ەكولوگيا ۆيسە-مينيسترى نۇركەن شاربييەۆ ۇكىمەت وتىرىسىندا استىق جيناۋ بارىسىنا قاتىستى ءبىر اپتاعا ارنالعان اۋا رايى بولجامىن تانىستىردى. ول سينوپتيكتەردىڭ بولجامى بويىنشا قىركۇيەك ايىنىڭ 23-ىنەن 30-ىنا دەيىنگى ارالىقتا ەلىمىزدىڭ استىق ەگەتىن ايماقتارىندا اۋا رايى ەگىن جيناۋعا جايسىز بولاتىنىن ايتتى، دەپ حابارلايدى Dalanews.kz.
قوستاناي، اقمولا، سولتۇستىك قازاقستان وبلىستارىنىڭ باسىم بولىگىندە وسى كەزەڭ بويى جاڭبىر جاۋادى. اقتوبە وبلىسىندا 26-30 قىركۇيەك ارالىعى، باتىس قازاقستان وبلىسىندا 25-29 قىركۇيەك ارالىعى، قاراعاندى، ۇلىتاۋ وبلىستارىندا 27-30 قىركۇيەك ارالىعى جاۋىن-شاشىندى بولادى.
پاۆلودار وبلىسىندا قىركۇيەكتىڭ 23-25ء-ى جانە 28-30-ى ارالىعىندا جاڭبىر جاۋادى. ەلىمىزدىڭ شىعىسىندا قىركۇيەكتىڭ 23-24ء-ى، 29-30-ى جاڭبىر جاۋادى. جاۋىن-شاشىن كۇندەرى قاتتى جەل بولادى. 23-30 قىركۇيەك ارالىعىندا كۇندىز دە، تۇندە دە اۋا تەمپەراتۋرا بىرتىندەپ تومەندەپ، تۇنگى ۋاقىتتا قىراۋ ءتۇسۋى مۇمكىن.
قازاندا ەلىمىزدىڭ باسىم بولىگىندە ورتاشا ايلىق اۋا تەمپەراتۋراسى قالىپتى دەڭگەيدە بولادى. ال باتىستا، وڭتۇستىك-باتىستا جانە وڭتۇستىك بولىكتە ادەتتەگىدەن جىلى بولادى.
"ەلىمىزدىڭ باتىس، سولتۇستىك، شىعىس جانە وڭتۇستىك-شىعىستاعى تاۋلى وڭىرلەرىندە ءبىر اي بويى ءجيى جاۋىن-شاشىن ءتۇسۋى ىقتيمال. ايتىلعان بولجامداردى ەسكەرە وتىرىپ، استىق جيناۋعا قولايلى كەزەڭدەردى ءتيىمدى پايدالانۋ قاجەت دەپ ەسەپتەيمىز"،- دەدى نۇركەن شاربييەۆ.
