داۋىس بەرۋ 26 ساۋىردە وتكەن. "بۇۇ مەن ەۋروپا كەڭەسىنىڭ سەرىكتەستىگى" رەزوليۋسياسىن 122 ەل قولداعان. ولاردىڭ قاتارىندا رەسەيدىڭ سەرىكتەسى سانالاتىن ارمەنيا، برازيليا جانە ءۇندىستان دا بار.

رەزوليۋسيادا "رەسەيدىڭ ۋكرايناعا باسقىنشىلىق جاساعانى"، "بۇعان دەيىن گرۋزياعا اگرەسسيا كورسەتكەنى"، "رەسەيدىڭ قۇرباندارعا شىعىندى وتەۋ مىندەتى" جايلى ايتىلادى.

"ەۋروپا الدىندا تۇرعان ەڭ ۇلكەن ماسەلە بۇۇ مەن ەۋروپا كەڭەسىنىڭ قارىم-قاتىناسىن نىعايتۋدى تالاپ ەتەدى. بۇل ەلدەردىڭ تاۋەلسىزدىگى مەن اۋماقتىق تۇتاستىعىن قۇرمەتتەي وتىرا بەيبىتشىلىك ورناتۋ ءۇشىن، ادام قۇقىعىن ساقتاۋ ءۇشىن، سوعىس كەزىندە حالىقارالىق گۋمانيتارلىق قۇقىقتاردى ساقتاۋ ءۇشىن، حالىقارالىق قۇقىقتى بۇزعانداردى جاۋاپقا تارتىپ، قۇرباندارعا شىعىندى وتەۋ ءۇشىن ماڭىزدى" دەپ جازىلعان رەزوليۋسيانىڭ 9-پاراگرافىندا.

قۇجاتقا رەسەي، بەلارۋس، سولتۇستىك كورەيا، نيكاراگۋا، سيريا قارسى داۋىس بەردى. قىرعىزستان، تاجىكستان جانە وزبەكستان قالىس قالعان ەلدەردىڭ قاتارىندا. رەسەيدىڭ بۇۇ-داعى وكىلى قاراردى "ايىپتاۋى باسىم ساياسيلاندىرىلعان قۇجات" دەپ سىنادى.

ەۋروپا كەڭەسى – ەۋروپا وداعىنىڭ قۇرىلىمىنا كىرمەيتىن حالىقارالىق ۇيىم. ماقساتى – قۇرامىنا ەنەتىن 46 ەلدىڭ اراسىندا ادام قۇقىعىن قورعاۋ، دەموكراتيا، زاڭ ۇستەمدىگى جانە مادەني بايلانىستى نىعايتۋ.

رەسمي استانا رەسەيدىڭ ۋكرايناعا باسقىنشىلىعىنا بايلانىستى بەيتاراپ پوزيسيانى ۇستانىپ وتىر. قازاقستان بيلىگى رەسەيدىڭ ۋكرايناعا سوعىس اشۋىن اشىق سىناعان جوق، ءبىراق ۋكراينانىڭ اۋماقتىق تۇتاستىعىن قۇرمەتتەيتىنىن مالىمدەگەن.

قازاقستان وسىعان دەيىن رەسەيدىڭ ۋكرايناعا اشقان سوعىسىن سىنايتىن قارارلاردىڭ كوبىندە قالىس قالىپ كەلگەن. ال رەسەيدەن ۋكراينا اۋماعىنان اسكەرىن الىپ شىعىپ، اگرەسسيانى توقتاتۋدى تالاپ ەتكەن قارارعا قارسى داۋىس بەرگەن.

https://dalanews.kz/saraptama/88837-bashinskaia-deputattyq-okilettigin-oz