قازاقستاندىق ادۆوكاتتار قىلمىستىق قۋدالاۋ مەن قىسىم كورسەتىلىپ جاتقانىن ايتىپ، بۇل ارەكەتتەردىڭ ارتىندا قىرعىزستاندا ىزدەۋدە جۇرگەن بيزنەسمەن ياسىنجان تايروۆ تۇر دەگەن مالىمدەمە جاسادى، دەپ حابارلايدى Dalanews.kz KazTAG-قا سىلتەپ.
ادۆوكات ەلميرا اپپاسوۆانىڭ ايتۋىنشا، ادۆوكاتتىق قىزمەتكە زاڭسىز ارالاسۋ قازاقستان زاڭناماسى بويىنشا جاۋاپكەرشىلىككە اكەپ سوعاتىنىنا قاراماستان، قۇقىق قورعاۋ ورگاندارى بۇل تالاپتاردى ەلەمەي وتىر.
"ءبىز ياسىنجان تايروۆپەن كەزدەسىپ، ونىڭ نە سەبەپتى شاعىم تۇسىرگەنىن انىقتادىق. ول ءبىزدى بۇرىن تانىماسا دا، مۇلكىمىزدى ساتقىزىپ، 1 ميلليون دوللار تالاپ ەتكەن. بۇل رەيدەرلىك ارەكەتكە ونىڭ ءوزى مەن باۋىرى الماز يبراگيموۆتىڭ ىقپالىمەن تەرگەۋشىلەر كومەكتەسىپ جاتىر"، - دەدى اپپاسوۆا الماتىداعى ۇلتتىق باسپا ءسوز كلۋبىندا وتكەن باسپا ءسوز ءماسليحاتىندا.
كەلىسىمنەن كەيىنگى قىسىم
ادۆوكاتتاردىڭ ايتۋىنشا، جانجال استانا ادۆوكاتتار القاسىنىڭ مۇشەسى ءلاززات جانسەيتوۆا مەن ونىڭ كليەنتى ياسىنجان تايروۆ اراسىنداعى كەلىسىمنەن باستالعان. باستاپقىدا كاسىپكەر ادۆوكاتپەن رەسمي كەلىسىمشارت جاساسىپ، قىزمەتىنە اقى تولەگەن. الايدا كوپ ۇزاماي ادۆوكاتقا قارسى نەگىزسىز تالاپتار قويا باستاعان.
"تايروۆ قىرعىزستاندا ىزدەۋدە جۇرگەن ادام. بەيرەسمي دەرەككوزدەرگە قاراعاندا، ول سول ەلدەگى بەلگىلى قىلمىستىق توپتاردىڭ مۇشەسى بولعان. الايدا ءبىزدىڭ كوشى-قون قىزمەتتەرى بۇل دەرەكتەردى تەكسەرمەستەن، وعان قازاقستان ازاماتتىعىن بەرىپ وتىر"، - دەدى قۇقىق قورعاۋشى، پرەزيدەنت جانىنداعى ايەلدەر ىستەرى جونىندەگى ۇلتتىق كوميسسيا مۇشەسى ايمان وماروۆا.
ونىڭ ايتۋىنشا، كەيىن ادۆوكات جانسەيتوۆا اتالعان تالاپتار بويىنشا قۇقىق قورعاۋ ورگاندارىنا ارىز تۇسىرگەنىمەن، بۇل شاعىم تىركەلمەگەن.
ادۆوكاتتاردى جاۋاپقا تارتۋ ارەكەتى
ادۆوكاتتار كاسىپكەر مەن ونىڭ تانىستارى اراسىندا بولعان اقشا الماسۋ ادۆوكاتقا ەش قاتىسى جوعىن ايتقانىمەن، قۇقىق قورعاۋ ورگاندارى جانسەيتوۆانى الاياقتىق جاسادى دەپ ايىپتاپ وتىر.
"تەرگەۋشىلەر امانتاي مەن ابجانوۆ ادۆوكاتتىڭ كەڭسەسىن تىنتۋگە سانكسيا الىپ، ونىڭ ادۆوكات ەكەنىن كورسەتپەگەن. بۇل - زاڭ بۇزۋشىلىق"، - دەدى وماروۆا.
ادۆوكاتتاردىڭ مالىمدەۋىنشە، 8 مامىردا جانسەيتوۆانىڭ پاتەرى مەن كەڭسەسىندە ءتىنتۋ جۇرگىزىلگەن. قۇقىق قورعاۋشىلار پاتەرگە كىرمەس بۇرىن ەسىك الدىندا بەلگىسىز ۇنتاق سالىنعان پاكەت تاستاماق بولعان. جانسەيتوۆا كۇمان تۋدىرعان ادامدى سىرتقا شىعارىپ جىبەرگەن.
ادۆوكاتتارعا جاسالعان قىسىم
باسپا ءسوز ءماسليحاتىنا قاتىسقان زاڭگەرلەر ادۆوكاتتىڭ ارىپتەستەرى مەن تۋىستارىنا دا قىسىم كورسەتىلگەنىن ايتتى. كەڭسەلەر زاڭسىز ءتىنتىلىپ، ىستەرگە قاتىسى جوق قۇجاتتار الىنىپ، ادۆوكاتتىق قۇپيا بۇزىلعان.
ادۆوكاتتارعا ق ر قىلمىستىق كودەكسىنىڭ 407-بابى بويىنشا - «دوسۋدەبتىك تەرگەۋگە كەدەرگى كەلتىرۋ» دەرەگىمەن ءىس قوزعالعان.
مەملەكەت تاراپىنان قورعاۋ جوق
ادۆوكات ءلاززات جانسەيتوۆا زاڭسىز قۋدالاۋعا قاتىستى شاعىم ءتۇسىرىپ، رەسپۋبليكالىق ادۆوكاتتار القاسىنىڭ كاسىبي قۇقىقتاردى قورعاۋ كوميسسياسى تەكسەرىس جۇرگىزگەن. كوميسسيا ادۆوكاتتاردىڭ قۇقىقتارى ورەسكەل بۇزىلعانىن انىقتادى.
كوميسسيانىڭ قورىتىندىسىندا تەرگەۋ سۋدياسىنىڭ سانكسياسىسىز ادۆوكات كەڭسەسىن ءتىنتۋ زاڭعا قايشى ەكەنى، ادۆوكاتتىق قۇپيانى قورعاۋ نورمالارى بۇزىلعانى، پوليسيا تاراپىنان وكىلەتتىلىكتى اسىرا پايدالانۋ مەن زاڭدى قىزمەتكە كەدەرگى كەلتىرۋ دەرەكتەرى ورىن العانى ايتىلعان.
"قۇقىق قورعاۋ ورگاندارىنىڭ بۇل ارەكەتتەرىنەن كەيىن ءبىز، ادۆوكاتتار، مەملەكەتتىڭ زاڭدى قورعاۋىنان تىس قالعانىمىزدى تۇسىندىك. بۇگىندە ءبىزدىڭ زاڭدى قىزمەتىمىزگە كەدەرگى كەلتىرىلىپ جاتىر. ءبىز قۇقىق قورعاۋ جۇيەسىنىڭ الدىندا دارمەنسىز قالدىق"، - دەدى استانا ادۆوكاتتار القاسىنىڭ مۇشەسى ارمان جانسەيتوۆ.
