Qazaqstannyń halyqaralyq sottaǵy tartysy shiryǵyp tur. Qazirdiń ózinde elimiz óz múddesin qorǵaý úshin syrtta 21 is boiynsha aiqasyp jatyr. Dál qazir talasqa túsip jatqan qarjy kólemi de qomaqty – 7,5 mlrd dollar nemese 3,8 trln teńge. Bul týraly búgin Ádilet ministrliginiń Memlekettik múliktik quqyqtardy qorǵaý departamenti direktorynyń mindetin atqarýshy Erlan Musabaev málimdedi, dep habarlaidy Dalanews.kz.
Onyń aitýynsha, 21 istiń 13-i arbitrajda, altaýy sheteldik sottardyń qaraýynda bolsa, ekeýi ázirge sotqa deiingi satyda.
Olardyń ishinde birden kózge túsetini – kanadalyq World Wide Minerals ýran kompaniiasymen arada bolǵan kópjyldyq áigili daý. Kezinde atalǵan kompaniia Tselinograd taý-himiia kombinatyn basqarýǵa qatysty kelisimsharttyń buzylǵanyn, sondai-aq ýran eksportyna litsenziia berilmegenin alǵa tartyp, Qazaqstannan 65 mln dollar óndirip alýǵa árekettengen edi. Alaida Londonnyń Joǵarǵy soty jaqynda bul istiń núktesin qoiyp, Qazaqstannyń paidasyna sheshim shyǵardy. Aǵylshyn soty elimizdiń kanadalyq kompaniia aldyndaǵy eshqandai mindettemesi bolmaǵanyn moiyndady.
"Aita ketý kerek, Angliia sotynda apelliatsiialyq shaǵymnyń qabyldanýy óte kúrdeli protsess. Ondai shaǵymdardyń nebári 2 paiyzy ǵana oń nátijemen aiaqtalady", – dep atap ótti Musabaev.
Sonymen qatar, Qazaqstannyń taǵy bir iri jeńisi – Todini Impregilo Kazakhdorstroy birlesken kásipornymen aradaǵy daý. Parijdegi arbitraj Qazaqstannyń pozitsiiasyn tolyq qoldap, kompaniianyń barlyq talaptaryn negizsiz dep tanydy.
Ministrlik ókili osyndai jetistikterdiń arqasynda sońǵy jyldary halyqaralyq daýlardyń sany edáýir azaiǵanyn da atap ótti.
"Bul – Qazaqstan múddesin sheteldik sottar men arbitrajdarda kásibi túrde qorǵap júrgen zańgerlerimizdiń júieli ári tiianaqty eńbeginiń jemisi", – dedi Musabaev.
Buǵan deiin saitymyzda "Qashaǵanda óndirilip jatqan barlyq munaidyń 2 paiyzy ǵana Qazaqstanǵa buiyrady. Nege?" degen maqala jariialanǵan bolatyn.
