پرەمەر-مينيستر ولجاس بەكتەنوۆ الماتىدا يادرولىق فيزيكا ينستيتۋتىنىڭ جۇمىسىمەن تانىسىپ، اتوم سالاسىنداعى عىلىمي ينفراقۇرىلىمدى كۇشەيتۋگە باعىتتالعان جوبالاردىڭ ورىندالۋىن تەكسەردى، دەپ حابارلايدى Dalanews.kz.
ۇكىمەت باسشىسى مەملەكەت باسشىسىنىڭ تاپسىرماسىنا سايكەس، اتوم سالاسىنداعى قولدانبالى جانە جوعارى تەحنولوگيالىق باعىتتاردى دامىتۋ بارىسىن باعالادى. نەگىزگى ماقسات – زەرتتەۋ ينفراقۇرىلىمىن قالىپتاستىرۋ جانە سالانىڭ عىلىمي-تەحنولوگيالىق الەۋەتىن ارتتىرۋ.
الماتىداعى يادرولىق فيزيكا ينستيتۋتىندا بەكتەنوۆ جاڭا بۋىن رەاكتورلارىنا ارنالعان ماتەريالداردى سىناۋ، يادرولىق تەحنولوگيالاردى مەديسينا مەن ونەركاسىپتە قولدانۋ باعىتىنداعى جۇمىستارمەن تانىستى. ينستيتۋت بازاسىندا 11 نەگىزگى ەكسپەريمەنتتىك قوندىرعى، ونىڭ ىشىندە ۆۆر-ك زەرتتەۋ رەاكتورى، ۇدەتكىش كەشەندەر مەن راديواكتيۆتى قالدىقتاردى ساقتاۋ ينفراقۇرىلىمى جۇمىس ىستەيدى.
بۇگىندە بۇل ورتالىق قازاقستانداعى راديوفارمپرەپاراتتاردىڭ جالعىز ءوندىرۋشىسى سانالادى. مۇندا يود-131 جانە تەحنەسيي-99m نەگىزىندەگى پرەپاراتتار شىعارىلادى. ولار قالقانشا بەزى اۋرۋلارىن ەمدەۋگە جانە ءتۇرلى ورگانداردى دياگنوستيكالاۋعا قولدانىلادى. ينستيتۋت ەلدىڭ راديوفارمپرەپاراتتارعا دەگەن سۇرانىسىنىڭ شامامەن 85 پايىزىن قامتاماسىز ەتەدى.
پرەمەر-مينيسترگە راديواكتيۆتى ماتەريالدارمەن جۇمىس جۇرگىزىلەتىن ارنايى «ىستىق كامەرالار» كورسەتىلدى. مۇندا وبلۋچەننىي قۇرىلعىلاردى بولشەكتەۋ، وڭدەۋ جانە قايتا دايىنداۋ ءقاۋىپسىز جاعدايدا جۇزەگە اسىرىلادى. ينستيتۋت ديرەكتورى سايابەك ساحييەۆتىڭ ايتۋىنشا، بۇل ونىمدەر جىل سايىن 18 مىڭنان استام ناۋقاستىڭ دياگنوستيكاسى مەن ەمىنە پايدالانىلادى، ال ءبىرقاتار راديويزوتوپتار ەۋروپا مەن اقش-قا ەكسپورتتالادى.
ساپار بارىسىندا عىلىم جانە جوعارى ءبىلىم ءمينيسترى ساياسات نۇربەك عىلىمدى قاجەت ەتەتىن اۋماقتاردى دامىتۋ تۇجىرىمداماسىن تانىستىردى. پيلوتتىق الاڭ رەتىندە ءدال وسى يادرولىق فيزيكا ينستيتۋتىنىڭ اۋماعى تاڭدالعان. مۇندا عىلىمي-تەحنولوگيالىق پارك قۇرۋ، جوعارى بىلىكتى كادرلار تارتۋ جانە ازىرلەمەلەردى كوممەرسيالاندىرۋ كوزدەلىپ وتىر.
ينستيتۋت اۋماعىندا وتكەن جىلى 166 ادامعا ارنالعان زاماناۋي جاتاقحانا سالىنعان. ولجاس بەكتەنوۆ جاڭا نىساندى ارالاپ كورىپ، مۇنداي ينفراقۇرىلىم عىلىمعا كەلەتىن جاستاردى تارتۋعا جانە ەلدەگى يادرولىق كلاستەردى دامىتۋعا سەرپىن بەرەتىنىن اتاپ ءوتتى.
