بۇگىن سەمەي قالاسىنداعى ءاليحان بوكەيحان ۋنيۆەرسيتەتىندە «AMANAT» پارتياسىنىڭ «TURGYNDAR AMANATY» جوباسى اياسىندا «ءۇيدى باسقارۋ: جاۋاپكەرشىلىك، سەنىم، ناتيجە» اتتى وڭىرلىك فورۋم ءوتتى. شاراعا وبلىس اكىمى بەرىك ءۋالي، «AMANAT» پارتياسىنىڭ حاتشىسى ەرجان جىلقىبايەۆ قاتىستى، دەپ حابارلايدى Dalanews.kz.
فورۋم بارىسىندا كوپپاتەرلى تۇرعىن ۇيلەردى باسقارۋدىڭ وزەكتى ماسەلەلەرى، مۇلىك يەلەرى بىرلەستىكتەرى مەن پاتەر يەلەرى كووپەراتيۆتەرىنىڭ دامۋى، تۇرعىندارمەن ءتيىمدى كوممۋنيكاسيا ورناتۋ، سونداي-اق باسقارۋ تەتىكتەرىن جەتىلدىرۋ باعىتتارى تالقىلاندى.
«جوبا اياسىندا كوپپاتەرلى تۇرعىن ۇيلەردى باسقارۋ پروسەستەرىنىڭ اشىقتىعىن ارتتىرۋ، قارجىلىق ەسەپتىلىكتى سيفرلاندىرۋ، تۇرعىنداردىڭ شەشىم قابىلداۋ پروسەسىنە بەلسەندى قاتىسۋىن قامتاماسىز ەتۋ، سونداي-اق سەرۆيستىك قىزمەتتەردىڭ ساپاسىن جاقسارتۋ بويىنشا ناقتى شارالار قاراستىرىلعان. بۇل ءوز كەزەگىندە تۇرعىن ءۇي قورىن ءتيىمدى باسقارۋعا، ينفراقۇرىلىمنىڭ جاي-كۇيىن جاقسارتۋعا جانە ازاماتتاردىڭ ءومىر ءسۇرۋ ساپاسىن ارتتىرۋعا مۇمكىندىك بەرەدى. وسىلايشا، «TURGYNDAR AMANATY» جوباسى پارتيانىڭ سايلاۋالدى مىندەتتەرىن ىسكە اسىرۋدىڭ ماڭىزدى پراكتيكالىق قۇرالى بولا وتىرىپ، مەملەكەت باسشىسى ايقىنداعان ستراتەگيالىق باعىتتاردى جۇزەگە اسىرۋعا ەلەۋلى ۇلەس قوسادى»، – دەدى ايماق باسشىسى.
جيىندا «AMANAT» پارتياسىنىڭ حاتشىسى ەرجان جىلقىبايەۆ «TURGYNDAR AMANATY» جوباسىنىڭ نەگىزگى باعىتتارى مەن ماڭىزىن ءتۇسىندىردى.
فورۋمدا سەمەي قالاسىنىڭ اكىمى ادىلەت قوجانبايەۆ، كۋرچاتوۆ قالاسىنىڭ اكىمى بولات ابدىرالييەۆ، وبلىس ورتالىعىنداعى مۇلىك يەلەرى بىرلەستىكتەرى (ميب) مەن پاتەر يەلەرى كووپەراتيۆتەرىنىڭ (پيك) ءتوراعالارى ءوز تاجىريبەلەرىمەن ءبولىسىپ، ۇسىنىستارىن جەتكىزدى.
وبلىس بويىنشا تۇرعىن ءۇي قورى 2084 كوپپاتەرلى تۇرعىن ءۇيدى قۇرايدى، ونىڭ ىشىندە 1588ء-ى سەمەي قالاسىندا ورنالاسقان. تۇرعىن ۇيلەردىڭ جارتىسىنا جۋىعى 1970 جىلدارعا دەيىن سالىنعان. نەگىزگى بولىگى سەمەي، اياگوز جانە كۋرچاتوۆ قالالارىندا شوعىرلانعان. كۋرچاتوۆ قالاسىندا 81 كوپپاتەرلى تۇرعىن ۇيگە 3 باسقارۋ سۋبەكتىسى قىزمەت كورسەتەدى. 2023-2025 جىلدارى سەمەي قالاسىندا 169 اۋلا اۋماعى اباتتاندىرىلدى.
فورۋم اياسىندا پارتيا قاتارىنا جاڭادان قابىلدانعان ازاماتتارعا پارتيالىق بيلەتتەر تاپسىرىلىپ، ءبىرقاتار مۇلىك يەلەرى بىرلەستىكتەرى مەن پاتەر يەلەرى كووپەراتيۆتەرىنىڭ وكىلدەرى وبلىس اكىمىنىڭ العىس حاتىمەن ماراپاتتالدى.
