سوندىقتان وڭتايلى وزگەرىستەر ورىن الۋى ءۇشىن تاجىريبەلى جانە وزىندىك جاڭا كوزقاراسى قالىپتاسقان جاڭا بۋىن وكىلدەرىن تارتۋ قاجەت، دەگەن جازبا پايدا بولدى ق ر ءبىلىم جانە عىلىم ءمينيسترى اسحات ايماعامبەتوۆتىڭ پاراقشاسىندا، دەپ حابارلايدى Dalanews.kz.
وزدەرىڭىز بىلەتىندەي، ەل پرەزيدەنتى جاستاردى مەملەكەتتى باسقارۋ ىسىنە تارتۋ ماسەلەسىنە كوپ كوڭىل بولەدى. ماسەلەن، جاستار كادرلىق رەزەرۆىن قالىپتاستىرۋ، مەملەكەتتىك قىزمەتتى رەفورمالاۋ جانە مەملەكەت باسشىسىنىڭ باسقا دا باستامالارى قولعا الىندى. ءبىز پرەزيدەنتتىڭ ساياساتىن، سونىڭ ىشىندە ءبىلىم بەرۋ جۇيەسىنە جاڭا كوشباسشىلاردى تارتۋ بويىنشا جۇمىستاردى جالعاستىرىپ كەلەمىز. جاڭا كوشباسشىلار - ءوز ەلىن، جەرىن سۇيەتىن پاتريوتتاردان قۇرالعان جاس ۇرپاق. كوبىنىڭ حالىقارالىق تاجىريبەسى بار، ولار - كاسىبي ورتادا كەڭىنەن تانىمال جانە مامان رەتىندە قالىپتاسقان تۇلعالار.
تاعايىندالعان باسشىلاردىڭ باسىم بولىگى "بولاشاق" باعدارلاماسىنىڭ تۇلەكتەرى جانە الەمنىڭ ۇزدىك جوعارى وقۋ ورىندارىندا ءبىلىم العان بولسا، ەندى ءبىر بولىگى نازاربايەۆ ۋنيۆەرسيتەتىندە وقىعان نەمەسە جۇمىس ىستەگەن ماماندار.
تەك سوڭعى ءۇش ايدىڭ ىشىندە اباي اتىنداعى قازۇپۋ، قوجا احمەت ياساۋي اتىنداعى قازاق-تۇرىك ۋنيۆەرسيتەتى، قىزدار ۇلتتىق ۋنيۆەرسيتەتى، ساتبايەۆ ۋنيۆەرسيتەتى، قوزىبايەۆ ۋنيۆەرسيتەتى سياقتى جەتەكشى جوعارى وقۋ ورىندارىنىڭ رەكتورلارى بولىپ زور الەۋەتى مەن مول تاجىريبەسى بار كوشباسشىلار تاعايىندالدى.
بۇل رەتتە ادامي كاپيتالدى دامىتۋ جونىندەگى مەملەكەتتىك ساياساتتى ازىرلەۋ جانە ىسكە اسىرۋ كەزىندە جەرگىلىكتى جەرلەردەگى جاعدايدى نەعۇرلىم ساپالى جانە تولىق ەسكەرۋ ءۇشىن ءبىز وڭىرلەردە قىزمەت اتقارىپ جاتقان مامانداردى جۇمىسقا بەلسەندى تۇردە تارتۋعا تىرىسامىز.
جاس كوشباسشىلار ءوز ءبىلىمى مەن تاجىريبەسىن ەلىمىزدىڭ گۇلدەنۋى جولىندا پايدالانىپ، ەڭبەك ۇلەستەرىن قوسقىلارى كەلەدى. ولاردىڭ ءارقايسىسىنا ۇلكەن ءۇمىت ارتىلىپ وتىر.
مەملەكەت باسشىسى ق.ك.توقايەۆتىڭ ساياساتىن جۇزەگە اسىرۋ جونىندەگى جۇمىستىڭ باسى-قاسىندا دا وسى ماماندار ءجۇرۋى ءتيىس.
ايتپاقشى، جاڭا كوشباسشىلار دەمەكشى، ءبىزدىڭ كوزدەگەنىمىز - جاڭا مامانداردى جۇمىسقا تارتا وتىرىپ، قىزمەتتە جۇرگەن باسشىلاردى تولىعىمەن اۋىستىرۋ ساياساتىن جۇرگىزۋ ەمەس.
ءبىزدىڭ باستى ماقساتىمىز - قازاقستاندىق ءبىلىم مەن عىلىمنىڭ الەۋەتىن بارىنشا كۇشەيتۋ ءۇشىن "جاستىق پەن تاجىريبەنىڭ ۇيلەسىم تابۋىن" قامتاماسىز ەتۋ.
جاڭا كوزقاراسى بار جاس كادرلاردى جۇمىسقا قابىلداي وتىرىپ، تەپە-تەڭدىك پەن ۇرپاقتار ساباقتاستىعى ساقتالاتىن بولادى. مينيسترلىك تاراپىنان ىسكە اسىرىلىپ جاتقان كادرلىق ساياسات تۋرالى قوعامدا نەعۇرلىم تولىق جانە وبەكتيۆتى تۇسىنىك قالىپتاستىرۋ ماقساتىندا الداعى بىرنەشە اپتانىڭ ىشىندە جاڭادان تاعايىندالعان باسشىلار كىشىگىرىم سۇحبات بەرەدى.
