2025 jylǵy 10 maýsymda Ǵylym ordasynda parsy tilin oqytý kýrsyn sátti aiaqtaǵan qatysýshylarǵa saltanatty túrde sertifikat tabystaldy. Atalǵan kýrs «Ǵylym ordasy» RMK men Almatydaǵy Iran Islam Respýblikasynyń Bas konsýldyǵy janyndaǵy Mádeni ortalyq arasyndaǵy ózara yntymaqtastyq týraly memorandým aiasynda uiymdastyryldy,- dep habarlaidy Dalanews.kz
Sertifikat tabystaý rásimine «Ǵylym ordasy» RMK Bas direktory Ular Muqajanov, direktordyń orynbasary Azamat Nurshanov, Iran Islam Respýblikasynyń Almaty qalasyndaǵy Bas konsýly Sona Ahmadi, Bas konsýldyq janyndaǵy Mádeni ókildiktiń basshysy Hossein Aqazade, sondai-aq mekeme qyzmetkerleri qatysty.
Is-sharanyń ashylýynda Ular Muqajanov kýrsqa qatysýshylardy quttyqtap, Qazaqstan men Iran arasyndaǵy yntymaqtastyqtyń mańyzdylyǵyna toqtaldy.
«Jaqynda Ǵylym ordasy men Iran eli arasynda áriptestik ornatylyp, sirek kitaptar men qoljazba derekterdi restavratsiialaý jáne konservatsiialaý salalarynda kásibi tájiribe almasý, ǵylymi zertteýler júrgizý, kadr daiarlaý baǵytynda memorandýmdarǵa qol qoiyldy. Bul bastamalar halyqaralyq mádeni yntymaqtastyqty tereńdetip, Ǵylym ordasynyń qyzmetin jańa deńgeige kóterýge baǵyttalǵan. Sonymen qatar, mekeme qyzmetkerlerine tegin tildik kýrstar uiymdastyrylyp, olardyń kásibi áleýetin arttyrý, tájiribe almasýǵa jaǵdai jasaý kózdelip otyr. Bul qadam Qazaqstan men Iran arasyndaǵy rýhani bailanysty nyǵaitýǵa tyń serpin beretini sózsiz», – dedi Ular Muqajanov.
Iran Islam Respýblikasy konsýldyǵynyń ókilderi Sona Ahmadi men Hossein Aqazade Qazaqstan men Iran arasyndaǵy mádeni jáne bilim berý salalaryndaǵy yntymaqtastyqtyń turaqty túrde damyp kele jatqanyn aitty. Olar Ǵylym ordasy basshylyǵyna iran mádenieti men parsy tiline kórsetken qoldaýy úshin alǵys bildirip, bul mekemeniń eki el arasyndaǵy rýhani bailanysty nyǵaitatyn altyn kópirge ainalǵanyn erekshe atap ótti. Sondai-aq, aldaǵy ýaqytta da osy baǵyttaǵy birlesken bastamalardyń tabysty jalǵasyn tabatynyna senim bildirdi.
Kýrs tyńdaýshylary kórsetilgen qoldaý men múmkindikter úshin Iran Mádeni ortalyǵy men Ǵylym ordasyna alǵystaryn bildirip, parsy tilinde óleńder oqyp, «Ei Iran» jáne «Býie djýie mýlion oiád hami» atty ánderdi oryndady.
Aita ketý kerek, Ǵylym ordasy qyzmetkerlerdiń kásibi jáne ziiatkerlik damýyn qoldaý maqsatynda aǵylshyn, túrik jáne parsy tilderin úiretetin tegin kýrstardy turaqty túrde uiymdastyryp keledi.
