جولداۋدىڭ ماڭىزى، پارمەنى ونىڭ دەر كەزىندە، تياناقتى ورىندالۋىنا تىكەلەي بايلانىستى. مەملەكەت ءۇشىن ستراتەگيالىق ءمانى ەرەكشە بۇل قۇجاتتاعى تاپسىرمالار تىڭعىلىقتى جۇزەگە اسقان سايىن جولداۋدىڭ قۇندىلىعى ارتا بەرەدى.
پرەزيدەنت قاسىم-جومارت توقايەۆتىڭ جىل سايىنعى جولداۋلارىنان ءبىلىم مەن عىلىم، مەكتەپ پەن مۇعالىمدەر، جاستار تاربيەسىنە قاتىستى ماسەلە ءبىر ءسات تە شەت قالعان ەمەس.

بىلتىرعى "ادىلەتتى قازاقستاننىڭ ەكونوميكالىق باعدارى" اتتى جولداۋىندا دا پرەزيدەنت "جايلى مەكتەپ" جوباسىن جانداندىرۋ، "ۇلتتىق قور – بالالارعا" جوباسىن ساپالى جۇزەگە اسىرۋ قاجەتتىگىن قاپەرگە سالىپ، ىسكە اسىرۋدىڭ ناقتى باعىت-باعدارىن كورسەتتى. وسى تاپسىرمالارعا وراي ەلىمىزدە 400-گە جۋىق "جايلى مەكتەپ" سالۋ جوسپارلانعان ەدى.

پرەزيدەنت ءوز جولداۋىندا "ساپالى ورتا ءبىلىم الۋ – ءاربىر بالانىڭ مىزعىماس قۇقىعى. مۇنداعى ەڭ ءتۇيىندى ءسوز – "ساپا". سوندىقتان ءبىلىم ساپاسىن جاقسارتۋ جانە مۇعالىمدەردىڭ بىلىكتىلىگىن ارتتىرۋ اۋاداي قاجەت"، – دەدى.

"جايلى مەكتەپ" جوباسىن جۇزەگە اسىرۋ ەكى كەزەڭگە جوسپارلانعان. بۇل جوبا ەلىمىزدىڭ ءبىلىم سالاسىن باتىستىق ستاندارتقا جاقىنداتۋدىڭ ءبىر قادامى. ءارى فينليانديا، گەرمانيا، جاپونيا سياقتى وركەنيەتتى ەلدەردىڭ وقۋشىلارىنا جاسالعان جاعدايعا جەتۋ ماقساتىندا قولعا الىنعان شارا.

شىنىن ايتساق، جولداۋدان كەيىن ءبىراز ۋاقىت ەنتۋزيازم بولدى. "جايلى مەكتەپتەر" جەمقورلاردان تۇسكەن قاراجاتقا سالىنادى دەگەندە ەكى ەسە قۋاندىق. جەر-جەرلەردەن وسىنداي كەرەمەت ءبىلىم وشاقتارىنىڭ سالىنىپ، بالالارعا ەسىگىن اشىپ جاتقانىن كورگەندە كوكىرەگىمىزدى قۋانىش كەرنەدى. سەبەبى مۇنداي مەكتەپتەردە بالالاردىڭ جان-جاقتى ساپالى ءبىلىم الىپ قويماي، كوڭىل كوكجيەگىن كەڭەيتۋىنە، ءبىلىم، عىلىمعا دەگەن قىزىعۋشىلىعىن ارتتىرۋىنا بارلىق جاعداي جاسالعان. وسىنداي بارلىق مۇمكىندىك ەسكەرىلگەن "جايلى مەكتەپتەردە" ەڭبەك ەتۋ ارىپتەستەرىمىزگە دە قۋانىش سىيلايتىنى راس. ءدال وسىنداي يگىلىك جولداۋدا جوسپارلانعانداي بارلىق وڭىرلەردە جاسالسا نۇر ۇستىنە نۇر بولماق. سونىڭ ىشىندە الماتى وبلىسىنا دا "جايلى مەكتەپكە" سۇرانىپ تۇرعان جەرلەر بار. مىسالى الماتى وبلىسى، ەڭبەكشىقازاق اۋدانى، ازات سەلوسىندا جايلى مەكتەپ سالۋ جوسپارلانىپ ەدى. 1923 جىلى سالىنعان بۇل مەكتەپ بالشىقتان سوعىلعان. ءوڭىر حالقى وسى كونە مەكتەپتىڭ ورنىنا سالىناتىن "جايلى مەكتەپتىڭ" ىرگەتاسى قالاناتىن كۇندى اسىعا كۇتىپ ءجۇر. پرەزيدەنت تاپسىرماسى ورىندالسا، جايلى مەكتەپتە ءبىلىم الساق دەگەن بالالاردىڭ دا ارمانى شىندىققا اينالادى.

