Freedom Bank پەن BI Group تۇرعىن ءۇي ساتىپ الۋعا ارنالعان جاڭا جيناقتاۋشى يپوتەكانى ىسكە قوسۋ بويىنشا مەموراندۋمعا قول قويدى، دەپ حابارلايدى Dala News.

مالىمەتكە سايكەس، جاڭا ءونىم تۇرعىن ءۇي-قۇرىلىس جيناق جۇيەسىن جانە جەڭىلدەتىلگەن نەسيەلەۋ مەحانيزمىن بىرىكتىرەدى. باعدارلاما باستاپقى تۇرعىن ءۇيدى ساتىپ الۋعا باعىتتالعان.

جوبا اياسىندا Freedom Bank كليەنتتەرى BI Group نىساندارىنىڭ سيفرلىق ۆيتريناسىنا Freedom SuperApp ارقىلى قول جەتكىزە الادى. پايدالانۋشىلار تۇرعىن ءۇيدى ونلاين تاڭداپ، يپوتەكانى قاشىقتان راسىمدەي الادى.

سونىمەن قاتار پاتەر باعاسىن 3 كۇنگە دەيىن كوميسسياسىز بەكىتۋ مۇمكىندىگى جانە جاڭا نىساندار ساتىلىمىنا باسىمدىقپەن قاتىسۋ قاراستىرىلعانى ايتىلدى.

Freedom Bank ديرەكتورلار كەڭەسىنىڭ مۇشەسى ايدوس جۇماعۇلوۆ جاڭا ءونىم جيناقتاۋ مۇمكىندىگىن، باسەكەگە قابىلەتتى مولشەرلەمەلەردى جانە سيفرلىق سەرۆيستى بىرىكتىرەتىنىن اتاپ ءوتتى.

ءوز كەزەگىندە BI Group حولدينگىنىڭ اتقارۋشى ديرەكتورى ەرنار ءجانادىل بۇل ارىپتەستىك تۇرعىن ءۇي ساتىپ الۋ پروسەسىن جەڭىلدەتۋگە جانە نارىقتاعى تەحنولوگيالىق دەڭگەيىن ارتتىرۋعا باعىتتالعانىن مالىمدەدى.

شارتتارى قانداي بولۋى مۇمكىن

رەسمي تۇردە جاڭا يپوتەكانىڭ ناقتى پايىزدىق مولشەرلەمەلەرى مەن تالاپتارى جاريالانعان جوق.

الايدا Freedom Bank پەن BI Group بۇعان دەيىن ۇقساس باعدارلامالاردى ىسكە اسىرعانىن ەسكەرسەك، ساراپشىلار جاڭا ءونىمنىڭ شارتتارى مىناداي دياپازوندا بولۋى مۇمكىن ەكەنىن ايتادى:

• باستاپقى جارنا شامامەن 20–30%؛
• نەسيە مەرزىمى 3 جىلدان 25 جىلعا دەيىن؛
• پايىزدىق مولشەرلەمە 7%-دان باستاپ 20%+ دەيىن وزگەرۋى ىقتيمال.

سونىمەن قاتار كەيبىر سەرىكتەستىك باعدارلامالاردا:

• قىسقا مەرزىمگە مولشەرلەمە 0،1%-دان باستاپ؛
• ۇزاق مەرزىمگە شامامەن 9%+ دەڭگەيىندە ۇسىنىستار بولعانى ايتىلدى.

ساراپشىلاردىڭ پىكىرىنشە، جاڭا ءونىم وسى مودەلدەردىڭ جالعاسى نەمەسە ەۆوليۋسياسى بولۋى مۇمكىن.

جاي يپوتەكا ەمەس

Freedom Bank وكىلدەرىنىڭ مالىمەتىنشە، جاڭا ءونىم تەك يپوتەكا رەتىندە ەمەس، تولىق ەكوجۇيەلىك سەرۆيس رەتىندە قاراستىرىلادى.

اتاپ ايتقاندا:

• قارجىلاندىرۋ (يپوتەكا)؛
• جىلجىمايتىن مۇلىك (BI Group نىساندارى)؛
• سيفرلىق قىزمەت (SuperApp)؛

ءبىر پلاتفورمادا بىرىكتىرىلەدى.

بۇل ءتاسىل تۇرعىن ءۇيدى تاڭداۋ، راسىمدەۋ جانە قارجىلاندىرۋ پروسەسىن تولىق سيفرلاندىرۋعا باعىتتالعان.