قازاقستاندا ازىق-تۇلىك تاۋارلارىنىڭ باعاسى جىلدىق ەسەپتە 13،5%-عا دەيىن جەدەلدەدى، دەپ حابارلايدى Dalanews.kz ۇلتتىق بانكتىڭ باسپا ءسوز قىزمەتىنە سىلتەپ.
جىلدىق ينفلياسيا
«قازاندا جىلدىق ينفلياسيا 12،6% بولدى (قىركۇيەكتە – 12،9%). ازىق-تۇلىك ونىمدەرىنىڭ باعاسى 13،5%-عا (قىركۇيەكتە – 12،7%) ءوستى، ال ازىق-تۇلىككە جاتپايتىن تاۋارلار 11%-عا (10،8%) دەيىن قىمباتتادى. قىزمەتتەردەگى باعا ءوسىمى رەتتەلەتىن كوممۋنالدىق تاريفتەردىڭ اكىمشىلىك تومەندەۋىنە بايلانىستى 12،9%-عا (15،3%-دان) دەيىن باياۋلادى. جالپى العاندا، ينفلياسيانىڭ جوعارى قارقىنى ۇسىنىستان تۇراقتى تۇردە اسىپ تۇسەتىن سۇرانىس اياسىندا قالىپتاسىپ وتىر»، – دەلىنگەن ۇلتتىق بانك تاراتقان اقپاراتتا.
تاريفتەردى قايتا قاراۋ جانە جانار-جاعارماي نارىعىن ىرىقتاندىرۋ باعاعا جانە ينفلياسيالىق كۇتۋلەرگە قوسىمشا ىقپال ەتىپ جاتىر.
«كەيبىر تاۋار نارىقتارىنداعى تەڭگەرىمسىزدىك، تۇراقتى سۇرانىس، يمپورتتىڭ قىمباتتاۋى مەن شىعىنداردىڭ ءوسۋى ازىق-تۇلىك ينفلياسياسىنىڭ نەگىزگى درايۆەرىنە اينالدى. قىزمەتتەر ينفلياسياسىنىڭ ۇلەسى تومەندەگەنىمەن، باعا ءوسىمىنىڭ قارقىنى ءالى دە جوعارى دەڭگەيدە قالىپ وتىر. ازىق-تۇلىككە جاتپايتىن ينفلياسيادا جانارماي مەن فارماسيەۆتيكالىق ونىمدەردىڭ قىمباتتاۋى ايقىن سەزىلەدى»، – دەلىنگەن حابارلامادا.
ايلىق ينفلياسيا
قازاندا ايلىق ينفلياسيا 0،5%-عا دەيىن ەداۋىر باياۋلاعانىمەن، بازالىق ينفلياسيا 1% دەڭگەيىندە قالىپ، جوعارى بولىپ وتىر. بۇل كورسەتكىش جىلدىق ەسەپتە 12،2%-عا سايكەس كەلەدى. سونىمەن بىرگە تۇتىنۋ سەبەتىنىڭ 80%-ىن قۇرايتىن تاۋارلار مەن قىزمەتتەر 5% نىسانالى دالىزدەن جوعارى قارقىنمەن قىمباتتاپ جاتىر. بۇل باعا قىسىمىنىڭ تۇراقتىلىعى مەن كەڭ كولەمدە بايقالاتىنىن كورسەتەدى. مۇنداي ۇردىسكە فيسكالدىق جانە كۆازيفيسكالدىق ىنتالاندىرۋدىڭ كۇشەيۋى، سونداي-اق تۇتىنۋشىلىق سۇرانىستىڭ ارتۋى اسەر ەتىپ وتىر.
ينفلياسيالىق بولجامدار
«حالىقتىڭ ينفلياسياعا قاتىستى كۇتۋلەرى قازاندا 13،6%-عا دەيىن ءوستى (قىركۇيەكتە – 13،2%). قىسقا مەرزىمدى كۇتۋلەر قۇبىلمالى بولىپ قالىپ، بەلگىسىزدىك دەڭگەيىن ارتتىرادى. ۇزاق مەرزىمدى كۇتۋلەر 14،3%-عا دەيىن جوعارىلادى (بۇعان دەيىن – 14%). مۇنداي جوعارى كۇتۋلەر دەزينفلياسيانىڭ باياۋلاۋىنا جانە باعانىڭ شىعىن مەن سۇرانىس وزگەرىسىنە تاۋەلدىلىگىنىڭ ارتۋىنا اكەلەدى»، – دەپ ءتۇسىندىردى رەتتەۋشى ورگان.
سىرتقى فاكتورلار
سىرتقى ينفلياسيالىق قىسىم دا السىرەمەي تۇر.
«الەمدىك ازىق-تۇلىك باعاسى جوعارى دەڭگەيدە ساقتالۋدا. رەسەيدە ينفلياسيا باياۋلاعانىمەن، 4% نىسانادان ايتارلىقتاي جوعارى. وسىعان بايلانىستى رەسەيلىك رەتتەۋشى قاتاڭ اقشا-كرەديت ساياساتىن ساقتاپ وتىر. اقش-تا دا فرج ءوسىم قارقىنىنىڭ باياۋلاۋىن، ەڭبەك نارىعىنىڭ السىرەۋىن جانە ينفلياسيانىڭ جوعارى بولىپ وتىرعانىن اتاپ ءوتىپ، ساقتىق ۇستانىمىن جالعاستىرۋدا.
ەۋروپالىق ورتالىق بانكتىڭ دە ريتوريكاسى وزگەرگەن جوق، مولشەرلەمە قايتا كوتەرىلگەن جوق، ال بولاشاقتا ساياساتى جەڭىلدەۋ قارقىنمەن جۇمسارۋى مۇمكىن. جاڭارتىلعان بولجامعا سايكەس، Brent ماركالى مۇنايدىڭ باعاسى الداعى كەزەڭدە باررەلىنە ورتا ەسەپپەن 60 دوللار دەڭگەيىندە ساقتالادى»، – دەدى ۇلتتىق بانك.
