تيمۋر قۇلىبايەۆتىڭ، ۆلاديمير كيم جانە ولەگ نوۆاچۋكتىڭ كومپانيالارى جاڭادان قۇرىلعان قازاقستان ينۆەستورلار وداعىنا ەندى. بۇل تۋرالى جۋرناليست ولەگ چەرۆينسكيي "نەفت ي گاز كازاحستانا. فاكتى ي كوممەنتاريي" اتتى Telegram ارناسىندا جازدى، دەپ حابارلايدى Dalanews.kz.
اتالعان وداققا مىنانداي كومپانيالار مۇشەلىككە سىرتتاي قابىلداندى:
- KAZ Minerals Management (قۇرىلتايشىسى – KAZ Minerals Holding Limited، سوڭعى ەگەسى ۆلاديمير كيم مەن ولەگ نوۆاچۋك بولىپ تابىلادى)؛
- "كيپروس" (قۇرىلتايشىسى - تيمۋر قۇلىبايەۆ)؛
- Halyk Bank (قۇرىلتايشىسى - قۇلىبايەۆتار باقىلايتىن "المەكس" حولدينگتىك توبى)؛
- Petroretail - Qazaq Oil جقس جەلىسى (قۇرىلتايشىسى - يەسى قۇلىبايەۆ بولىپ تابىلاتىن Joint Technologies)؛
- "كاسپيي مۇناي "(قۇرىلتايشىسى - Joint Resources)؛
- PTC Holding (قۇرىلتايشىسى-Joint Technologies).
قازاقستاننىڭ ينۆەستورلار وداعى جاقىندا قۇرىلدى ءارى ونىڭ الەۋمەتتىك جەلىدە پاراقشالارى دا بار. وداقتى قۇرۋ تۋرالى يدەيا 7 اقپاندا پرەزيدەنت قاسىم-جومارت توقايەۆتىڭ ءىرى بيزنەس وكىلدەرىمەن كەزدەسۋىنەن كەيىن جاريا بولدى. مەملەكەت باسشىسى ولاردىڭ سەرپىندى جوبالاردى ىسكە اسىرۋداعى جانە ەكونوميكا وسىمىندەگى شەشۋشى ءرولىن اتاپ ءوتتى. پرەزيدەنتتىڭ العا قويعان مىندەتتەرىن ىسكە اسىرۋ ءۇشىن بيزنەس بىرىگۋ تۋرالى شەشىم قابىلدادى.
جاڭا وداق ەكونوميكانى دامىتۋدىڭ جانە ينۆەستيسيالىق كليماتتى جاقسارتۋدىڭ ستراتەگيالىق ماسەلەلەرىمەن اينالىسادى. ول "اتامەكەن" ۇكپ-نىڭ ورنىن باساتىن نەمەسە ونىمەن باسەكەلەسەتىن ۇيىم بولمايدى. پرەزيدەنتتىڭ تاپسىرماسى بويىنشا، "اتامەكەن" ۇساق جانە شاعىن بيزنەستى قولداۋعا باسا نازار اۋدارا وتىرىپ، ترانسفورماسيالانۋدا. ينۆەستورلار وداعىنىڭ قۇرىلتايشىلارى Kazenergy قاۋىمداستىعى، قازاقستان ەلەكتر ەنەرگەتيكالىق قاۋىمداستىعى، قازاقستاننىڭ قۇرىلىس سالۋشىلار قاۋىمداستىعى بولىپ تابىلادى. 2025 جىلدىڭ سوڭىنا دەيىن 100 ورتا جانە ءىرى كومپانيالار اتالعان وداققا كىرەدى دەپ باجايلانادى. ودان كەيىن بۇل سان 500-گە جەتۋى ءتيىس.
وداقتى قارجىلاندىرۋ ەرىكتى مۇشەلىك جارنالار ەسەبىنەن جۇزەگە اسىرىلادى. وداق بيزنەس مۇددەلەرىن تانىتىپ، شەشىمدەردى ازىرلەۋگە قاتىسادى جانە ەكونوميكالىق رەفورمالارعا جاردەمدەسەدى. قازاقستان كاسىپكەرلەرىنىڭ قۇقىقتارىن قورعاۋ جونىندەگى بۇرىنعى ۋاكىل رۋستام ءجۇرسىنوۆ وداق باسقارماسىنىڭ ءتوراعاسى بولىپ تابىلادى.
