تۇركىستان وبلىسى اكىمىنىڭ ورىنباسارى نۇربول تۇراشبەكوۆتىڭ توراعالىعىمەن تۇركىستان وبلىسىنداعى مۇناي ونىمدەرى نارىعىنداعى جاعداي بويىنشا وڭىرلىك شتاب وتىرىسى ءوتتى، - دەپ حابارلايدى Dalanews.kz
وڭىردە جانار-جاعارمايدىڭ زاڭسىز تاسىمالىن شەكتەۋ، جانار-جاعارماي بەكەتتەرىندە مۇناي ونىمدەرىنىڭ جاساندى تاپشىلىعىنا جول بەرمەۋ ماقساتىندا وبلىس اكىمىنىڭ تاپسىرماسىنا سايكەس قۇرىلعان جۇمىسشى توپ تۇراقتى تۇردە رەيدتىك شارالار وتكىزىپ كەلەدى.
كاسىپكەرلىك جانە ونەركاسىپ باسقارما باسشىسىنىڭ ورىنباسارى نۇرگۇل ءابدرازاقوۆانىڭ مالىمدەۋىنشە، شەكارالىق ايماقتاردا اۋداندىق پروكۋراتۋرا جانە كەدەن بەكەتىنىڭ قىزمەتكەرلەرىمەن بىرلەسە وتكىزگەن رەيد بارىسىندا سارىاعاش قالاسىندا «قاپلانبەك» كەدەن بەكەتىنە جاقىن ورنالاسقان ءبىرقاتار جانار-جاعارماي بەكەتىندە تەحنيكالىق قاۋىپسىزدىك شارالارىنىڭ ساقتامالماعانى انىقتالىپ، جاۋاپتى باسشىلارىنىڭ تۇسىنىكتەمەلەرى الىندى.
سونداي-اق، 10 ليترلىك قۇتىلارمەن اي-92 ماركالى بەنزينىن شەكارادان وتكىزبەكشى بولعان جاعدايعا قاتىستى ءتيىستى شارالار قابىلداندى.
قاڭتار-اقپان ايلارىندا جۇرگىزىلگەن رەيد ناتيجەسىمەن 15 جەڭىل كولىك جانە 2 اۆتوبۋس ايىپ تۇراعىنا قويىلىپ، قۇجاتتارى سوتقا وتكىزىلگەن بولاتىن. قازىرگى تاڭدا، سوت ءۇش كولىككە شەشىم شىعارىپ، زاڭ اياسىندا جاۋاپكەرشىلىك بەلگىلەدى.
وبلىس اكىمىنىڭ ورىنباسارى اۋدان اكىمدەرىنىڭ ورىنباسارلارىنا زاڭ اياسىندا ارەكەت ەتىپ، جانار-جاعارماي بەكەتتەرىنە باقىلاۋدى كۇشەيتۋدى تاپسىردى.
«ءجىپ جىڭىشكە جەرىنەن ۇزىلەدى. شەكارالى ايماقتاردىڭ «جىڭىشكەرۋىنە» جول بەرمەۋ - ءبارىمىزدىڭ ازاماتتىعىمىزعا سىن. قازاقتا ءسوز بار، «ساۋداگەر قۇنىقسا ساقالىن كۇزەپ ساتادى» دەگەن. ءبىز ەڭ الدىمەن ىشكى نارىقتاعى قاجەتتىلىكتى قامتاماسىز ەتۋدى ويلانعانىمىز ابزال. پايدا ويلاماي، اردى ويلايىق، ازاماتتار»، - دەدى نۇربول تۇراشبەكوۆ.
جىل باسىنان بەرى اتقارىلعان جۇمىستىڭ ناتيجەسىندە جانار-جاعارمايدى زاڭسىز تاسىمالداعان 140 دەرەك تىركەلىپ، 5،9 تن. بەنزين، 5،6 تن. ديزەل وتىنى تاركىلەندى.
