بۇگىنگى تاڭدا وتباسى بانك "ناۋرىز" باعدارلاماسى بويىنشا بارلىعى 1 047 كرەديتتىك ءوتىنىمدى ماقۇلدادى. العاشقى زاەم كىسى قولىنا ءتيىپ تە ۇلگەردى، دەپ حابارلايدى Dalanews.kz بانكتىڭ باسپا ءسوز قىزمەتىنە سىلتەمە جاساپ.
بيىلعى جىلعى "ناۋرىز" باعدارلاماسى بويىنشا العاشقى قولجەتىمدى نەسيەنى باتىس قازاقستان وبلىسىنىڭ 26 جاستاعى تۇرعىنى بەكسۇلتان قازيۋللين رەسىمدەدى. ول جەدەل مەديسينالىق جاردەم ستانسياسىندا فەلدشەر بولىپ جۇمىس ىستەيدى. وبلىس تۇرعىنى ورالدا باستاپقى نارىقتان ونلاين-يپوتەكا ارقىلى پاتەر ساتىپ الدى.
بانك سايتىنداعى مالىمەتكە سۇيەنسەك،"ناۋرىز" باعدارلاماسىنا قاتىسۋشىلار تىزىمىنە 12 000 قازاقستاندىق ىلىنگەن، ونىڭ 4 577ء-سى نەمەسە 38،1% تۇرعىن ۇيگە كەزەكتە تۇر. ولاردىڭ جارتىسىنا جۋىعى (16،8%) حالىقتىڭ الەۋمەتتىك وسال ساناتىنا جاتادى.
باعدارلاماعا قاتىسۋشىلاردىڭ كوپشىلىگى رەسپۋبليكالىق ماڭىزى بار – استانا، الماتى جانە شىمكەنت قالالارىندا تۇرادى. بۇل - 7880 ادام. وبلىستىق ماڭىزى بار قالالاردان باعدارلاماعا 3 506 ادام كىردى، تاعى 560 بانك كليەنتى اۋدانداردا جانە 54 سالىمشى مونوقالالاردا تۇرادى. قاتىسۋشىلاردىڭ باسىم بولىگى نەمەسە 7 112 ادام - 35 جاسقا دەيىنگى (قوسا العاندا) جاس قازاقستاندىقتار. ولار، ادەتتە ۇيلەنگەن جانە بالالارى بار بولىپ كەلەدى. "ناۋرىز 2025" باعدارلاماسىنا قاتىسۋشىلار پۋلىندا 25% - تۇرعىن ءۇي تولەمدەرىن الۋشىلار، ياعني اسكەري قىزمەتشىلەر مەن ارناۋلى مەملەكەتتىك ورگانداردىڭ قىزمەتكەرلەرى.
ەڭ ۇنەمشىل سالىمشىلاردىڭ "ناۋرىز" باعدارلاماسىنا قاتىسۋشىلاردىڭ تىزىمىنە ەنۋ مۇمكىندىگى جوعارى ەكەنىن ەسكە سالا كەتەلىك.
ۇپايلار قالاي ەسەپتەلەدى؟
- سالىم بويىنشا سىياقى مولشەرى - ءاربىر 1 000 تەڭگە ءۇشىن 1 ۇپاي؛
- تىركەلگەن نەكەنىڭ بولۋى - 5 ۇپاي؛
- بالالاردىڭ بولۋى - 10 ۇپاي (بالالار سانىنا قاراماستان)؛
- حالىقتىڭ الەۋمەتتىك وسال توپتارى (ءحاوت) مارتەبەسىنىڭ بولۋى - 10 ۇپاي؛
- 35 جاسقا دەيىنگى جاس (قوسا العاندا) – 5 ۇپاي.
مىسالى، 1000 بالل جيناۋ ءۇشىن سالىم بويىنشا سىياقى تۇرىندە وتباسى بانكىندەگى دەپوزيتتە 1 ملن تەڭگە جيناۋ قاجەت. بانكتەگى سىياقى كاپيتالداندىرىلادى، ياعني ەسەپتەلگەن سىياقىعا سىياقى دا ەسەپتەلەدى. سىياقى مولشەرى - جىلدىق 2% (مەملەكەتتىك سىيلىقاقىنى ەسكەرە وتىرىپ، جتسم 2،4%-دان 14%-عا دەيىن). دەپوزيتتە 1 ملن تەڭگە كولەمىندە سىياقى جيناقتاۋ ءۇشىن كەمىندە 5 جىل ىشىندە 10 ميلليون تەڭگە جوسپارلى تۇردە جيناقتاۋ قاجەت.
بانكتىڭ اۆتوماتتى جۇيەسى ۇپايلاردى ۇلكەن ماننەن كىشىگە دەيىن باعالايدى. بيىلعى جىلى ەڭ جوعارى بالل 1 421،29، وتكەن جىلى 1 032،44 قۇرادى.
بۇعان دەيىن تاعى 12 مىڭنان استام قازاقستاندىق "ناۋرىز" تۇرعىن ءۇي باعدارلاماسىنىڭ قاتىسۋشىسى اتانعانىن جازعانبىز.