ءبىلىم سالاسىنداعى ماسەلەلەر تەك "جايلى مەكتەپ" سالۋمەن شەشىلمەيدى. ونىڭ باستىسى مەنەدجمەنت پەن كادرلار. سوندىقتان دا الداعى پرەزيدەنت جولداۋىندا مۇعالىمدەردىڭ كاسىبي بىلىكتىلىگىن ارتتىرۋ، ۇستاز مادەنيەتى مەن مارتەبەسى، مەكتەپتەردەگى ءتارتىپ مەن مەكتەپ ورتاسىنداعى پسيحولوگيالىق احۋالدى وڭالتۋ شارالارى ءۇشىن دە جۇيەلى تاپسىرمالار ايتىلسا قۇبا-قۇپ بولار ەدى.

مۇعالىمدەردىڭ كاسىبي بىلىكتىلىگىنە قويىلاتىن تالاپتار ءالى دە كۇشەيتىلۋى ءتيىس. ەگەر باسشىسى قىرسىز بولسا ون جەردەن جايلى بولسىن ول مەكتەپ پرەزيدەنت جۇكتەگەن مەجەدەن تابىلا المايدى. سوندىقتان مەملەكەت باسشىسىنىڭ تاپسىرماسى ناتيجەلى بولسىن دەسەك، مەكتەپ ديرەكتورىنان باستاپ، قاراپايىم مۇعالىمدەردى جۇمىسقا الۋ، اتتەستاسيادان وتكىزۋ تەتىكتەرى اشىق كونكۋرستىق نەگىزدە ءادىلءوتۋى كەرەك. الداعى مەملەكەت باسشىسىنىڭ جولداۋىندا اسىرەسە، مەكتەپ باسشىلارى، مەكتەپ پيسحولوگى، مەكتەپتىڭ تاربيە ىسىمەن اينالىساتىن ماماندارىنىڭ قىزمەتكە الىنۋ پروسەرادۋراسى قاتاڭ باقىلاۋمەن جۇرەتىندەي ناقتى ءىس-جوسپار ۇسىنىلۋى ءتيىس دەپ ويلايمىن. مەكتەپتەگى بالالاردى تاماقتاندىرۋمەن اينالىساتىن كومپانيالاردىڭ جۇمىسى دا كوڭىل ءبولۋدى قاجەت ەتەتىن سالا. سونىمەن قاتار، ءبىلىم سالاسىنداعى جەمقورلىقتىڭ جولىن كەسۋ دە كەزەك كۇتتىرمەس ءىس. وسىنداي وزەكتى ماسەلەلەرگە شەشىمدەر پرەزيدەنت جولداۋىندا كورىنىس تابادى دەپ سەنەمىز.  

سۇلتان سۇلەيەۆ،

ءبىلىم بەرۋ ءىسىنىڭ ۇزدىگى

الماتى وبلىستىق سالالىق كاسىپوداقتار ۇيىمىنىڭ ءتوراعاسى