24 شىلدەدە E-Qazyna ەلەكتروندى ساۋدا الاڭىندا مەملەكەت مەنشىگىنە قايتارىلعان زەرگەرلىك بۇيىمداردىڭ كەزەكتى اۋكسيونى وتەدى. بۇل تۋرالى اكتيۆتەردى باسقارۋ جونىندەگى ۋاكىلەتتى ورگان (قۋۆا) مالىمدەدى، دەپ حابارلايدى Dalanews.kz. 

ساۋداعا 56 لوت قويىلادى. ولاردىڭ قاتارىندا الەمدىك دەڭگەيدەگى تانىمال برەندتەردىڭ ەكسكليۋزيۆتى اشەكەيلەرى بار.

اراسىنداعى ەڭ قىمباتى — De Beers ماركاسىنىڭ 750 سىنامالى اق التىننان جاسالعان، ءارقايسىسى 6 كارات تارتاتىن ەكى بريلليانتى بار سىرعاسى. بۇعان دەيىن ءساۋىر ايىندا بۇل بۇيىم 134،4 ملن تەڭگەگە باعالانىپ، ساتىلىمعا شىعارىلعانىمەن، سۇرانىس بولماعان. ءقازىر ونىڭ باستاپقى باعاسى 110،6 ملن تەڭگەگە تومەندەتىلگەن.

سونداي-اق اۋكسيوندا كەلەسى بۇيىمدار ساۋدالانباق:

• FOPE ماركاسىنىڭ سارى التىننان جاسالعان، 6 ءىنجۋ مەن 192 بريلليانتى (جالپى سالماعى 3،5 كارات) بار القاسى. باستاپقى باعا — 4،6 ملن تەڭگە.

• Van Cleef & Arpels برەندىنىڭ اق التىننان جاسالعان، جالپى سالماعى 16،92 كارات بريلليانتتارمەن كومكەرىلگەن القا-شىنجىرى. باستاپقى باعاسى — 38،5 ملن تەڭگە.

ەسكە سالا كەتەيىك، بۇعان دەيىن ەكس-پرەزيدەنت نۇرسۇلتان نازاربايەۆتىڭ جيەنى قايرات ساتىبالدىدان تاركىلەنگەن ساق التىنى مەملەكەت مەنشىگىنە وتكىزىلىپ، كوپشىلىككە كورسەتىلگەن ەدى.