قور قىزمەت ەتكەن ءبىر جىل ىشىندە وبلىستىڭ ەكى تۇرعىنىنا 11 ملن تەڭگەنىڭ قىمبات پروتەزدەرى بەرىلدى. ايماعىمىزداعى ەكى بالاعا 18 ملن تەڭگەنىڭ ەكزوقاڭقالارى ساتىپ الىندى. ومىرگە ءقاۋىپ توندىرەتىن جانە ورفاندىق اۋرۋلاردان زارداپ شەگەتىن بەس ناۋقاس 255،9 ملن تەڭگەنىڭ قىمبات دارىلىك پرەپاراتتارىن الدى، تامىرلى پاتولوگياسى بار جەتى بالاعا ەم كورسەتىلدى.
– ءبىز مەملەكەتتىك بيۋدجەت ەسەبىنەن ىسكە اسىرۋ قيىن ءىس-شارالاردى عانا اتقارۋىمىز كەرەك. بۇل رەتتە، ءبىزدىڭ مىندەتىمىز – ماسەلەلەردى جۇيەلى شەشۋگە ىقپال ەتەتىن تۇراقتى جوبالاردى قولعا الۋ، – دەدى «قازاقستان حالقىنا» قوعامدىق قورىنىڭ باسقارۋشى ديرەكتورى سوفيا ايساعالييەۆا.
ايماقتا قوردىڭ قولداۋىمەن وسى جىلى ەرتە ارالاسۋ ورتالىعى مەن اۋتيزم سپەكترى بۇزىلعان بالالارعا ارنالعان ورتالىق ءوز جۇمىسىن باستادى. ءقازىر قور ءار اۋداندا وڭالتۋ مەكەمەلەرىن اشۋدى جوسپارلاپ وتىر.
وبلىس باسشىسى ەرمەك كوشەربايەۆ شەكارا ماڭىنداعى اۋماقتارعا ەرەكشە نازار اۋدارۋدى جانە اۋدانداردىڭ تۇيىسكەن جەرىندە وسىنداي مەكەمەلەر قۇرۋ مۇمكىندىگىن قاراستىرۋدى ۇسىندى، بۇل حالىقتى مامانداندىرىلعان كومەكپەن كوبىرەك قامتۋعا مۇمكىندىك بەرەدى. قور باسشىلىعى بۇل يدەيانى قولداپ، ۇيىم وكىلدەرىنىڭ وڭىرلەرگە جۇمىس ساپارلارى اتقارىلعان جۇمىستى قورىتىندىلاپ، جوبالارمەن تانىسۋعا باعىتتالعانىن اتاپ ءوتتى.
وسىعان بايلانىستى قوردىڭ مەديسيناداعى قايىرىمدىلىق قىزمەتىنىڭ نەگىزگى باعىتى – شەتەلدە نەمەسە ەلدىڭ باسقا وڭىرلەرىندە اۋىر ناۋقاستارعا جەكەلەي كومەك كورسەتۋ جانە ەمدەۋ ەمەس، ەمدەۋگە جاعداي تۋعىزۋ، جەرگىلىكتى جەردەگى كلينيكالاردى جاراقتاندىرۋ. ماسەلەن، ۇيىم شىعىس قازاقستان وبلىستىق انا مەن بالا ورتالىعىن نەيروحيرۋرگيالىق جابدىقتارمەن قامتاماسىز ەتۋگە 34،2 ملن تەڭگە كولەمىندە قاراجات ءبولۋدى جوسپارلاپ وتىر. سونداي-اق، ونكولوگيا مەن گەماتولوگيانى جاڭعىرتۋ بويىنشا ءىرى جوبالار كوزدەلگەن.
– جالپى، مەملەكەت تاراپىنان شىعىس وڭىرىندەگى مەديسينانى دامىتۋعا قاراجات بولىنۋدە. سوندىقتان ءقازىر شىعىس قازاقستان وبلىسى ءۇشىن الەۋمەتتىك قولداۋ مەن ءبىلىم بەرۋ بارىنشا وزەكتى، سودان كەيىن سپورت پەن مادەنيەت سالالارى بويىنشا ۇسىنىلاتىن جوبالاردى قاراستىرۋىمىز كەرەك، – دەپ ءتۇسىندىردى سوفيا ايساعالييەۆا.
ءبىلىم تۋرالى ايتا كەلە، «قازاقستان حالقىنا» قورىنىڭ باسقارۋشى ديرەكتورى «تىرەك مەكتەپتەر» جوباسى ەلىمىزدىڭ شىعىسىندا باستالعانىن اتاپ ءوتتى. سونىڭ ارقاسىندا 17 اۋىلدىق مەكتەپتىڭ ماتەريالدىق-تەحنيكالىق بازاسى جاقسارتىلدى، مەكتەپكە دەيىنگى دايارلىق جانە روبوتتى تەحنيكا كابينەتتەرى، مۋلتيمەديالىق كابينەت، STEM-زەرتحانا، زاماناۋي جاڭا زەرتحاناسى بار فيزيكا جانە حيميا كابينەتتەرى سياقتى بارلىق باعىتتار مەن پاندەر بويىنشا جاڭا ۇلگىدەگى كابينەتتەر اشىلدى. ەندى ەلىمىزدىڭ 17 وڭىرىندە وسىنداي 63 مەكتەپ قۇرۋ جوسپارلانعان.
شىعىس قازاقستاندا بۇل جوبانى جۇزەگە اسىرۋدىڭ جارقىن ۇلگىسى – مارقاكولدەگى №1 ورتا مەكتەپ. ەكىنشى كەزەڭدە زايسان، ريددەر قالالارىندا، سونداي-اق سامار، اقجار اۋىلدارىندا تىرەك مەكتەپتەر اشىلادى.
ەرەكشە قاجەتتىلىكتەرى بار بالالارعا ارنالعان ارنايى مەكتەپتەردى جابدىقتاۋعا دا كوپ كوڭىل ءبولىنىپ كەلەدى.
– وتكەن جىلى ولاردىڭ ماتەريالدىق بازاسى شامامەن 193 ملن تەڭگەگە تولىقتى. ءبىزدىڭ تىرەك مەكتەپتەرىمىز 1 ملرد تەڭگەگە جاراقتاندىرىلدى. بۇل – بالالارىمىزدىڭ بولاشاعىن قولداۋ. وسى وڭ تاجىريبە جالعاسۋعا ءتيىس، – دەپ اتاپ ءوتتى وبلىستىق ءبىلىم باسقارماسىنىڭ باسشىسى يننەسا چەرنىشيەۆا.
قور جوبالارىنىڭ ىشىندە وسكەلەڭ ۇرپاقتىڭ تىلدىك قۇزىرەتتىلىگىن، ينجەنەرلىك قابىلەتتەرىن دامىتۋ، سونداي-اق از قامتىلعان وتباسىلاردان شىققان بالالاردىڭ جازعى دەمالىسىن ۇيىمداستىرۋ جانە جوعارى ءبىلىم الۋعا گرانتتار ءبولۋ بويىنشا باعىتتار دا بار. بۇگىنگى تاڭدا شىعىس قازاقستاننىڭ الەۋمەتتىك وسال وتباسىلارىنان شىققان 33 مەكتەپ تۇلەگى «قازاقستان حالقىنا» قورىنىڭ قولداۋى ارقاسىندا جوعارى وقۋ ورىندارىندا ءبىلىم الۋعا مۇمكىندىك الىپ وتىر.
