ساۋدا جانە ينتەگراسيا مينيسترلىگى قارجى مينيسترلىگى جانە «قازاقتەلەكوم» كومپانياسىمەن بىرلەسىپ، جەلتوقسان ايىندا «اتامەكەن» ۇكپ الاڭىندا بيزنەس وكىلدەرىمەن كەڭەيتىلگەن كەزدەسۋلەر وتكىزدى. تالقىلاۋلار بارىسىندا تاۋارلاردى تىركەۋ، POS-تەرمينالدار، جۇيەلەردى ينتەگراسيالاۋ سەكىلدى ماسەلەلەر قارالىپ، كاسىپكەرلەرگە تولىق تۇسىندىرمەلەر بەرىلدى.

 

كەلىسسوزدەر ناتيجەسىندە ساۋدا جانە ينتەگراسيا مينيسترلىگى، قارجى مينيسترلىگى جانە «اتامەكەن» ۇكپ ۇلتتىق تاۋارلار كاتالوگىن كەزەڭ-كەزەڭىمەن ەنگىزۋ تۋرالى مەموراندۋمعا قول قويدى. قۇجاتتا نارىقتىڭ، مەملەكەتتىك سەرۆيستەر مەن اقپاراتتىق جۇيەلەردىڭ دايىندىعىن ەسكەرە وتىرىپ، ورتاق ءتاسىل بەكىتىلدى.

 

مەموراندۋمعا سايكەس، 2026 جىلعى 1 قاڭتاردان باستاپ اكىمشىلىك جاۋاپكەرشىلىك قولدانىلمايدى. بۇل بيزنەستىڭ الاڭداۋشىلىعىن ازايتۋ جانە ۇلتتىق تاۋارلار كاتالوگىنىڭ مەملەكەتتىك دەرەكقورىن سىناقتان وتكىزۋ كەزەڭىن اياقتاۋ ءۇشىن جاسالدى. كاسىپكەرلىك قىزمەت ەشقانداي شەكتەۋسىز جالعاسادى.

 

تالاپتار 2026 جىلى مىناداي تارتىپپەن ەنگىزىلەدى:

•يمپورتتاۋشىلار مەن وتاندىق وندىرۋشىلەر ءۇشىن – 2026 جىلعى 1 ناۋرىزعا دەيىن

•ساۋدا جەلىلەرى ءۇشىن – 2026 جىلعى 1 ساۋىرگە دەيىن

•شاعىن جانە ميكروبيزنەس، ونىڭ ىشىندە «ءۇي جانىنداعى دۇكەندەر» ءۇشىن – 2026 جىلعى 1 شىلدەگە دەيىن

 

مۇنداي ءتاسىل بيزنەس-پروسەستەردىڭ بەيىمدەلۋىنە ۋاقىت بەرىپ، بارلىق قاتىسۋشىلار ءۇشىن تالاپتاردى ءبىر مەزەتتە ەنگىزۋدەن تۋىندايتىن تاۋەكەلدەردى ازايتۋدى كوزدەيدى.