الماتى قالاسى پوليسيا دەپارتامەنتى باسشىسىنىڭ بۇرىنعى ورىنباسارى ەرجان ۇزابايەۆقا قاتىستى ءبىرقاتار كۇماندى دەرەكتەر ايتىلدى، دەپ حابارلايدى Dalanews.kz.
بۇل تۋرالى Dissident YouTube ارناسىندا جاريالانعان ۆيدەودا ءمالىم بولدى.
ارنا اۆتورلارىنىڭ ايتۋىنشا، ەكس-پوليسەي المالى اۋدانىندا ارنايى باتالوندى باسقارعان كەزدە جالعان جول-كولىك وقيعالارىن تىركەپ، سول ارقىلى ساقتاندىرۋ تولەمدەرىن الىپ وتىرعان.
“ولار ليۋكس ساناتىنداعى كولىكتەرگە قاتىستى جالعان جول اپاتتارىن راسىمدەپ، ساقتاندىرۋ كومپانيالارى ارقىلى ءىرى كولەمدە قاراجات شىعارىپ وتىرعان”، – دەيدى دەرەككوز.
ۆيدەودا ايتىلعان مالىمەتكە سايكەس، مۇنداي ارەكەتتەر تەك الماتى قالاسىمەن شەكتەلمەي، جامبىل جانە الماتى وبلىستارىندا دا بولۋى مۇمكىن. اتاپ ايتقاندا، جۇك تيەلگەن فۋرالار “ورتەندى” دەگەن جالعان قۇجاتتار راسىمدەلىپ، ساقتاندىرۋ تولەمدەرى الىنعانى ايتىلعان.
دەرەككوزدىڭ مالىمەتىنشە، بۇل سحەما بىرنەشە جىل بويى جۇيەلى تۇردە جۇزەگە اسىرىلىپ كەلگەن.
سونىمەن قاتار اۆتور ەكس-پوليسەيگە تيەسىلى بولۋى مۇمكىن مۇلىك تۋرالى دا مالىمەت كەلتىرەدى. ولاردىڭ ايتۋىنشا، جامبىل وبلىسى وتار ماڭىنداعى ءىرى شارۋاشىلىق رەسمي تۇردە تۋىسىنىڭ اتىنا تىركەلگەنىمەن، ءىس جۇزىندە ونىڭ وزىنە تيەسىلى بولۋى عاجاپ ەمەس.
“بۇل مۇلىك زاڭسىز جولمەن الىنعان بولۋى مۇمكىن”، – دەيدى ۆيدەو اۆتورى.
بۇدان بولەك، ءبىرقاتار قىمبات اۆتوكولىكتەر مەن بيزنەس نىساندارى دا ونىڭ تۋىستارىنىڭ اتىنا راسىمدەلگەنى ايتىلعان.
سونداي-اق ۆيدەودا اتالعان تۇلعامەن بايلانىسى بار دەلىنگەن بىرنەشە ادامنىڭ ەسىمى كەلتىرىلىپ، ولاردىڭ كەيبىرى بۇرىن قۇقىق قورعاۋ ورگاندارىندا قىزمەت اتقارعانى جانە ءتۇرلى داۋلارعا قاتىستى بولعانى اتالىپ وتكەن.
اۆتورلاردىڭ پىكىرىنشە، بۇل جاعدايلار ۇيىمداسقان قىلمىستىق توپ بەلگىلەرىنە ۇقسايدى.
وسىعان بايلانىستى ولار ىشكى ىستەر مينيسترلىگىنە، سونداي-اق وزگە دە قۇقىق قورعاۋ ورگاندارىنا ۇندەۋ جاساپ، اتالعان دەرەكتەردى تەكسەرۋدى سۇراعان.
“ەگەر بۇل مالىمەتتەر تەكسەرىلمەسە، وندا قۇقىقتىق مەملەكەت قاعيدالارىنا كۇمان تۋىندايدى”، – دەلىنگەن ۆيدەودا.
ايتا كەتەيىك، بۇعان دەيىن ءال-فارابي داڭعىلىنداعى ادام ولىمىنە اكەلگەن جول اپاتىنان كەيىن قالالىق پوليسيادا كادرلىق وزگەرىستەر باستالعانى تۋرالى جازعان ەدىك.
بەيرەسمي دەرەكتەرگە سۇيەنسەك، الماتى قالالىق پوليسيا دەپارتامەنتى باسشىسىنىڭ ورىنباسارى ەرجان ۇزابايەۆ ەڭبەككە جارامسىز دەپ، ۋاقىتشا دەمالىسقا كەتكەن. ونىڭ قىزمەتتەن بوساتىلۋى دا مۇمكىن ەكەنى ايتىلۋدا.
سونداي-اق، اكىمشىلىك پوليسيا باسقارماسىنىڭ باستىعى سەرىك شۋمايەۆ قىزمەتىنەن كەتكەنى بەلگىلى بولدى. بۇدان بولەك، ارنايى باتالوننىڭ ءۇش ۆزۆود كومانديرى جانە پاترۋلدىك پوليسيا پولكىنىڭ ءبىر روتا كومانديرى دە لاۋازىمىنان ايىرىلعان.
ەسكە سالايىق، بۇعان دەيىن زاڭگەر مولداحان ادىلەتحان ءال-فارابي داڭعىلىنداعى قايعىلى جول اپاتىنىڭ ءمان-جايىن جاريالاپ، جارىسقا قاتىسى بولۋى مۇمكىن تۇلعالار اراسىندا جوعارى لاۋازىمدى پوليسيا قىزمەتكەرىنىڭ اتى اتالعان بولاتىن.
رەسمي ورگاندار ازىرگە بۇل كادرلىق وزگەرىستەرگە قاتىستى تولىق تۇسىنىكتەمە بەرگەن جوق. الايدا وقيعا قوعامدا ۇلكەن رەزونانس تۋدىرىپ، قۇقىق قورعاۋ جۇيەسىنە قاتىستى سۇراقتاردى كۇشەيتتى.
قازىرگى ۋاقىتتا اپات بويىنشا تەكسەرۋ امالدارى جالعاسىپ جاتىر.
