مەملەكەت باسشىسى قاسىم-جومارت توقاەۆ عالىمداردى ماراپاتتاۋ رەسٸمٸندە سٶز سٶيلەدٸ, دەپ حابارلايدى Dalanews.kz.
پرەزيدەنتتٸڭ ايتۋىنشا, زاڭ مەن تەرتٸپ يدەولوگيياسى كٷندەلٸكتٸ ٶمٸردٸڭ بارلىق سالاسىندا قاتاڭ ساقتالۋعا تيٸس.
"وسى تۇستا مىنا بٸر اسا ماڭىزدى مەسەلەنٸ قايتا اتاپ ٶتكٸم كەلەدٸ: قوعامدا زاڭ ٷستەمدٸگٸ قاعيداتىن, ياعني زاڭعا باعىنۋ مەدەنيەتٸن تٷبەگەيلٸ ورنىقتىرۋىمىز قاجەت. زاڭ مەن تەرتٸپ يدەولوگيياسى كٷندەلٸكتٸ ٶمٸردٸڭ بارلىق سالاسىندا قاتاڭ ساقتالۋعا تيٸس: قوعامدىق ورىنداعى جٷرٸس-تۇرىس مەدەنيەتٸنەن, ونىڭ ٸشٸندە جيىن-تويلاردان, تۇرمىستىق مەدەنيەتتەن باستاپ, جولدا كٶلٸك جٷرگٸزۋ مەدەنيەتٸنە دەيٸن وسى مىزعىماس قاعيداتقا ساي بولۋى كەرەك. بۇعان دەيٸن دە ٶز سٶزدەرٸمدە جول قاۋٸپسٸزدٸگٸ مەسەلەسٸنە ارنايى توقتالدىم. ٶكٸنٸشكە قاراي, قازاقستاندا جىل سايىن كٶلٸك اپاتىنىڭ كەسٸرٸنەن, سونىڭ ٸشٸندە كٶپ جاعدايدا جول قوزعالىسى ەرەجەسٸن ٶرەسكەل بۇزۋدىڭ سالدارىنان مىڭداعان ادام كٶز جۇمادى. بۇعان جول بەرۋگە بولمايدى. بۇرىن ەلٸمٸزدە كٶلٸك اپاتىنىڭ كٶپتٸگٸنە جولدىڭ ناشارلىعىن جەلەۋ قىلاتىن. كەيٸنگٸ بٸرنەشە جىلدا بارلىق ٶڭٸردەگٸ جول ينفراقۇرىلىمىن اۋقىمدى تٷردە جاڭعىرتۋدى قولعا الدىق", - دەدٸ توقاەۆ.
دەسەك تە, قاسىم-جومارت توقاەۆتىڭ پٸكٸرٸنشە, قايعىلى وقيعا ازايماي تۇر, بۇل جاعدايعا ٷكٸمەت پەن قوعام جٸتٸ نازار اۋدارۋى كەرەك.
"ازاماتتار بەكٸتٸلگەن ەرەجەلەردٸڭ بەرٸن مٷلتٸكسٸز ساقتايتىن كٶلٸك جٷرگٸزۋ مەدەنيەتٸن قالىپتاستىرعانى دۇرىس. پوليتسەيلەرمەن تەجٸكەلەسۋ, تٸپتٸ ولارعا شابۋىل جاساۋ دەرەكتەرٸن تىيۋ قاجەت. مۇنداي جاعدايلارعا, سونداي-اق, قۇقىقتىق نيگيليزم دەرتٸنە شالدىققان ادامداردى, باسقاشا ايتقاندا, سوتقارلار مەن بۇزاقىلاردى "قاھارمان" جاساۋعا زاڭ اياسىندا قاتاڭ شارا قولدانۋ كەرەك. ٶركەنيەتتٸ ۇلت بولعىمىز كەلسە, پوليتسەيلەردٸڭ, دەرٸگەرلەردٸڭ, مۇعالٸمدەر مەن قىزمەت كٶرسەتۋ سالاسى ماماندارىنىڭ, جالپى ادال ەرٸ زاڭعا باعىناتىن ازاماتتاردىڭ ار-نامىسىنا تيەتٸن كەز كەلگەن ەرەكەتكە باتىل تٷردە توسقاۋىل قويۋىمىز قاجەت", - دەدٸ توقاەۆ.
