پرەمەر-مينيستر ولجاس بەكتەنوۆ تۋريستىك سالانى دامىتۋعا قاتىستى مەملەكەت باسشىسى قاسىم-جومارت توقايەۆتىڭ تاپسىرمالارىن ىسكە اسىرۋ بويىنشا كەڭەس وتكىزدى، دەپ حابارلايدى Dalanews.kz.
كەڭەستە پرەمەر-مينيستردىڭ ورىنباسارى ەرمەك كوشەربايەۆ پەن تۋريزم جانە سپورت ءمينيسترى ەربول مىرزابوسىنوۆ ەلىمىزدىڭ تۋريستىك ايماقتارىنداعى ينفراقۇرىلىم، سەرۆيس پەن قاۋىپسىزدىك ماسەلەلەرى، سونداي-اق الاكول جاعالاۋىنداعى قازىرگى جاعداي تۋرالى بايانداما جاسادى.
ولجاس بەكتەنوۆ ءوڭىر اكىمدەرى مەن ورتالىق مەملەكەتتىك ورگاندارعا وسى باعىتتاعى جۇمىستى كۇشەيتۋدى تاپسىردى. ناقتى مىندەتتەر جۇكتەلدى.
پرەزيدەنت ەسكەرتۋلەرىنىڭ شۇعىل ورىندالۋىن قامتاماسىز ەتۋ ءۇشىن ەرمەك كوشەربايەۆ پەن ەربول مىرزابوسىنوۆ وڭىرلەرگە ىسساپارمەن جىبەرىلەدى. ساپار ناتيجەسىندە جاۋاپتى تۇلعالار جاۋاپكەرشىلىككە تارتىلادى.
بۇدان بولەك، جيىن بارىسىندا الماتى تاۋ كلاستەرىن دامىتۋ ماسەلەلەرى قارالدى. باستاپقى كەزەڭدە ينفراقۇرىلىمدىق جۇمىستار جۇرگىزىلەدى. اتاپ ايتقاندا، ەلەكتر جەلىلەرىن، كارىز جۇيەسىن، گازبەن جابدىقتاۋ مەن اۆتوجولداردى سالۋ، سونداي-اق ىرگەلەس اۋماقتاردى اباتتاندىرۋ جانە بولاشاقتا الەمدىك دەڭگەيدەگى كۋرورت قالىپتاستىرۋ ءۇشىن جاعداي جاساۋ كوزدەلىپ وتىر.
ايتا كەتەيىك، بۇعان دەيىن مەملەكەت باسشىسى حالىقتان كەلىپ تۇسكەن كوپتەگەن شاعىمعا بايلانىستى الاكول ماڭىنداعى ايگىلى تۋريستىك ايماقتىڭ دەمالۋشىلاردى قارسى الۋعا دايىندىعى تومەن ەكەنىنە ۇكىمەتتىڭ نازارىن اۋداردى. بۇل تۋرالى پرەزيدەنتتىڭ باسپا ءسوز حاتشىسى رۋسلان جەلدىباي مالىمدەدى.
"اتاپ ايتقاندا، قاجەتتى تۋريستىك ينفراقۇرىلىم، قىزمەت كورسەتۋ مەن قاۋىپسىزدىك لايىقتى دەڭگەيدە قامتاماسىز ەتىلمەگەن.
ۇكىمەتكە قىسقا مەرزىم ىشىندە ەلدەگى بارلىق تۋريستىك باعىتتىڭ جاعدايىن رەتكە كەلتىرىپ، ولقىلىق جىبەرگەن لاۋازىمدى تۇلعالاردى جاۋاپكەرشىلىككە تارتۋدى تاپسىردى"، - دەپ جازدى ول.
مەملەكەت باسشىسىنىڭ الاكول جاعالاۋىنداعى تۋريستىك ينفراقۇرىلىمعا قاتىستى سىنىنان كەيىن وبلىس اكىمىنىڭ تاپسىرماسىمەن ونىڭ ورىنباسارى سەرىك تۋلەنبەرگەنوۆ اۋدان باسشىلىعىنىڭ جانە جاۋاپتى مەملەكەتتىك مەكەمەلەردىڭ قاتىسۋىمەن كول باسىندا شۇعىل جيىن وتكىزدى. وندا دەمالۋشىلارعا قولايلى جاعداي جاساۋ، سانيتارلىق تازالىق پەن قاۋىپسىزدىك ماسەلەلەرى كەڭىنەن تالقىلاندى،- دەپ حابارلايدى Dalanews.kz
كول جاعاسىنا قۇقىق قورعاۋ ورگاندارىمەن بىرگە رەيد جۇرگىزىپ، تارتىپتىك شارالاردى كۇشەيتەدى. سونىڭ ىشىندە موتورلى قايىق يەلەرىنىڭ قىزمەت كورسەتۋلەرى قاتاڭ تەكسەرىلەدى. تازالىق ماسەلەسى قاراستىرىلىپ، قوقىس تاستاعان ساۋدا ورىندارى مەن دەمالىس ۇيلەرىنە ايىپپۇل سالىنادى.
الاكولدىڭ اباي وبلىسىنداعى جاعالاۋىنا بيىل ەرەكشە كوڭىل ءبولىنىپ جاتىر. بۇعان دەيىن ناۋرىز ايىنان باستاپ، وبلىس اكىمى بەرىك ءۋالي تۋريستىك ورىنعا 3 رەت بارىپ، كوشپەلى جيىندار وتكىزگەن. الاكول جاعالاۋىنا 2018 جىلدان بەرى جوندەۋ جۇمىستارى جۇرگىزىلمەگەن. وسىنى ەسكەرە وتىرىپ، وبلىستىق بيۋدجەتتەن 658 ميلليون تەڭگە قارجى ءبولىندى. بولىنگەن قارجىدان اربات الاڭىن جوندەۋگە 108،9 ملن تگ، جاڭا قوعامدىق كەڭىستىك قۇرۋعا 171،6 ملن تگ، جاعالاۋدى اباتتاندىرۋعا 107،5 ملن تگ باعىتتالدى. 25 كيىم اۋىستىراتىن ورىن، 50 كونتەينەر، 2 بيوتۋالەت ورناتىلدى. 7 ءپيرستىڭ 3-ەۋى ورناتىلىپ، قۇتقارۋ مۇنارالارى مەن جاعاجايدى جارىقتاندىرۋ جۇمىستارى جۇرگىزىلدى.
سونىمەن قاتار جاعالاۋدا قۇتقارۋ ستانسياسىنىڭ قۇرىلىسى باستالدى. اتالعان ستانسيا الاكول اۋماعىندا توتەنشە جاعدايلاردىڭ الدىن الۋ، سالدارىن جويۋ، العاشقى مەديسينالىق كومەك كورسەتۋگە مۇمكىندىك جاساۋ، ادام ءومىرىن ساقتاۋ مەن جالپى قاۋىپسىزدىك دەڭگەيىن ارتتىرۋعا باعىتتالعان. سونداي-اق، قابانباي اۋىلىندا ءورت ءسوندىرۋ دەپوسى سالىنۋدا. ەكى ءورت ءسوندىرۋ اۆتوكولىگىنە ارنالعان بەكەت الاكول ماڭى مەن اۋماعىنداعى ءورت قاۋىپسىزدىگىن قامتاماسىز ەتۋگە ارنالعان.
