دەپۋتات ەرمۇرات ءباپي مەملەكەتتىك قۇپياعا قول جەتكىزگەن جوعارى لاۋازىمدى تۇلعالاردىڭ شەتەلگە شىعۋىن زاڭ جۇزىندە رەتتەۋدى ۇسىندى. بۇل تۋرالى ول الەۋمەتتىك جەلىدەگى جازباسىندا مالىمدەدى، دەپ حابارلايدى Dalanews.kz.
ءباپيدىڭ پىكىرىنشە، ەكس-پرەزيدەنتتەر، بۇرىنعى مينيسترلەر جانە مەملەكەتتىك قۇپيامەن جۇمىس ىستەگەن وزگە دە لاۋازىم يەلەرىنىڭ شەتەلگە كەدەرگىسىز شىعۋى ۇلتتىق قاۋىپسىزدىك تۇرعىسىنان تاۋەكەل تۋدىرۋى مۇمكىن.
سول سەبەپتى ول زاڭگەر-دەپۋتات ارىپتەستەرىنە وسى باعىتتا زاڭنامالىق باستاما كوتەرۋ مۇمكىندىگىن قاراستىرۋدى ۇسىندى. دەپۋتات ءوز جازباسىندا ابزال قۇسپان، مارات باشيموۆ، باقىتجان بازاربەك جانە ءۇنزيلا شاپاق سىندى قۇقىق سالاسىنىڭ وكىلدەرىنە سۇراق جولداعان.
“بۇل نە قىلعان سۇمەڭدەگەن ءجۇرىس؟! كەزىندە جەكە ءوزى بيلەپ-توستەپ، ءبىر شىبىقپەن ايداعان حالقى پانا بولمايتىنىن سەزگەن سوراقىنىڭ قورلىعى عانا ما؟ البەتتە بۇل تىلەنشەكتىك قازاقستانعا، قازاققا قارايلاس قارەكەت ەمەس، ادەتتەگىدەي تويىمسىز جەكە باستىڭ قامى بولسا كەرەك! سوندىقتان ەلدىڭ قاۋىپسىزدىگىن قامتاماسىز ەتۋ ماقساتىندا مەملەكەتتىك قۇپيانى بىلەتىن تۇلعانىڭ (ەكس-پرەزيدەنت بولسىن، مينيستر نەمەسە باسقا دا لاۋازىمگەر بولسىن) شەت ەلگە شىعۋ مۇمكىندىگىن رەتتەيتىن زاڭ قاجەت شىعار. قالاي ويلايسىڭدار، زاڭگەر-دەپۋتات ارىپتەستەر، ءبىز وسىنداي زاڭعا باستاماشىلىق جاساي الامىز با”، — دەدى ول.
ءباپي شەتەلگە شىعۋعا شەكتەۋ قويۋ تاجىريبەسى جۇڭگو سەكىلدى ەلدەردە بار ەكەنىن اتاپ ءوتتى.
“قىتايداعى سياقتى شەتكە شىعۋدى شەكتەيتىن زاڭ ءبىزدىڭ ەلدىڭ حالىقارالىق مىندەتتەمەلەرى مەن مەملەكەتارالىق كونۆەنسيالارعا قانشالىقتى قايشى كەلۋى مۇمكىن؟ ماسەلەن، ءبىز دەپۋتات رەتىندە مۇنداي مەملەكەتتىك قۇپيالىق قاجەتتىلىككە مويىنسۇنۋعا ءماجبۇرمىز”، — دەپ قوستى ول.
سونىمەن بىرگە ول ۇلتتىق قاۋىپسىزدىك ماقساتىندا كەيبىر تۇلعالارعا الدىن الا “شەكارالىق شەكتەۋ بەلگىسىن” ەنگىزۋ تەتىگىن قاراستىرۋعا بولاتىنىن ايتتى.
“ال بۇعان جانە قوجامجاروۆ سياقتى باسقالارعا ەلدىڭ قاۋىپسىزدىك قامىنا وراي كۇنىبۇرىن شەكارالىق "قىزىل جالاۋشا" قويۋعا بولماي ما؟ بۇل قابىلداۋدىڭ ساياسي مازمۇنىن كرەمل قالاي قابىلدايتىنىن قايدام، ال ەكس-پرەزيدەنتتىڭ ىشىندەگى "قىزىل ءيتى" ەلدىڭ مەملەكەتتىك بيلىگى مەن قازاقستان حالقىنا سەس كورسەتۋى دەپ تۇسىنەمىز بە؟”، — دەپ تۇيىندەدى دەپۋتات.
