قىرعىزستاندا بلوگەر اكتيلەك وروزبەكوۆ پەن Kulikov كونديتەرلىك جەلىسى اراسىنداعى تىلگە قاتىستى داۋ تاراپتاردىڭ تاتۋلاسۋىمەن اياقتالدى، دەپ حابارلايدى Dalanews.kz.
بۇل ماسەلە جەلىگە قاراستى مەكەمەلەردىڭ بىرىندە بولعان وقيعادان كەيىن باستالعان. الەۋمەتتىك جەلىلەردە "تىلدىك پاترۋل" اتانىپ كەتكەن وروزبەكوۆ مەملەكەتتىك تىلدە قىزمەت كورسەتۋدى تالاپ ەتكەن.
كومپانيا وكىلدەرىنىڭ ايتۋىنشا، بۇعان دەيىن بەلسەندىگە قاتىستى بەرىلگەن ارىز كەرى قايتارىلعان. "كۋليكوۆ" كونديتەرلىك ءۇيىنىڭ رەسمي وكىلى جانجال كەلىسسوزدەر ناتيجەسىندە رەتتەلگەنىن، تاراپتار ءوزارا تۇسىنىستىككە كەلگەنىن اتاپ ءوتتى.
اكتيلەك وروزبەكوۆ تە مۇنى راستاعان. ونىڭ سوزىنشە، كومپانياعا دا، ونىڭ قىزمەتكەرلەرىنە دە ەشقانداي شاعىمى جوق. بەلسەندىنىڭ ايتۋىنشا، بۇعان دەيىنگى جاعداي ءوزارا تۇسىنبەۋشىلىكتەن تۋىنداعان.
سونىمەن قاتار، وروزبەكوۆ ءوزىنىڭ قىزمەتى قىرعىز ءتىلىن دامىتۋ مەن ناسيحاتتاۋعا باعىتتالعانىن، قانداي دا ءبىر قاقتىعىس تۋعىزۋدى ماقسات ەتپەگەنىن جەتكىزدى. ول الداعى ۋاقىتتا مۇنداي ماسەلەلەر ديالوگ ارقىلى، ءوزارا قۇرمەت اياسىندا شەشىلەدى دەگەن ءۇمىت ءبىلدىردى.
