Túrkistan oblysy ákiminiń orynbasary Nurbol Turashbekovtiń tóraǵalyǵymen Túrkistan oblysyndaǵy munai ónimderi naryǵyndaǵy jaǵdai boiynsha óńirlik shtab otyrysy ótti, - dep habarlaidy Dalanews.kz
Óńirde janar-jaǵarmaidyń zańsyz tasymalyn shekteý, janar-jaǵarmai beketterinde munai ónimderiniń jasandy tapshylyǵyna jol bermeý maqsatynda oblys ákiminiń tapsyrmasyna sáikes qurylǵan jumysshy top turaqty túrde reidtik sharalar ótkizip keledi.
Kásipkerlik jáne ónerkásip basqarma basshysynyń orynbasary Nurgúl Ábdrazaqovanyń málimdeýinshe, shekaralyq aimaqtarda aýdandyq prokýratýra jáne keden beketiniń qyzmetkerlerimen birlese ótkizgen reid barysynda Saryaǵash qalasynda «Qaplanbek» keden beketine jaqyn ornalasqan birqatar janar-jaǵarmai beketinde tehnikalyq qaýipsizdik sharalarynyń saqtamalmaǵany anyqtalyp, jaýapty basshylarynyń túsiniktemeleri alyndy.
Sondai-aq, 10 litrlik qutylarmen AI-92 markaly benzinin shekaradan ótkizbekshi bolǵan jaǵdaiǵa qatysty tiisti sharalar qabyldandy.
Qańtar-aqpan ailarynda júrgizilgen reid nátijesimen 15 jeńil kólik jáne 2 avtobýs aiyp turaǵyna qoiylyp, qujattary sotqa ótkizilgen bolatyn. Qazirgi tańda, sot úsh kólikke sheshim shyǵaryp, zań aiasynda jaýapkershilik belgiledi.
Oblys ákiminiń orynbasary aýdan ákimderiniń orynbasarlaryna zań aiasynda áreket etip, janar-jaǵarmai beketterine baqylaýdy kúsheitýdi tapsyrdy.
«Jip jińishke jerinen úziledi. Shekaraly aimaqtardyń «jińishkerýine» jol bermeý - bárimizdiń azamattyǵymyzǵa syn. Qazaqta sóz bar, «Saýdager qunyqsa saqalyn kúzep satady» degen. Biz eń aldymen ishki naryqtaǵy qajettilikti qamtamasyz etýdi oilanǵanymyz abzal. Paida oilamai, ardy oilaiyq, azamattar», - dedi Nurbol Turashbekov.
Jyl basynan beri atqarylǵan jumystyń nátijesinde janar-jaǵarmaidy zańsyz tasymaldaǵan 140 derek tirkelip, 5,9 tn. benzin, 5,6 tn. dizel otyny tárkilendi.
