قازاننىڭ 23-24 كۇندەرى رەسپۋبليكا كۇنىنە جانە قىزىلوردا قالاسىنىڭ قازاق اكسر-نە استانا بولعانىنا 100 جىل تولۋىنا وراي، وبلىس اكىمىنىڭ قولداۋىمەن شۆەيساريانىڭ جەنيەۆا، بەرن قالالارىندا سىر ونەرپازدارىنىڭ كونسەرتى ءوتتى، دەپ حابارلايدى Dalanews.kz.
كونسەرتكە شۆەيسارياداعى شەتەلدىك ەلشىلىكتەردىڭ باسشىلارى مەن قىزمەتكەرلەرى، زيالى قاۋىم وكىلدەرى، جەنيەۆا جانە بەرن قالالارىنداعى قازاق دياسپوراسى، ءبىلىم الۋشى ستۋدەنتتەر مەن جەرگىلىكتى تۇرعىندار قاتىستى.
مەرەكە اياسىندا وبلىستا اۋقىمدى مادەني-كوپشىلىك شارالار ۇيىمداستىرىلعانى بەلگىلى، ەندى ونىڭ لەگى شەتەلدە دە جالعاسۋدا.
بۇل كونسەرتتىڭ ماقساتى – قازاق مادەنيەتىن، ۇلتتىق ونەردى، سىر ءوڭىرىنىڭ جىراۋلىق ءداستۇرىن الەمگە تانىتۋ. وعان ۇلتتىق مۋزىكانىڭ جاۋھارلارىن تورتكۇل دۇنيەگە پاش ەتكەن حالىق اسپاپتار، «توميريس» بي انسامبلدەرى، ايتىسكەر اقىن، ءۇش دۇركىن «التىن دومبىرا» يەگەرى م.نيازوۆ، «قۇرمەت» وردەنىنىڭ يەگەرى ءۇ.مەدەۋوۆا، قازاق ەستراداسىنىڭ جارىق جۇلدىزى ق.مەيرامبەك، مادەنيەت سالاسىنىڭ ۇزدىكتەرى ا.شاعداتوۆ، م.ماقۇلبەكوۆ، ءداستۇرلى ورىنداۋشىلار ءا.قۋاڭبايەۆ، ت.وتەنوۆا، ايتىسكەر-اقىن ب.ورىنباسار، حالىقارالىق جانە رەسپۋبليكالىق كونكۋرستاردىڭ لاۋرەاتتارى م.امانجولوۆ، ا.شادايەۆ، ا.ماحامبەتجان، ا.ءابدى، ا.تورەعالي جانە م.جانتورە، ا.شۇكىروۆ، ج.جۇمابەك، ج.قايىپبەرگەن، ن.رۇستەم ۇلى، ز.نىسانبايەۆ، ت.اياپوۆا قاتىسىپ، ونەر كورسەتتى.
گاسترولدىك ساپار اياسىندا كورەرمەنگە كونسەرتتىك باعدارلامامەن قاتار، قازاقتىڭ ۇلتتىق تاعامدارى، ۇلتتىق ناقىشتا جاسالعان سىي-سياپات ۇسىنىلدى. جۇرتشىلىق تانىم مەن تاعىلىمعا تولى كەش سىيلاعانى ءۇشىن سىربويىلىق ونەرپازدارعا العىس ءبىلدىردى.
ايتا كەتەيىك، وسى جىلى ناۋرىز مەرەكەسىنىڭ تاريحي جانە مادەني ماڭىزىن ءتۇسىندىرۋ، الەم جۇرتشىلىعىنا تانىستىرۋ ماقساتىندا يسپانيا، فينليانديا، ەستونيا مەملەكەتتەرىندە سىر ونەرپازدارىنىڭ كونسەرتى وتكەن بولاتىن.
