«قايرات ءبىرىنشى شىققان كەزدە ونى مەيرامبەكپەن قاتتى سالىستىردى. «سەن مەيرامبەك بولا المايسىڭ» دەپ تولقىن زابيروۆالار قالاي كوڭىلىمىزدى ءتۇسىرىپ تاستادى. ودان كەيىن بيبىگۇل اپامىز قايراتتى تانىماسا دا، تىڭداماسا دا، شاكىرتى تولقىن زابيروۆانىڭ سوزىنە ەرىپ (ءبارىمىز دە كومەكشىمىزدى تىڭدايمىز عوي)، «تىڭدامايمىن» دەگەن سياقتى ايتىپ قالدى. ءبىراق بيبىگۇل اپامىزدى ءبارىمىز جاقسى كورەمىز. قاتەلەسكەن جەرى شىعار دەپ قايرات ءالى كۇنگە دەيىن جاقسى كورەدى.
وزدەرىن جوعارى ۇستاپ، قايراتقا قانشا ءسوز ايتقان انشىلەر بولدى. ءبىراق ول بىزگە جاقسى. سەن سول سىنعا قاراپ، نامىستانىپ، العا كوتەرىلەسىڭ.
ودان كەيىن ەرنار ايدار شىققان كەزدە، «ويباي، قايرات، سەنەن وزىپ بارا جاتىر» دەپ شىقتى. ودان كەيىن تورەعالي شىعا باستادى. جۋرناليستەر، ءتىپتى، ەكەۋىنىڭ سۋرەتىن قاتار قويىپ، «قايسىسى مىقتى، قايسىسىنىڭ كيىمى مىقتى، داۋسى كۇشتى» دەپ سالىستىرا باستادى. تورەعاليدەن كەيىن، ءقازىر ديماش شىعىپ جاتىر. ديماشپەن سالىستىرىپ قويىپ قويادى»، – دەپ اعىنان جارىلدى گۇلزيرا ايداربەكوۆا.
ودان كەيىن تانىمال پروديۋسەر ديماشتى دا، ونىڭ اتا-اناسىن دا قاتتى سىيلايتىنىن تىلگە تيەك ەتتى. ول ديماشتى «فەنومەن» ۇلىنان ارتىق كورەتىندەرگە جاۋاپ بەردى.
«ديماش جاس ءانشى، ول الەمدى مويىنداتىپ جاتىر. ءبارىمىزدىڭ قۋانىشىمىز، كوزايىمىمىز. مەن ونىڭ اتا-اناسىن دا جاقسى سىيلايمىن. قايرات ەندى كونسەرت بەرە باستاپ، اقتوبەگە بارعانىندا بىردەن كومەك بەرە قويعان ديماشتىڭ پاپاسى. سودان كەيىن مەن ول كىسىنى جاقسى كورەمىن. ونىڭ بالاسىنا دا ءوز بالاما تىلەيتىندى تىلەيمىن. ءبىراق ەكەۋىن سالىستىرۋعا مۇلدەم كەلمەيدى.
ويتكەنى ديماش – كونكۋرستىڭ ءانشىسى، ونىڭ داۋسى سۇمدىق كەرەمەت. ال قايرات كونكۋرستىڭ ءانشىسى بولا المايدى. ول شىڭعىرىپ، نەشە ءتۇرلىنى جاساماعان. قايرات ديماش بولا المايدى، ال ديماش قايرات بولا المايدى»، – دەگەن گۇلزيرا ۇسەن قىزى قايراتتىڭ اتاق-ابىرويىنىڭ تومەندەپ قالمايتىنىنا سەنىمدى ەكەنىن مالىمدەدى.
