قازاقستان مۇسىلماندارى ءدىني باسقارماسى (قمدب) سوڭعى ۋاقىتتا قوعامدا قىزۋ تالقىلانعان مالىمدەمەلەرگە قاتىستى رەسمي تۇسىنىكتەمە بەردى، دەپ حابارلايدى Dala News.
مۋفتيات وكىلدەرى جەكەلەگەن ادامداردىڭ ارەكەتتەرى مەن پىكىرلەرى يسلام دىنىنە تەلىنبەۋى ءتيىس ەكەنىن اتاپ ءوتتى.
«يسلامدا كەمشىلىك جوق، كەمشىلىك ادامدا. جەكەلەگەن ادامداردىڭ قاتەلىگى ءدىننىڭ نەمەسە قمدب-نىڭ ۇستانىمى ەمەس»، – دەلىنگەن مالىمدەمەدە.
سونداي-اق قمدب قوعامدا رەزونانس تۋدىرعان كۋربانالي احمەتكە قاتىستى دا ناقتى پوزيسيا ءبىلدىردى. مۋفتيات ونىڭ ۇيىمعا ەش قاتىسى جوق ەكەنىن مالىمدەدى.
«كۋربانالي احمەت قمدب جۇيەسىندە جۇمىس ىستەمەيدى، ونىمەن ەشقانداي بايلانىسىمىز جوق»، – دەپ اتاپ ءوتتى باسقارما.
مۋفتيات ناۋرىز مەيرامىنا قاتىستى دا ناقتى ۇستانىمىن جەتكىزدى. وندا ۇلتتىق مەرەكەنىڭ يسلام قاعيدالارىنا قايشى كەلمەيتىنى ايتىلعان.
«ناۋرىز – قازاق حالقىنىڭ ۇلتتىق مەيرامى. ونى اتاپ وتۋگە ءدىن تۇرعىسىنان تىيىم جوق. بۇل مەرەكەگە قارسى پىكىرلەر ءبىزدىڭ كوزقاراسىمىزدى بىلدىرمەيدى»، – دەلىنگەن حابارلامادا.
قمدب وكىلدەرى سونىمەن قاتار سالافيزم، ۆاححابيزم جانە تاكفيريزم سەكىلدى اعىمداردىڭ ءدىن اتىنان پىكىر ايتىپ جۇرگەنىنە الاڭداۋشىلىق ءبىلدىرىپ، ولارعا قارسى ءتۇسىندىرۋ جانە الدىن الۋ جۇمىستارى جۇرگىزىلىپ جاتقانىن جەتكىزدى.
ايتا كەتەيىك، بۇعان دەيىن قوعامدا ناۋرىزعا قاتىستى داۋلى پىكىرلەر ايتقان تۇلعالارعا بايلانىستى ءىس قوزعالىپ، ولاردىڭ كەيبىرى جاۋاپكەرشىلىككە تارتىلعان. سونىمەن قاتار ءماجىلىس دەپۋتاتى ەرمۇرات باپي بۇل ماسەلەگە قاتىستى باس پروكۋراتۋرا مەن قمدب-عا رەسمي ساۋال جولداعان.
