قازاقستان كاسىپورىندارى ىسكەرلىك بەلسەندىلىكتى قالپىنا كەلتىرە وتىرىپ، ءوز جۇمىسشىلارىنا كوپ نازار بولە باستادى. سونىڭ نەگىزىندە بيىلعى جىلى ناقتى جالاقى كولەمىنىڭ ءوسىمىن ەكونوميكا سالالارىنىڭ 48%-ى سەزدى (45 سالا). ءبىر جىل بۇرىن بۇل كورسەتكىش 35% بولاتىن (33 سالا)، دەپ حابارلايدى Baq.kz پورتالى energyprom.kz ساراپشىلارىنا سىلتەمە جاساپ.

قازاقستان ەكونوميكاسىندا ناقتى ورتاشا ايلىق جالاقى ءوسىمى جۇمىسقا ورنالاستىرۋ سالاسىندا تىركەلىپ وتىر – بىلتىرعى جىلدىڭ قاڭتار-ناۋرىز ايلارىمەن سالىستىرعاندا، بيىل سالا ماماندارىنىڭ جالاقىسى بىردەن 100،8 مىڭ تەڭگەگە نەمەسە 30%-كە ءوستى. ال سالاداعى ناقتى جالاقى ءوسىمى، ينفلياسيانى ەسكەرگەندە، 20،2%-كە ارتقان.

ناقتى جالاقى ءوسىمى بويىنشا ۇزدىك ۇشتىك قاتارىندا قۇبىرلار ارقىلى تاسىمال جۇمىسىمەن اينالىساتىن كاسىپورىندار بار. بيىلدان بەرى جۇمىسشىلارعا تولەنەتىن اقى بىلتىرعى سايكەس مەرزىممەن سالىستىرعاندا 95،4 مىڭ تەڭگەگە وسكەن.

ۇزدىك ۇشتىكتى كومپيۋتەر مەن تۇرمىستىق تەحنيكا جوندەۋ ۇيىمدارى بەكىتىپ وتىر. ونداعى جالاقى ءبىر جىل ىشىندە 77 مىڭ تەڭگەگە نەمەسە 51%-كە كوبەيگەن.

بيىلعى جىلى ەڭ جوعارى جالاقىنى تەڭىز نەمەسە جاعاداعى جۇك كولىكتەرىندە جۇمىس ىستەيتىندەر الاتىنى انىقتالدى (661،2 مىڭ تەڭگە، بۇل كورسەتكىش بىلتىرعىمەن سالىستىرعاندا 6%-كە ازايعان). سونىمەن قاتار سۋ كولىگى كاسىپورىندارىندا (569،5 مىڭ تەڭگە) جانە ءىرى كومپانيالاردا ىستەيتىن جۇمىسشىلار دا جاپ-جاقسى جالاقىمەن (454 مىڭ تەڭگە) قامتىلعان.