اباي وبلىسى گەولوگيالىق بارلاۋ كوللەدجىندە مەكتەپ وقۋشىلارىنا ارنالعان جاس گەولوگتاردىڭ II رەسپۋبليكالىق دالالىق وليمپياداسىنىڭ اشىلۋ سالتاناتى ءوتتى. جارىس 8–15 شىلدە ارالىعىندا كوللەدج بازاسىندا جانە قاراۋىل شوقى وقۋ پوليگونىندا وتەدى،- دەپ حابارلايدى Dalanews.kz
وليمپيادانىڭ جابىلۋ ءراسىمى 14 شىلدەگە جوسپارلانعان.
وليمپيادانىڭ ماقساتى – وقۋشىلاردىڭ گەولوگياعا قىزىعۋشىلىعىن ارتتىرۋ، ەرتە كاسىبي باعدار بەرۋ، گەوەكولوگيا مەن جەر قويناۋىن ۇتىمدى پايدالانۋ ماسەلەلەرىنە نازار اۋدارتۋ.
بيىلعى سايىسقا ەلىمىزدىڭ ءار وڭىرىنەن 15 كوماندا قاتىسىپ جاتىر. قاتىسۋشىلار پالەونتولوگيا، مينەرالوگيا جانە پەتروگرافيا، ماگنيتومەتريا، گيدروگەولوگيا، گەولوگيالىق قيما جاساۋ، مۇناي مەن گازدى ىزدەۋ، دالا جاعدايىندا تۇراق ۇيىمداستىرۋ جانە ءشليحتى سىناۋ سەكىلدى باعىتتار بويىنشا ب ا ق سىنايدى.
اشىلۋ سالتاناتىندا دەمەۋشى كومپانيالار مەن ۇيىمداردىڭ وكىلدەرى قاتىسۋشىلارعا ساتتىلىك تىلەپ، قۇتتىقتاۋ ءسوز سويلەدى. وليمپيادا قورىتىندىسىندا جەكەلەگەن پاندەر بويىنشا ۇزدىك شىققان وقۋشىلار Satbayev University، قبتۋ، اتىراۋ مۇناي جانە گاز ۋنيۆەرسيتەتى، قاراعاندى تەحنيكالىق ۋنيۆەرسيتەتى سىندى جەتەكشى جوعارى وقۋ ورىندارىنىڭ ءبىلىم گرانتتارىنا يە بولادى.
وليمپيادا ق ر گەولوگيا كوميتەتىنىڭ قولداۋىمەن «جاس گەولوگ» كورپوراتيۆتىك قورى مەن گەولوگيالىق بارلاۋ كوللەدجىنىڭ ۇيىمداستىرۋىمەن وتكىزىلىپ جاتىر. دەمەۋشىلەر قاتارىندا – Kazakhmys، ERG، Kazzinc، Yer-Tai، گەوكەن، «الەل» قارجى-ينۆەستيسيالىق كورپوراسياسى، ەمبىمۇنايگاز، ProLabSupport جانە Solidcore Resources كومپانيالارى بار.
قازىلار القاسىنا جوعارى وقۋ ورىندارىنىڭ پروفەسسور-وقىتۋشىلارى، ءوندىرىس سالاسىنىڭ جەتەكشى ماماندارى جانە كوللەدج ۇستازدارى تارتىلعان.
جاس گەولوگتار وليمپياداسى – بولاشاق مامانداردى دايارلاۋعا جول اشاتىن كاسىبي الاڭ عانا ەمەس، سونىمەن بىرگە وسكەلەڭ ۇرپاققا تۋعان جەرگە دەگەن سۇيىسپەنشىلىك پەن پاتريوتتىق سەزىم قالىپتاستىراتىن تاعىلىمدى باستاما.
