سەبەبى، تىلگە كەلگەندە ءدال رۋزا سياقتى تاباندىلىق تانىتا المايدى ولار. جانىندا جۇرە المايدى. سودان شىعار رۋزا جالعىز. كەرەكۋدەگى ءتىل ءۇشىن شىن كۇرەسىپ جۇرگەن ادام ءبىر بولسا، ول – رۋزا. ءبىزدىڭ سايت بۇل تۋرالى تالاي مارتە جازدى. رۋزانىڭ ءتىل مايدانىنداعى كۇرەستە قانداي تاۋەكەلدەرگە بارعانىن كوزى قاراقتى وقىرمان جاقسى بىلەدى.
بۇل جولى قامشى سايتىنا سۇحبات بەرگەن رۋزا "ءتىل مايدانىندا جەڭىسكە جەتۋ ءۇشىن بىزدە ەكى جول عانا بار" دەگەن پىكىر ءبىلدىرىپتى. ءتىل تاقىرىبى قانى سورعالاپ تۇرعان ماسەلەنىڭ ءبىرى بولعاندىقتان دا سۇحباتتى كوشىرىپ باستىق. ىقشامدادىق. سونىمەن رۋزا نە دەيدى؟
ءبىز كىمبىز؟
ءتىلدى تۇعىرعا قوندىرۋ ءۇشىن بىزدە ەكى جول بار. جەڭىل جولى – بيلىككە مەملەكەت تىرەگىن ۇستاپ تۇراتىن، ۇلتىنىڭ وشپەۋىن، كەرىسىنشە، ءوسىپ ءونۋىن تىلەيتىن جان كەلۋى كەرەك. ال اۋىرى – حالىق ساناسى جاپپاي ويانىپ، ۇلتتىق سانامىز ءوسۋى كەرەك. ول ءۇشىن تالاي جىل قاجەت. بەلسەندىلەر حالىقتىڭ ساناسىن وياتۋ ماقساتىندا ناسيحات جۇمىستارىن جۇرگىزگەنى ابزال. ءبىراق بۇل پروسەستەرگە بيلىكتىڭ كەدەرگى كەلتىرەتىنى ءسوزسىز.
مەنىڭ ويىمشا، سوۆەتتىك ۇلت سيندرومىنان ارىلا الماي جۇرگەن، ءوزىن، ۇلتىن كەم كورەتىن، ءالى كۇنگە كورشىگە جالتاقتاپ وتىرعان شەنەۋنىكتەر مەملەكەكەتتىڭ ءتىلدىڭ قاس جاۋى.
بىلتىر مامىردا پرەزيدەنتىمىز: «ورىسشا سۇراققا قازاقشا جاۋاپ بەرەتىندەر جاۋاپقا تارتىلادى»، - دەدى.
سول سوزدەن كەيىن تىلدىك احۋال ۋشىعىپ كەتتى. ورىستار: «ۆى ۆيديتە، چتو يا رۋسسكايا. نە سمەيتە گوۆوريت نا سۆوەم يازىكە. سام پرەزيدەنت نازاربايەۆ سكازال»، - دەسە، ۇندەي المايتىن بولدىق.
مەملەكەتتىك ءتىلىن قاي ەل باسىندىرىپ قويۋشى ەدى؟
كونستيتۋسيا بويىنشا، ورىسشا تىلىندەگى سۇراققا قازاق تىلىندە جاۋاپ بەرۋ زاڭ بۇزۋشىلىققا جاتپايدى.
قالىپتاسقان جاعدايعا كونە بەرسەك، قۇلدان نە ايىرمامىز قالادى؟ سولتۇستىك وڭىرگە ابدەن ۇلتسىزدانعان، ءوز ءتىلىن تۇسىنبەيتىن، سوعان ورشەلەنە قارسى تۇراتىن ماڭگۇرتتەر جينالعان.
ءتىل مايدانىندا جۇرگەنىمە 13 بولدى
مەملەكەتتىك تىلىممەن ءومىر ءسۇرۋ ۇردىسىنە 2005 جىلى اياق باستىم، ەندى كەرى شەگىنەرگە جول جوق. ارينە، ەلىمىزدە 100 پايىز قازاقشا قوعام قۇرۋ مۇمكىن ەمەس. سوندىقتان تۇسىنگەنگە ءيىلىپ، تۇسىنبەگەندەردى جونگە سالىپ كەلە جاتقان ارپالىس ءومىر مەنىكى.
كەز كەلگەن جيىندا ورىسشا سايراعان قازاقتى كورسەم بولعانى، «قاشان ءوز-وزىمىزدى ۇلت رەتىندە سىيلاپ، ءوز تىلىمىزدە ءومىر سۇرەمىز؟»، - دەپ سۇراۋدان جالىقپايمىن.
ءوز جەرىمدەگى جيىن-تويلاردا قازاقشا اندەردى سۇرايمىن دەپ بالەگە قالعان كەزىم دە كوپ.
ال وتباسىما كەلسەك، باسقا انالارعا ءتان سەزىم مەندە دە بار. ءبىراق وتباسىما كەسىرى تيەدى ەكەن دەپ قول قۋسىرىپ وتىرۋ ويىمدا جوق. بۇل جولدان باس تارتقانىم «بولاشاقتا ۇرپاعىمىز مەملەكەتسىز، اركىمنىڭ ەسىگىنە قاراپ ءومىر ءسۇرسىن» دەگەنىممەن تەڭ عوي.
باقاۋوۆ...
كەرەكۋ دەگەن اتاۋدى اكىم-قارالار ماڭىنا دا جولاتپايدى. قانشا ارىزدانعانىممەن، ناتيجەسىز بولىپ وتىر. ارينە، رۋزا بەيسەنبايتەگىنىڭ ماسەلەسىنەن دە وزگە قيىندىقتار جەتىپ ارتىلادى ەمەس پە؟!
12 جىل بويى 6،5 كەلى حات جازدىم، تۇك شىقپادى.
مەملەكەتتىك ءتىلدىڭ اياققا تاپتالعانى ءۇشىن ترامۆاي جولىن بوگەگەنىم بار ەدى ءبىر كەزدەرى. سول جاعدايدان كەيىن تەلەفونىمنىڭ ار جاعىنان بوتەن دىبىستار ەستيتىن بولدىم. مەنىڭ كىممەن سويلەسكەنىمنىڭ ءبارى تىڭدالىپ ءجۇرىپتى
ءبىز جاقتا كوپشىلىك قازاقشا سويلەگەن ادامدى تەرروريست رەتىندە قابىلدايدى، جەرگىلىكتى بيلىكتىڭ قازاق ءتىلىن بىلمەگەنى بىلاي تۇرسىن، حالقىنان ونى قۇرمەتتەۋىن دە سۇرامايدى.
پاۆلودار وبلىسىنىڭ بۇرىنعى اكىمىنىڭ ورىنباسارى رىستى جۇمابەكوۆانىڭ كەزىندە «قازاق ءتىلى دەپ اۋىزدارىڭدى اشۋشى بولماڭدار»، - دەگەن ساياسات قالىپتاسقان.
سودان بەرى حالىق اراسىندا دا، بيلىك اراسىندا دا ورىس ءتىلىنىڭ مەرەيى ۇستەم. مۇنداي قالىپتاسقان جۇيەدە وبلىس اكىمىن سوتقا بەرىپ، جەڭىپ شىعۋ مۇمكىن ەمەس.
ءتىل ءۇشىن كۇرەسۋ – مەن ءۇشىن جۇمىسىم ەمەس، ءومىرىم.
