بۇگىندە ءبىلىم وشاقتارىن وقۋلىقپەن قامتاماسىز ەتۋ ءىسى كەزەڭ-كەزەڭىمەن جۇزەگە اسىپ كەلە جاتسا كەرەك. «وقۋلىقتاردى قايتا باسىپ شىعارۋدىڭ ءتورت جىلدىق سيكلىنا بايلانىستى، قازىرگى تاڭدا جۇمىستار وقۋلىقتاردى ساتىپ الۋ ارقىلى ىسكە اسۋدا. مەكتەپ كىتاپحانالارىنىڭ كىتاپ قورى وقۋ پاندەرىنىڭ سانىنا، سىنىپتاعى وقۋشىلار سانىنا بايلانىستى قالىپتاسۋدا. استانا جانە الماتى قالالارى، جامبىل، ماڭعىستاۋ، اتىراۋ، باتىس قازاقستان جانە پاۆلودار وبلىستارى وقۋلىقپەن تولىق قامتاماسىز ەتىلگەن. باسقا وڭىرلەردە، ماسەلەن سولتۇستىك قازاقستان، الماتى، قوستاناي، اقمولا وبلىستارىندا ءالى دە ماسەلەلەر بار»، – دەدى ا. ءسارىنجىپوۆ.
اسلان ءسارىنجىپوۆ: "وقۋلىقتارمەن تەگىن قامتاماسىز ەتۋ رەسپۋبليكا بويىنشا 96،4 پايىزدى قۇرايدى" دەيدى. ءبىراق بۇعان ءبىزدىڭ كۇدىگىمىز بار.
ءوز كەزەگىندە مينيستر وقۋلىقتاردى تەگىن قامتاماسىز ەتۋ رەسپۋبليكا بويىنشا 96،4 پايىزدى قۇرايتىنىن دا ايتتى. ءبىراق بۇعان ءبىزدىڭ كۇدىگىمىز بار. جالپى جاڭا وقۋ جىلى باستالعاندا وقۋلىققا قاتىستى ۇلكەن داۋدىڭ باسى قىلتيىپ، ءبىرازعا دەيىن بىقسىپ بارىپ باسىلاتىنى بەلگىلى. سوڭعى جىلدارى وقۋلىق ۇلكەن بيزنەستىڭ كوزىنە اينالعانى جاسىرىن ەمەس. ءقازىر جىلدا وقۋلىق جازۋ سانگە اينالعان. ورتاق جۇيە جوق. ءبىر مەكتەپ «اتاماۇرا» باسپاسىنىڭ وقۋلىعىمەن بالالاردى وقىتسا، كورشى مەكتەپ «مەكتەپ» باسپاسىنىڭ وقۋلىقتارىن پايدالانعاندى ءجون كورەدى. وسىلايشا مەكتەپ وقۋلىقتارى باسپاسىنا، اۆتورىنا قاراي بولىنەتىن بولعان. بيىل كىشكەنتاي قىزىمىز مەكتەپ تابالدىرىعىن اتتاپ، دايىندىق بولىمىنە باردى. قاجەتتى كورنەكىلىك وقۋ قۇرالدارىنىڭ سانى 13-كە جەتەتىنىن ەستىگەندە سەنە المادىم. سوڭىن الا ۇيگە الىپ كەلگەن كىتاپتارىن ساناعاندا راس ەكەنىنە كوزىم جەتتى. باياعىدا ءبىز دە دايىندىقتا وقىدىق. سول كەزدە 20 شاقتى ءارىپتى قامتىعان شاعىن الىپپەمەن ساۋاتىمىزدى اشقانىمىز ءالى ەسىمدە. سوندا ءبىزدىڭ سول كەزدەگى قابىلەت-قارىمىمىز تومەن بولعانى ما؟ سويتسەم بۇنىڭ قابىلەتكە تۇك قاتىسى جوق ەكەن. بار ماسەلە بيزنەسكە بارىپ تىرەلەتىنىن كەيىننەن ۇقتىم. كىتاپ كوپ بولعان سايىن باسپالارعا اقشا كوبىرەك تۇسەتىن بولسا كەرەك. ال قۇزىرلى ورىندار بولسا بۇل ءىسىن جاستارعا زاماناۋي ءبىلىم بەرۋمەن بۇركەمەلەيدى. ءتىپتى، «باتىستا سولاي، بىزدەدە سولاي بولۋى كەرەك» دەپ، قىسقا عانا جاۋاپ قايىرادى. وركەنيەتتىڭ كوشىنەن قالماۋ ءۇشىن جانتالاسىپ، بازار جاعالاپ، كىتاپ ساتىپ الۋعا ۇمتىلاسىڭ.
بەكەر وبالى عانا 13 كىتاپتىڭ 12ء-ىن مەكتەبى تەگىن بەردى. تەك بىرەۋىن عانا ساتىپ الدىق. سودان الگى كورنەكى قۇرالداردى پاراقتاعانىمدا ولاردىڭ ءبارى ستامبۋلدا باسىلعانىن كورىپ تاڭعالدىم. ادەتتە قازاقستان ورتالىق ازيانىڭ ءبىرقاتار ەلىنىڭ ۆاليۋتالارىن باسىپ جاتىر دەپ ماقتانعانىمىزدا كەۋدەمىزگە نان پىسەردەي بولادى. ال دايىندىققا باراتىن بالالاردىڭ شاعىن كىتاپشاسىن تۇركيادا باسقانىمىز قالاي؟ كىتاپ باسۋ اقشا باسقاننان قيىن بولعانى ما؟ كىتاپ پەن وقۋلىق باسۋعا سونشالىقتى يندۋستريالدىق-يننوۆاسيالىق باعدارلاما كەرەك ەمەس شىعار... ەندەشە، بىزدىكى قانداي اۋمەسەرلىك؟!
جاربول كەنت ۇلى.
