ مٷشەسٸ رٷستەم ورازالين جاۋاپ بەرۋگە تىرىسىپ كٶردٸ.
ونىڭ ايتۋىنشا, بۇلايشا بازالىق مٶلشەرلەمەنٸ كٶتەرۋ الداعى تەۋەكەلدەردٸ ەسكەرە وتىرىپ, الدىن الا جاسالعان قادام.
"بۇل ارادا ۇلتتىق بانك ينفلياتسييانى رەتتەپ, ونى باسقارۋدى ماقسات ەتەدٸ. ال ينفلياتسييا جىلدىق سيپاتتا تارگەتتەلەدٸ. يە, جىلدىق ينفلياتسييا كٶپتەگەن مەلٸمەتتەردٸ بەرە الادى. ال ايلىق ينفلياتسييا بٸزدٸڭ تارگەتتٸمٸز بويىنشا قالاي جىلجيدى, ول جاعى بەيمەلٸم عوي. ماڭىزدىسى وسى اراسى. ياعني, بازالىق مٶلشەرلەمەنٸ بٸز الداعى بولجامداردى ەسكەرە وتىرىپ, كٶتەردٸك", - دەيدٸ ول.
ايتا كەتسەك, 7 ناۋرىزدا ۇلتتىق بانك بازالىق مٶلشەرلەمەنٸ بٸردەن 125 بازيستٸك پۋنكتكە بٸر-اق كٶتەردٸ. مۇندايدى بٸر دە بٸر قارجىلىق ساراپاتاما ورتالىعى بولجاي المادى. بولجامداردا 100 بازيستٸك پۋنكت تۋرالى سٶز بولعان, ال كٶبٸسٸ بازالىق مٶلشەرلەمەنٸ 50 بازيستٸك پۋنكتكە كٶتەرۋ ورىندى دەپ تاپقان. سونداي-اق وسى تاقىرىپقا قاتىستى سايتىمىزدا "قارجىگەر-مامان الداعى ەكٸ جىل حالىق پەن بيزنەسكە قيىن تيەتٸنٸن بولجادى" دەگەن ماتەريال جارييالاندى.
