ولار ۇشاقتان تۇسكەن بويدا قالا ىرگەسىندەگى ينفەكسيالىق كلينيكاعا جەتكىزىلگەن. مۇندا كۇنى-تۇنى دارىگەرلەردىڭ باقىلاۋىندا بولعانداردان ءقاۋىپتى كوروناۆيرۋس بەلگىلەرى بايقالماپتى.
سوندىقتان بارلىعى دا ەندى تۇرعىلىقتى مەكەن-جايىندا باقىلاۋدا بولادى. قىسقا مەرزىمگە كارانتينگە جاتقىزىلعانداردىڭ كوپشىلىگى وزگە قالا تۇرعىندارى.
سوندىقتان ولاردى ارنايى اۆتوبۋستارمەن تەمىرجول ۆوكزالى، اۋەجاي مەن اۆتوۆوكزالدارعا دەيىن جەتكىزىپ سالدى. سومكەسىن سۇيرەپ، جۇگىن ارقالاعان جاستاردىڭ كوپشىلىگى قىتايدا وقىپ جۇرگەن ستۋدەنتتەر.
ولار جۇقپالى ىندەت اۋىزدىقتالعانشا ەلدە بولماق. ويتكەنى ينفەكسيا جايلاعان كورشى ەلدىڭ بارلىق قالاسىندا «تىرشىلىك توقتاپ قالعانداي» دەيدى امان-ەسەن ەلگە كەلگەندەر.
ماسەلەن، ستۋدەنتتەردىڭ بارلىعىن جاتاقحاناعا قاماپ تاستاعان. كوشەگە 2-3 كۇندە ءبىر-اق رەت شىعۋعا رۇقسات بەرىلىپتى.
– مەن ءوز ۋنيۆەرسيتەتىمدە ەڭ سوڭعى قازاق ستۋدەنتى بولعام. بىزدە 300 قازاق وقيدى. 300 قازاقتان ەڭ سوڭعىسى بولىپ مەن ورالدىم. وتە قورقىنىشتى. ءبىزدىڭ جاتاق بولمەلەرىمىزدى جاۋىپ تاستادى. ازىق-تۇلىك پەن كەرەك زاتتارىمىزدى اپايلار ارقىلى الىپ وتىردىق. بارلىعى ۇرەي قۇشاعىندا. ءبىراق وسى ۋاقىتقا دەيىن قازاق ستۋدەنتى نەمەسە قازاق ازاماتى اۋىردى دەگەندى ەستىگەن جوقپىن، – دەيدى قازاق ستۋدەنتى تاڭشولپان شۇعاتايەۆا.
