Premer-ministr Oljas Bektenov Almatyda Iadrolyq fizika institýtynyń jumysymen tanysyp, atom salasyndaǵy ǵylymi infraqurylymdy kúsheitýge baǵyttalǵan jobalardyń oryndalýyn tekserdi, dep habarlaidy Dalanews.kz.
Úkimet basshysy Memleket basshysynyń tapsyrmasyna sáikes, atom salasyndaǵy qoldanbaly jáne joǵary tehnologiialyq baǵyttardy damytý barysyn baǵalady. Negizgi maqsat – zertteý infraqurylymyn qalyptastyrý jáne salanyń ǵylymi-tehnologiialyq áleýetin arttyrý.
Almatydaǵy Iadrolyq fizika institýtynda Bektenov jańa býyn reaktorlaryna arnalǵan materialdardy synaý, iadrolyq tehnologiialardy meditsina men ónerkásipte qoldaný baǵytyndaǵy jumystarmen tanysty. Institýt bazasynda 11 negizgi eksperimenttik qondyrǵy, onyń ishinde VVR-K zertteý reaktory, údetkish keshender men radioaktivti qaldyqtardy saqtaý infraqurylymy jumys isteidi.
Búginde bul ortalyq Qazaqstandaǵy radiofarmpreparattardyń jalǵyz óndirýshisi sanalady. Munda iod-131 jáne tehnetsii-99m negizindegi preparattar shyǵarylady. Olar qalqansha bezi aýrýlaryn emdeýge jáne túrli organdardy diagnostikalaýǵa qoldanylady. Institýt eldiń radiofarmpreparattarǵa degen suranysynyń shamamen 85 paiyzyn qamtamasyz etedi.
Premer-ministrge radioaktivti materialdarmen jumys júrgiziletin arnaiy «ystyq kameralar» kórsetildi. Munda oblýchennyi qurylǵylardy bólshekteý, óńdeý jáne qaita daiyndaý qaýipsiz jaǵdaida júzege asyrylady. Institýt direktory Saiabek Sahievtiń aitýynsha, bul ónimder jyl saiyn 18 myńnan astam naýqastyń diagnostikasy men emine paidalanylady, al birqatar radioizotoptar Eýropa men AQSh-qa eksporttalady.
Sapar barysynda ǵylym jáne joǵary bilim ministri Saiasat Nurbek ǵylymdy qajet etetin aýmaqtardy damytý tujyrymdamasyn tanystyrdy. Pilottyq alań retinde dál osy Iadrolyq fizika institýtynyń aýmaǵy tańdalǵan. Munda ǵylymi-tehnologiialyq park qurý, joǵary bilikti kadrlar tartý jáne ázirlemelerdi kommertsiialandyrý kózdelip otyr.
Institýt aýmaǵynda ótken jyly 166 adamǵa arnalǵan zamanaýi jataqhana salynǵan. Oljas Bektenov jańa nysandy aralap kórip, mundai infraqurylym ǵylymǵa keletin jastardy tartýǵa jáne eldegi iadrolyq klasterdi damytýǵa serpin beretinin atap ótti.