سۇحبات بارىسىندا جاس كوشباسشىلار باسقارىپ وتىرعان ۇيىمدارىن ودان ءارى دامىتۋ بويىنشا جۇمىس جوسپارىن (1)، جۇزەگە اسىرىلاتىن نەگىزگى رەفورمالار (2)، جۇمىس جوسپارىن ىسكە اسىرۋ ءۇشىن جۇيەگە تارتىلاتىن رەسۋرستار (3) جانە جاڭا باسشىنىڭ تاعايىندالۋىنان باستاپ ۇيىمنىڭ الداعى ۋاقىتقا جوسپارلانعان جۇمىس ناتيجەلەرىمەن (4) بولىسەتىن بولادى.
سونىمەن قاتار بۇل جۇمىستى جۇيەلى تۇردە جالعاستىرۋ ءۇشىن جاقىن ارادا ءبىز جاڭا جوبا باستايتىن بولامىز.
اتاپ ايتسام، "كادرلىق رەزەرۆ" جوباسى. ءبىز ءبىلىم جانە عىلىم جۇيەسىندە باسشىلىق لاۋازىمعا ۇسىنۋ ءۇشىن تابىستى ءارى دايىندىعى مىقتى ۇمىتكەرلەردى ىرىكتەۋدى جوسپارلاپ وتىرمىز.
جوبا بويىنشا ىرىكتەۋ شارتتارى مەن ءتارتىبى تۋرالى اقپارات جەكە جاريالانادى.
بۇدان بولەك جاقىن ارادا ءبىزدىڭ باستامامىزبەن جۇزەگە اسىرىلاتىن ديرەكتورلاردى روتاسيالاۋ ينستيتۋتى، ولاردى تاعايىنداۋدىڭ جاڭا قاعيدالارى جانە مۇعالىمدەردى جۇمىسقا كونكۋرس ارقىلى قابىلداۋدىڭ جاڭا جۇيەسىن ەنگىزەتىن نورمالار جۇزەگە اسىرىلا باستايدى.
ويىمدى قورىتىندىلاي كەلە، مينيسترلىك ءبىلىم مەن عىلىم سالاسىنداعى كادرلىق الەۋەتتى نىعايتۋ جانە ودان ءارى دامىتۋ ماسەلەلەرىنە باستى نازار اۋداراتىنىن اتاپ وتكىم كەلەدى. بۇل ماڭىزدى باعىت ءبىزدىڭ الداعى جۇمىسىمىزدا دا باسىمدىققا يە بولاتىنى ءسوزسىز، دەلىنگەن جازبادا.
توڭكەرىستىڭ تۇككە قاجەتى جوق
بۇدان بۇرىن Dalanews-كە سۇحبات بەرگەن مينيستر ايماعامبەتوۆ «ءبىلىم سالاسىنا ۇلكەن رەفورمالاردىڭ قاجەتى جوق» دەگەن ەدى.
«مىسالى، بىرەۋ جاڭا مينيستر كەلدى، ەندى ول وسى سالاداعى بۇرىنعى قاتەلىكتەردى تۇزەپ، ءبارىن كەڭەستىك جۇيەگە قايتا باعىتتايدى دەپ ۇمىتتەنەدى. ال تاعى بىرەۋى، كەرىسىنشە: قولدانىستاعى وسى جۇيەنى – جاڭارتىلعان باعدارلامانى قالدىرادى، ەشتەڭەنى وزگەرتپەيدى دەپ ويلايدى.
مەن وسى قىزمەتكە جاڭادان تاعايىندالا سالىسىمەن، بارلىق ساراپشى ماماندارمەن جولىعىپ، تىلدەستىم. ءبىلىم مينيسترلىگىن سىناۋشىلارمەن دە، سول سەكىلدى قولداۋشىلارمەن دە.
ماعان ولاردىڭ ۇستانىمى تۇسىنىكتى. ءارقيلى پىكىرلەر، كوبىنە بىر-بىرىنە قاراما-قايشى.
ولاردىڭ ءبىر بولىگى فينليانديا سياقتى ەلدەردىڭ وزىق باعدارلامالارىن قولعا الىپ، ەنگىزۋ وتە قاجەت دەپ سانايدى، ال باسقالارى 1980 جىلعى ءبىلىم بەرۋ باعدارلامالارىنا قايتا ورالساق دەيدى.
قالاي دەگەنمەن دە ۇلكەن وزگەرىس بولمايدى دەپ ايتىپ قويايىن. كوبىنە مينيستر جاڭادان كەلگەندە: «مەنىڭ الدىمداعىلار ءبارىن دۇرىس جاساماعان، سوندىقتان ءبارىن قايتا قاراستىرىپ، قايتا باسقاسىن ەنگىزەمىز» دەيدى ەمەس پە؟ نەگىزىنەن، بۇل ساياساتتى مەن قولدامايمىن. مەن ولاي ەتپەيمىن.
ارينە، الدىڭعىنى قابىلداپ الامىز، سولاي بولۋى كەرەك.
ءبىراق مەن ءبىلىم بەرۋ سالاسىندا جۇمىس ىستەپ، بۇل جۇيەنى ءارقىرىنان بايقاپ كورگەن اداممىن. اۋداندا دا بولدىم، وبلىستا دا بولدىم… سونىڭ ارقاسىندا مينيستر رەتىندە ماعان شەشىمدەر قابىلداۋ الدەقايدا وڭايىراق.
قوعام كوتەرىپ وتىرعان كوپتەگەن پروبلەمالاردى شەشۋ ءۇشىن ۇلكەن رەفورمالاردىڭ قاجەتى جوق. توڭكەرىستىڭ تۇككە قاجەتى جوق.
ەڭ كۇردەلى دەگەن، جاندى جەرگە تيەتىن رەفورمالار جۇزەگە اسىرىلىپ قويىلعان، ەندىگى پروبلەمالاردى كەزەڭ-كەزەڭىمەن اقىرىنداپ ەش اۋىرتپالىقسىز شەشۋگە بولادى»، – دەگەن بولاتىن مينيستر.
