جاز ماۋسىمى باستالۋىمەن ەلوردانىڭ سۋ ايدىندارىندا ازاماتتاردىڭ قاۋىپسىزدىگىن قامتاماسىز ەتۋ جۇمىسى جانداندى. جىل سايىن سۋ جاعاسىندا دەمالۋشىلار سانىنىڭ ارتۋىن ەسكەرە وتىرىپ، استانادا توتەنشە جاعدايلاردىڭ الدىن الۋعا جانە حالىق اراسىندا ءقاۋىپسىز مىنەز-قۇلىق مادەنيەتىن قالىپتاستىرۋعا باعىتتالعان كەشەندى الدىن الۋ شارالارى جۇزەگە اسىرىلۋدا. بۇل تۋرالى كوممۋنيكاسيالار قىزمەتىندە وتكەن بريفينگتە قالالىق تجد توتەنشە جاعدايلاردى جويۋ باسقارماسىنىڭ باستىعى باۋىرجان احمەتالين مالىمدەدى،- دەپ حابارلايدى Dalanews.kz
قالا اۋماعىندا شومىلۋعا رۇقسات ەتىلگەن بەس رەسمي سۋ ايدىنى انىقتالعان. ولار – ورتالىق قالالىق جاعاجاي؛ «تري پەسكاريا»، «ستوليچنىي دۆور» جانە «ارمينا» دەمالىس ورىندارى، ش.بەيسەكوۆا كوشەسىندەگى كوپىر ماڭىنداعى كوممۋنالدىق جاعاجاي.
سونىمەن قاتار، ازاماتتاردىڭ ءومىرى مەن دەنساۋلىعىنا تونەتىن قاۋىپتەردىڭ الدىن الۋ ماقساتىندا شومىلۋعا قاتاڭ تىيىم سالىنعان 21 ۋچاسكە بەلگىلەنگەن. بۇل اۋماقتار قۇتقارۋ بەكەتتەرىمەن، تەحنيكالىق قۇرالدارمەن جابدىقتالماعان، ءتيىستى تەكسەرۋدەن وتپەگەن جانە ادەتتە، تاۋەكەل دەڭگەيى جوعارى.
بارلىق ءىس-شارالاردى ۇيلەستىرۋدى قالالىق توتەنشە جاعدايلار دەپارتامەنتى جۇزەگە اسىرادى. بۇگىنگى تاڭدا قاۋىپسىزدىكتى قامتاماسىز ەتۋ ماقساتىندا 20 سۋ ايدىنىندا 3 ستاسيونارلىق بەكەت پەن 16 پاترۋلدىك توپ ورنالاستىرىلعان. ولاردىڭ قۇرامىندا جۇمىلدىرىلعاندار:
• 59 قۇتقارۋشى قىزمەتكەر؛
• 9 ءجۇزۋ قۇرالى؛
• 5 بىرلىك جەرۇستى تەحنيكاسى.
سۋ ايدىندارىنىڭ اسا ءقاۋىپتى ۋچاسكەلەرى (ش. بەيسەكوۆا كوشەسىندەگى كوپىر ماڭى، تەلمان تۇرعىن ءۇي ءماسسيۆى جانە كونتررەتتەگىش اۋدانى) قوسىمشا ءموبيلدى قۇتقارۋ بەكەتتەرىمەن باقىلانادى. جاياۋ پاترۋلدەر كۇن سايىن ساعات 09:00-دەن 21:00-گە دەيىن جۇمىس ىستەسە، سۋ بەتىندەگى پاترۋلدەۋ تاۋلىك بويى جۇرگىزىلەدى.
شومىلۋ ماۋسىمى باستالعالى بەرى حالىق اراسىندا بەلسەندى ءاقپاراتتىق-تۇسىندىرۋ جۇرگىزىلۋدە. قۇتقارۋشىلار ءتۇسىندىرۋ جۇمىسىن وتكىزىپ، جادىنامالار تاراتىپ، سۋداعى قاۋىپسىزدىك ەرەجەلەرىن ەسكە سالادى.
بالالار اراسىنداعى پروفيلاكتيكاعا ەرەكشە كوڭىل بولىنەدى. جازعى دەمالىس باستالعانعا دەيىن م. وتەمىسوۆ اتىنداعى وقۋشىلار سارايى بازاسىندا قالا مەكتەپتەرىنىڭ ديرەكتورلارى مەن مۇعالىمدەرىنىڭ قاتىسۋىمەن سەمينار-كەڭەس وتكىزىلدى. سونداي-اق، كوشپەلى ساباقتار، قاۋىپسىزدىك بويىنشا ينتەراكتيۆتى ساباقتار مەن اتا-انالار جينالىستارىنا قاتىسۋ ۇيىمداستىرىلدى.
قالالىق پروكۋراتۋرامەن بىرلەسىپ، ەسىل وزەنىنىڭ ارناسى زەرتتەلىپ، رەسمي جاعاجاي ايماقتارىنداعى سۋ ءتۇبى تەكسەرىلدى. ىشكى ىستەر ورگاندارىمەن جانە ەرىكتىلەرمەن ءوزارا ءىس-قيمىل كۇشەيتىلدى: شومىلۋ ەرەجەلەرىن بۇزۋ فاكتىلەرىن انىقتاۋ بويىنشا رەيدتەر تۇراقتى تۇردە ۇيىمداستىرىلادى.
مۇنداي جۇمىستاردىڭ ناتيجەسى بايقالا باستادى. جاز باسىنان بەرى ق ر اقبتك-نىڭ 412-بابى بويىنشا جالپى سوماسى 233 954 تەڭگەگە 17 ازامات اكىمشىلىك جاۋاپكەرشىلىككە تارتىلدى. ونىڭ 5 جاعدايى بالالاردى سۋ جاعاسىندا قاراۋسىز قالدىرۋمەن بايلانىستى.
سونىمەن قاتار، پاترۋلدەۋ بارىسىندا 9 ادام قۇتقارىلدى، ونىڭ 5-ەۋى – بالالار. بۇل وقيعالار توتەنشە جاعدايلاردىڭ الدىن الۋدا تۇراقتى باقىلاۋ مەن جەدەل ارەكەت ەتۋدىڭ ماڭىزدىلىعىن تاعى ءبىر مارتە كورسەتەدى.
رۇقسات ەتىلمەگەن سۋ ايدىندارىندا قايعىلى جاعدايلاردىڭ الدىن الۋ ماقساتىندا 250-دەن استام ەسكەرتۋ بەلگىسى مەن 20 اقپاراتتىق ستەند ورناتىلدى.
قۇتقارۋ قىزمەتتەرى مەن جەرگىلىكتى بيلىك وكىلدەرى ەلوردالىقتاردى جانە قالا قوناقتارىن قاراپايىم قاۋىپسىزدىك ەرەجەلەرىن ساقتاۋعا جانە شومىلۋعا تىيىم سالىنعان اۋماقتاردا ومىرلەرىن قاتەرگە تىكپەۋگە شاقىرادى.
