كونستيتۋسيالىق كەڭەستىڭ ەكىنشى وتىرىسىندا قازاقستاننىڭ جاڭا كونستيتۋسياسىندا ءسوز بوستاندىعى مەن بەيبىت جينالىستار ەركىندىگىن شەكتەۋ جونىندە ۇسىنىس ايتىلدى، دەپ حابارلايدى Dalanews.kz.
كونستيتۋسيالىق رەفورما اياسىندا ۇسىنىلعان تۇزەتۋلەردى ءماجىلىس دەپۋتاتى سنەجانا يماشيەۆا تانىستىردى. ونىڭ ايتۋىنشا، كونستيتۋسياعا قوسىمشا شەكتەۋ ەنگىزۋ كوزدەلىپ وتىر.
"قوسىمشا كونستيتۋسيالىق شەكتەۋ ەنگىزىلەدى - ءسوز بوستاندىعى وزگە ادامداردىڭ ار-نامىسى مەن قادىر-قاسيەتىنە، قوعامنىڭ رۋحاني-ادامگەرشىلىك قۇندىلىقتار جۇيەسىنە، قوعامدىق تارتىپكە نۇقسان كەلتىرمەۋى ءتيىس. سونداي-اق زورلىق-زومبىلىقتى، سوعىستى جانە الاۋىزدىقتى ناسيحاتتاۋ مەن وعان ارانداتۋعا تىيىم سالۋ ءتىزىمى كەڭەيتىلەدى. سەنزۋراعا تىيىم سالۋ دەربەس كونستيتۋسيالىق كەپىلدىك رەتىندە ساقتالادى"، - دەدى دەپۋتات.
سونىمەن قاتار، بەيبىت ميتينگىلەردى ۇيىمداستىرۋدان باس تارتۋعا نەگىز بولاتىن سەبەپتەردىڭ ءتىزىمىن كەڭەيتۋ ماسەلەسى دە تالقىلانىپ جاتىر.
"ازاماتتاردىڭ بەيبىت جينالىستارعا قۇقىعى تۋرالى باپقا دا ناقتىلاۋلار ۇسىنىلادى. بۇل قۇقىقتى زاڭمەن شەكتەۋگە بولاتىن نەگىزدەر كەڭەيتىلەدى. ماقساتتار تىزىمىنە: كونستيتۋسيالىق قۇرىلىستىڭ نەگىزدەرىن قورعاۋ، ۇلتتىق قاۋىپسىزدىكتى قامتاماسىز ەتۋ جانە قوعامنىڭ رۋحاني-ادامگەرشىلىك قۇندىلىقتار جۇيەسىن ساقتاۋ ەنگىزىلەدى"، - دەدى يماشيەۆا.
دەپۋتاتتىڭ پىكىرىنشە، بۇل وزگەرىستەر بەيبىت جينالىس بوستاندىعىن قوعامدىق جانە مەملەكەتتىك مۇددەلەرمەن تەڭەستىرۋ كەزىندە قۇقىقتىق ايقىندىقتى كۇشەيتۋگە باعىتتالعان.
سونىمەن قاتار، كونستيتۋسيا نورمالارىن ناقتىلاۋ ارقىلى ادام قادىر-قاسيەتىن عانا ەمەس، ونىڭ ار-نامىسىن - ياعني جاقسى اتى مەن قوعامدىق بەدەلىن قورعاۋ دا كوزدەلىپ وتىر.
"زاڭمەن قورعالادى" دەگەن سوزدەردىڭ قوسىلۋى بۇل نورمانىڭ مازمۇنىن اناعۇرلىم پراكتيكالىق سيپاتقا جەتكىزەدى. بۇل جاي عانا قاعيدا ەمەس، مەملەكەتتىڭ ادامدى، ونىڭ قادىر-قاسيەتى مەن ار-نامىسىن ءتيىمدى قورعاۋدى قامتاماسىز ەتۋ جونىندەگى تىكەلەي مىندەتىنە اينالادى"، - دەپ تۇيىندەدى دەپۋتات.
