وزبەكستان مەن تاجىكستان بۋكمەكەرلىك بيزنەس پەن وعان قاتىستى قارجىلىق اعىمداردى ءبىر ورتالىقتان رەتتەۋدى ۇسىنعان رەسەيلىك كاسىپكەر ۋمار كرەمليەۆتىڭ (لۋتفۋللويەۆ) قىزمەتىنەن باس تارتتى، دەپ جازادى ۆچك-وگپۋ. ال قازاقستان ءالى دە تۇپكىلىكتى شەشىم قابىلداماعان. بۇل تۋرالى DALA INSIDE ارناسى جازدى.
بۇل ەلدەر وزدەرىنىڭ ۇلتتىق جۇيەسىن قۇرۋدى ءجون كورىپتى. سەبەبى ولاي بولماعان جاعدايدا مالىمەتتەردىڭ كورشىلەس ەلدىڭ ارنايى قىزمەتتەرىنىڭ قولىنا ءتۇسۋ ءقاۋپى تۋىندايتىن ەدى. كوتول جازعانداي، سوڭعى ءبىر جىل ىشىندە كرەمليەۆ ورتالىق ازيادان شىقپاي، بىردە وزبەكستاندا كەڭەستىك بوكسشىلارعا ەسكەرتكىش اشىپ، بىردە تاجىكستاندا جوعارى لاۋازىمدى تۇلعالارمەن كەزدەسىپ، بىردە وزبەك وليمپياداشىلارىنا 100 مىڭ دوللاردان سىيلىق ۇلەستىرىپ جۇرگەن. الايدا مۇنداي جومارت قادامدار ونىڭ باستى جوباسىن - ايماقتىڭ بۋكمەكەرلىك نارىعى مەن قارجىلىق اعىمدارىن باقىلاۋعا الۋ باستاماسىن جۇزەگە اسىرۋعا كومەكتەسپەدى.
كرەمليەۆكە جاقىن دەرەككوزدەردىڭ باعالاۋىنشا، ونىڭ ورتالىق ازياداعى ساياحاتىنا 3 ميلليون دوللاردان استام قاراجات جۇمسالعان.
دەگەنمەن وزبەكستاندا بۇل جوسپار تولىقتاي ءساتسىز اياقتالدى. بۋكمەكەرلىك بيزنەستى زاڭداستىرۋ ماسەلەسىن ۇزاق تالقىلاعان سوڭ، بيلىك ونى ۇلتتىق پەرسپەكتيۆالىق جوبالار اگەنتتىگىنىڭ (ناپپ) قۇزىرەتىنە بەردى.
تاجىكستاندا جاعداي كرەمليەۆ ءۇشىن ودان بەتەر كۇردەلى بولدى. پرەزيدەنتتىڭ ۇلى رۋستام ەموماليمەن كەزدەسۋلەر مەن ءوزىنىڭ تۋعان گيسسار اۋدانىندا جول سالۋ باستاماسىنا قاراماستان، ەلدەگى بۋكمەكەرلىك نارىقتى رەتتەۋ قارجى مينيسترلىگىنىڭ قۇزىرىندا قالا بەردى. ۇزاق كەلىسسوزدەردەن كەيىن تاجىكستان بيلىگى دە رەسەيدىڭ سۋپيس جۇيەسىنەن باس تارتتى. كرەمليەۆتىڭ تاريحي وتانىنداعى قايىرىمدىلىق جوبالارى تاجىكستانعا سۋپيس ورناتۋعا كومەكتەسپەدى.
ەندى قازاقستان كرەمليەۆ ءۇشىن سوڭعى ءۇمىت بولىپ وتىر دەپ وتىر، ۆچك-وگپۋ. بىزدە جاعداي وزگەشە وربۋدە.
بىرنەشە جىلدان بەرى ءباس تىگۋلەردى ەسەپكە الۋدىڭ ءبىرىڭعاي جۇيەسىن (ەسۋ) ەنگىزۋ توڭىرەگىندە داۋ-داماي تولاستار ەمەس. ەل ىشىندەگى دەرەككوزدەر مۇنى كرەمليەۆ پەن رەسەيدىڭ سۋپيس جۇيەسىمەن تىكەلەي بايلانىستىرادى.
سۋپيس بۇگىندە رەسەيدەگى بۇكىل بۋكمەكەرلىك نارىقتى باقىلايدى ءارى ميللياردتاعان تابىس اكەلۋدە. ساراپشىلار "قۇمار ويىنعا تاۋەلدىلىكپەن جانە كولەڭكەلى سحەمالارمەن كۇرەس" دەگەن رەسمي ۇراننىڭ ارتىندا سانكسيا سالىنعان بانكتەرمەن بايلانىستى رەسەيلىك قۇرىلىمداردى قازاقستاننىڭ قارجى جۇيەسىنە كىرىكتىرۋ ارەكەتى تۇر دەپ سانايدى.
قازاقستان ازىرگە ۋمار كرەمليەۆتىڭ ۇسىنىسىنا ناقتى "جوق" دەگەن جوق. دەگەنمەن جۇمىس توپتارىندا وتىرعان كەيبىر شەنەۋىكتەر مۇنداي بىرىزدەندىرۋگە الاڭداۋشىلىق ءبىلدىرىپ وتىر. ال قىرعىزستاندا بۇل ماسەلە ءالى تالقىلانۋ ۇستىندە، ناقتى شەشىم قابىلدانعان جوق.
