رەسەيدە قازاقستان تۋماسى 17 جىلعا سوتتالدى، دەپ حابارلايدى Dalanews.kz.
قازاقستاندا تۋعان پەتر گوربۋنوۆ 17 جىلعا باس بوستاندىعىنان ايىرىلدى. ماسكەۋدىڭ 2-باتىس ايماقتىق اسكەري سوتى ونى مەملەكەتتىك وپاسىزدىق، تەرروريستىك ۇيىم قىزمەتىنە قاتىسۋ جانە جارىلعىش زاتتاردى زاڭسىز ساقتاۋ باپتارى بويىنشا كىنالى دەپ تانىدى. سوت شەشىمى بويىنشا ول جازاسىن قاتاڭ رەجيمدەگى كولونيادا وتەيدى.
تەرگەۋ مالىمەتتەرى بويىنشا، گوربۋنوۆ رەسەيدە تىيىم سالىنعان تەرروريستىك ۇيىم وكىلدەرىمەن بايلانىسقا شىعىپ، ولاردىڭ تاپسىرماسىمەن ورمان القابىنداعى جاسىرىن قويمادان جارىلعىش قۇرىلعىلاردى العان. بۇل زاتتاردى ول ءوز ۇيىندە ساقتاپ، كەيىن تەراكت ۇيىمداستىرۋ ماقساتىندا ءۇشىنشى تۇلعالارعا بەرمەك بولعان. الايدا فەدەرالدىق قاۋىپسىزدىك قىزمەتى (فسب) ونى بەلگورود وبلىسىندا قۇرىقتاپ، جارىلعىش قۇرىلعىلاردى تاركىلەپ، زالالسىزداندىرعان.
تاسس تاراتقان رەسمي مالىمەتكە سايكەس، سوت ۇكىمىمەن پەتر گوربۋنوۆقا 17 جىل باس بوستاندىعىنان ايىرۋ جازاسى تاعايىندالىپ، وعان قوسا 600 مىڭ رۋبل كولەمىندە ايىپپۇل سالىنعان.
