نۇرسۇلتان نازاربايەۆتىڭ ءبىلىم بەرۋ قورى قازاقستان-بريتان تەحنيكالىق ۋنيۆەرسيتەتىنە (قبتۋ) باقىلاۋدى قايتادان يەلەندى، دەپ حابارلايدى Dalanews.kz.
قوعامدىق NNEF قورى، ونىڭ قۇرىلتايشىلارىنىڭ ءبىرى - دينارا قۇلىبايەۆا، 2025 جىلدىڭ قىركۇيەك ايىندا قبتۋ-دىڭ اكسيونەرى اتاندى. بۇعان دەيىن ۋنيۆەرسيتەت قايتارىلعان اكتيۆتەردى باسقارۋ كومپانياسىنىڭ مەنشىگىندە بولعان.
اكسيونەردىڭ اۋىسقانى تۋرالى اقپارات قارجىلىق ەسەپتىلىك دەپوزيتارييىنىڭ رەسمي سايتىندا جاريالانعان.
كورپوراتيۆتىك وقيعالار جونىندەگى وزگە ءبىر ەسەپتە قبتۋ عيماراتىنىڭ مەملەكەت مەنشىگىنە بەرىلگەنى كورسەتىلگەن.
جاريالانعان اكسيونەر شەشىمىندە:
«1957 جىلى سالىنعان، رەسپۋبليكالىق ماڭىزى بار تاريح جانە مادەنيەت ەسكەرتكىشى سانالاتىن، الماتى قالاسى تولە بي كوشەسى، 59 مەكەنجايىندا ورنالاسقان “قبتۋ” اق-نىڭ اكىمشىلىك عيماراتىن سىيعا تارتۋ شارتى جاسالىپ، قابىلداۋ-تاپسىرۋ اكتىسىنە قول قويۋ ارقىلى مەملەكەتكە بەرۋ. اتالعان عيماراتتى سەنىمگەرلىك باسقارۋعا بەرۋ تۋرالى شارت جاساسۋدى باستاۋ»، - دەلىنگەن.
وسىلايشا ۋنيۆەرسيتەت عيماراتى مەملەكەت بالانسىنا وتسە، ال ءبىلىم بەرۋ قىزمەتى مەن ۋنيۆەرسيتەتتىڭ كورپوراتيۆتىك باسقارۋى قايتادان نازاربايەۆ قورىنىڭ قۇرىلىمىنا قاراستى بولىپ وتىر.
قازىرگى تاڭدا اتالعان شەشىمگە بايلانىستى مەملەكەتتىك ورگاندار تاراپىنان قوسىمشا تۇسىنىكتەمە بەرىلگەن جوق.
