Qazaqstanda Ulttyq taýarlar "katalogyn" engizý bizneske qysymsyz, birtindep júzege asady, dep habarlaidy Dala News.
Saýda jáne integratsiia ministrligi Qarjy ministrligi jáne «Qazaqtelekom» kompaniiasymen birlesip, jeltoqsan aiynda «Atameken» UKP alańynda biznes ókilderimen keńeitilgen kezdesýler ótkizdi. Talqylaýlar barysynda taýarlardy tirkeý, POS-terminaldar, júielerdi integratsiialaý sekildi máseleler qaralyp, kásipkerlerge tolyq túsindirmeler berildi.
Kelissózder nátijesinde Saýda jáne integratsiia ministrligi, Qarjy ministrligi jáne «Atameken» UKP Ulttyq taýarlar katalogyn kezeń-kezeńimen engizý týraly memorandýmǵa qol qoidy. Qujatta naryqtyń, memlekettik servister men aqparattyq júielerdiń daiyndyǵyn eskere otyryp, ortaq tásil bekitildi.
Memorandýmǵa sáikes, 2026 jylǵy 1 qańtardan bastap ákimshilik jaýapkershilik qoldanylmaidy. Bul biznestiń alańdaýshylyǵyn azaitý jáne Ulttyq taýarlar katalogynyń memlekettik derekqoryn synaqtan ótkizý kezeńin aiaqtaý úshin jasaldy. Kásipkerlik qyzmet eshqandai shekteýsiz jalǵasady.
Talaptar 2026 jyly mynadai tártippen engiziledi:
•Importtaýshylar men otandyq óndirýshiler úshin – 2026 jylǵy 1 naýryzǵa deiin
•Saýda jelileri úshin – 2026 jylǵy 1 sáýirge deiin
•Shaǵyn jáne mikrobiznes, onyń ishinde «úi janyndaǵy dúkender» úshin – 2026 jylǵy 1 shildege deiin
Mundai tásil biznes-protsesterdiń beiimdelýine ýaqyt berip, barlyq qatysýshylar úshin talaptardy bir mezette engizýden týyndaityn táýekelderdi azaitýdy kózdeidi.
