2025 جىلعى 10 ماۋسىمدا عىلىم ورداسىندا پارسى ءتىلىن وقىتۋ كۋرسىن ءساتتى اياقتاعان قاتىسۋشىلارعا سالتاناتتى تۇردە سەرتيفيكات تابىستالدى. اتالعان كۋرس «عىلىم ورداسى» رمك مەن الماتىداعى يران يسلام رەسپۋبليكاسىنىڭ باس كونسۋلدىعى جانىنداعى مادەني ورتالىق اراسىنداعى ءوزارا ىنتىماقتاستىق تۋرالى مەموراندۋم اياسىندا ۇيىمداستىرىلدى،- دەپ حابارلايدى Dalanews.kz
سەرتيفيكات تابىستاۋ راسىمىنە «عىلىم ورداسى» رمك باس ديرەكتورى ۇلار مۇقاجانوۆ، ديرەكتوردىڭ ورىنباسارى ازامات نۇرشانوۆ، يران يسلام رەسپۋبليكاسىنىڭ الماتى قالاسىنداعى باس كونسۋلى سونا احمادي، باس كونسۋلدىق جانىنداعى مادەني وكىلدىكتىڭ باسشىسى حوسسەين اقازادە، سونداي-اق مەكەمە قىزمەتكەرلەرى قاتىستى.
ءىس-شارانىڭ اشىلۋىندا ۇلار مۇقاجانوۆ كۋرسقا قاتىسۋشىلاردى قۇتتىقتاپ، قازاقستان مەن يران اراسىنداعى ىنتىماقتاستىقتىڭ ماڭىزدىلىعىنا توقتالدى.
«جاقىندا عىلىم ورداسى مەن يران ەلى اراسىندا ارىپتەستىك ورناتىلىپ، سيرەك كىتاپتار مەن قولجازبا دەرەكتەردى رەستاۆراسيالاۋ جانە كونسەرۆاسيالاۋ سالالارىندا كاسىبي تاجىريبە الماسۋ، عىلىمي زەرتتەۋلەر جۇرگىزۋ، كادر دايارلاۋ باعىتىندا مەموراندۋمدارعا قول قويىلدى. بۇل باستامالار حالىقارالىق مادەني ىنتىماقتاستىقتى تەرەڭدەتىپ، عىلىم ورداسىنىڭ قىزمەتىن جاڭا دەڭگەيگە كوتەرۋگە باعىتتالعان. سونىمەن قاتار، مەكەمە قىزمەتكەرلەرىنە تەگىن تىلدىك كۋرستار ۇيىمداستىرىلىپ، ولاردىڭ كاسىبي الەۋەتىن ارتتىرۋ، تاجىريبە الماسۋعا جاعداي جاساۋ كوزدەلىپ وتىر. بۇل قادام قازاقستان مەن يران اراسىنداعى رۋحاني بايلانىستى نىعايتۋعا تىڭ سەرپىن بەرەتىنى ءسوزسىز»، – دەدى ۇلار مۇقاجانوۆ.
يران يسلام رەسپۋبليكاسى كونسۋلدىعىنىڭ وكىلدەرى سونا احمادي مەن حوسسەين اقازادە قازاقستان مەن يران اراسىنداعى مادەني جانە ءبىلىم بەرۋ سالالارىنداعى ىنتىماقتاستىقتىڭ تۇراقتى تۇردە دامىپ كەلە جاتقانىن ايتتى. ولار عىلىم ورداسى باسشىلىعىنا يران مادەنيەتى مەن پارسى تىلىنە كورسەتكەن قولداۋى ءۇشىن العىس ءبىلدىرىپ، بۇل مەكەمەنىڭ ەكى ەل اراسىنداعى رۋحاني بايلانىستى نىعايتاتىن التىن كوپىرگە اينالعانىن ەرەكشە اتاپ ءوتتى. سونداي-اق، الداعى ۋاقىتتا دا وسى باعىتتاعى بىرلەسكەن باستامالاردىڭ تابىستى جالعاسىن تاباتىنىنا سەنىم ءبىلدىردى.
كۋرس تىڭداۋشىلارى كورسەتىلگەن قولداۋ مەن مۇمكىندىكتەر ءۇشىن يران مادەني ورتالىعى مەن عىلىم ورداسىنا العىستارىن ءبىلدىرىپ، پارسى تىلىندە ولەڭدەر وقىپ، «ەي يران» جانە «بۋيە دجۋيە مۋليون ءوياد ھامي» اتتى اندەردى ورىندادى.
ايتا كەتۋ كەرەك، عىلىم ورداسى قىزمەتكەرلەردىڭ كاسىبي جانە زياتكەرلىك دامۋىن قولداۋ ماقساتىندا اعىلشىن، تۇرىك جانە پارسى تىلدەرىن ۇيرەتەتىن تەگىن كۋرستاردى تۇراقتى تۇردە ۇيىمداستىرىپ كەلەدى.
