الماتى وبلىسىندا 10 جاستاعى بالانى ءيتتىڭ شابۋىلىنان قۇتقارىپ قالعان ەر ادام ماراپاتتالدى، دەپ حابارلايدى Dalanews.kz.

30 ماۋسىمدا المالىباق اۋىلىنداعى فۋتبول الاڭىندا 10 جاستاعى ماكسيم گولوۆاچيەۆكە يت شابۋىل جاساپ، بالا اۋىر جاراقات الدى. وقيعا ورنىنا قۇزىرلى ورگاندار كەلگەنشە دەر كەزىندە جەتكەن اۋىل تۇرعىنى سەرىكبەك ساقايبايەۆ ومىرىنە تونگەن ءقاۋىپتى ەلەمەي، يتكە قارسى تۇرىپ، بالانى ءولىم اۋزىنان اراشالاپ قالدى. بۇل – ناعىز ازاماتتىق باتىلدىق پەن شىنايى ەرلىكتىڭ ۇلگىسى.

"سەرىكبەك ساقايبايەۆتىڭ باتىلدىعى ەلەۋسىز قالمادى. وعان قۇرمەت كورسەتۋ ماقساتىندا ارنايى ماراپاتتاۋ شاراسى ۇيىمداستىرىلدى. شارا بارىسىندا قاراساي اۋدانى اكىمىنىڭ مىندەتىن اتقارۋشى رۋستام اتشاباروۆ سەرىكبەك مىرزاعا العىس حات پەن دەمەۋشىلەر اتىنان قارجىلاي سىيلىق تابىستادى. سونىمەن قاتار، مەرەكەلىك جيىنعا اۋداندىق پوليسيا باسقارماسىنىڭ باسشىسى نۇسقابەك زاۋلانبايەۆ پەن توتەنشە جاعدايلار ءبولىمىنىڭ باسشىسى باعدات شارىپبەكوۆ ارنايى كەلىپ، سەرىكبەك ساقايبايەۆقا العىس حاتتار مەن ەستەلىك سىيلىقتار تاپسىردى. قاراساي اۋداندىق اقساقالدار كەڭەسىنىڭ ءتوراعاسى ساعات ءماسىماقىنوۆ ءوز باتاسىن بەرىپ، بۇل ەرلىك ەلگە ۇلگى بولاتىنىن اتاپ ءوتتى. بۇل وقيعا – ءاربىر ازامات ءۇشىن ۇلكەن ساباق. قوعامداعى بەيقامدىق پەن سالعىرتتىق ادام ومىرىنە ءقاۋىپ توندىرەتىنى انىق. زاڭسىز جانە باقىلاۋسىز يت ۇستاۋ دەرەكتەرى انىقتالعان جاعدايدا تۇرعىندار قۇقىق قورعاۋ ورگاندارىنا نەمەسە اۋدان اكىمدىگىنە دەرەۋ حابارلاۋى ءتيىس"، - دەپ جازىلعان حابارلامادا.

ەسكە سالايىق، الماتى وبلىسىنىڭ قاراساي اۋدانىنا قاراستى اۋىلدا 10 جاستاعى بالانى ەكى قاباعان يت تالاپ، اۋىر جاراقاتتادى. وقيعا 30 مامىردا بولعان.

وقيعانىڭ باستى كۋاگەرى ءارى بالانى قۇتقارىپ قالعان اۋىل تۇرعىنى، زەينەتكەر سەرىكبەك ساقايبەكوۆتىڭ ايتۋىنشا، سول كۇنى كولىگىمەن جولاۋشى ايەلدى ۇيىنە جەتكىزۋ ءۇشىن بارا جاتقاندا، ءبىر توپ بالانىڭ شۋلاپ، جان-جاققا قاشا جونەلگەنىن كورگەن. 

ءقازىر 10 جاستاعى بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر.

بالانىڭ اناسى ەكاتەرينا بۋرميستروۆانىڭ ايتۋىنشا، ۇلىنىڭ جاعدايى وتە قيىن.