قازاقستاننىڭ حالىقارالىق سوتتاعى تارتىسى شيرىعىپ تۇر. ءقازىردىڭ وزىندە ەلىمىز ءوز مۇددەسىن قورعاۋ ءۇشىن سىرتتا 21 ءىس بويىنشا ايقاسىپ جاتىر. ءدال ءقازىر تالاسقا ءتۇسىپ جاتقان قارجى كولەمى دە قوماقتى – 7،5 ملرد دوللار نەمەسە 3،8 ترلن تەڭگە. بۇل تۋرالى بۇگىن ادىلەت مينيسترلىگىنىڭ مەملەكەتتىك مۇلىكتىك قۇقىقتاردى قورعاۋ دەپارتامەنتى ديرەكتورىنىڭ مىندەتىن اتقارۋشى ەرلان مۇسابايەۆ مالىمدەدى، دەپ حابارلايدى Dalanews.kz.

ونىڭ ايتۋىنشا، 21 ءىستىڭ 13ء-ى اربيتراجدا، التاۋى شەتەلدىك سوتتاردىڭ قاراۋىندا بولسا، ەكەۋى ازىرگە سوتقا دەيىنگى ساتىدا.

ولاردىڭ ىشىندە بىردەن كوزگە تۇسەتىنى – كانادالىق World Wide Minerals ۋران كومپانياسىمەن ارادا بولعان كوپجىلدىق ايگىلى داۋ. كەزىندە اتالعان كومپانيا سەلينوگراد تاۋ-حيميا كومبيناتىن باسقارۋعا قاتىستى كەلىسىمشارتتىڭ بۇزىلعانىن، سونداي-اق ۋران ەكسپورتىنا ليسەنزيا بەرىلمەگەنىن العا تارتىپ، قازاقستاننان 65 ملن دوللار ءوندىرىپ الۋعا ارەكەتتەنگەن ەدى. الايدا لوندوننىڭ جوعارعى سوتى جاقىندا بۇل ءىستىڭ نۇكتەسىن قويىپ، قازاقستاننىڭ پايداسىنا شەشىم شىعاردى. اعىلشىن سوتى ەلىمىزدىڭ كانادالىق كومپانيا الدىنداعى ەشقانداي مىندەتتەمەسى بولماعانىن مويىندادى.

"ايتا كەتۋ كەرەك، انگليا سوتىندا اپەللياسيالىق شاعىمنىڭ قابىلدانۋى وتە كۇردەلى پروسەسس. ونداي شاعىمداردىڭ نەبارى 2 پايىزى عانا وڭ ناتيجەمەن اياقتالادى"، – دەپ اتاپ ءوتتى مۇسابايەۆ.

سونىمەن قاتار، قازاقستاننىڭ تاعى ءبىر ءىرى جەڭىسى – Todini Impregilo Kazakhdorstroy بىرلەسكەن كاسىپورنىمەن اراداعى داۋ. پاريجدەگى اربيتراج قازاقستاننىڭ پوزيسياسىن تولىق قولداپ، كومپانيانىڭ بارلىق تالاپتارىن نەگىزسىز دەپ تانىدى.

مينيسترلىك وكىلى وسىنداي جەتىستىكتەردىڭ ارقاسىندا سوڭعى جىلدارى حالىقارالىق داۋلاردىڭ سانى ەداۋىر ازايعانىن دا اتاپ ءوتتى.

"بۇل – قازاقستان مۇددەسىن شەتەلدىك سوتتار مەن اربيتراجداردا كاسىبي تۇردە قورعاپ جۇرگەن زاڭگەرلەرىمىزدىڭ جۇيەلى ءارى تياناقتى ەڭبەگىنىڭ جەمىسى"، – دەدى مۇسابايەۆ.

بۇعان دەيىن سايتىمىزدا "قاشاعاندا ءوندىرىلىپ جاتقان بارلىق مۇنايدىڭ 2 پايىزى عانا قازاقستانعا بۇيىرادى. نەگە؟" دەگەن ماقالا جاريالانعان بولاتىن.